‘અમેઠી-રાયબરેલી કોંગ્રેસનો ગઢ નથી’: અખિલેશ યાદવ

નવી દિલ્હી, 15 ફેબ્રુઆરી: કોંગ્રેસના પૂર્વ અધ્યક્ષ સોનિયા ગાંધીએ રાજસ્થાનથી આગામી રાજ્યસભા ચૂંટણી માટે બુધવારે અહીં ઉમેદવારી પત્ર ભર્યું. મતલબ કે સોનિયા ગાંધી આ વખતે લોકસભાની ચૂંટણી નહીં લડે. આવી સ્થિતિમાં રાયબરેલી લોકસભા સીટને લઈને ચર્ચા શરૂ થઈ ગઈ છે. એવું પણ કહેવામાં આવી રહ્યું છે કે પ્રિયંકા ગાંધીને આ વખતે રાયબરેલી સીટ પરથી મેદાનમાં ઉતારવામાં આવી શકે છે. આ દરમિયાન સમાજવાદી પાર્ટીના નેતા અખિલેશ યાદવે રાયબરેલી કોંગ્રેસનો ગઢ નથી એમ કહીને વિપક્ષી ગઠબંધનની ચિંતા વધારી દીધી છે.

અખિલેશના નિવેદનથી કોંગ્રેસમાં વધી શકે છે નારાજગી

અખિલેશ યાદવે કહ્યું, અમેઠી-રાયબરેલી લોકસભા બેઠકો કોંગ્રેસનો ગઢ નથી. સમાજવાદી પાર્ટી હંમેશા આ બેઠકો પર કોંગ્રેસને મદદ કરતી રહી છે. સોનિયા ગાંધીના રાજ્યસભામાં જવાના અને પ્રિયંકા ગાંધીના રાયબરેલીથી ચૂંટણી લડવાના પ્રશ્ન પર સમાજવાદી પાર્ટીના અધ્યક્ષ અખિલેશ યાદવે કહ્યું કે અમેઠી-રાયબરેલી ચોક્કસપણે કોંગ્રેસની પરંપરાગત બેઠક રહી છે, પરંતુ તે કોંગ્રેસનો ગઢ નથી. સપા-કોંગ્રેસ ઈન્ડિયા એલાયન્સમાં સીટ વહેંચણીને લઈને વાતચીત અટવાઈ ગઈ છે. દરમિયાન અખિલેશ યાદવના આ નિવેદનથી કોંગ્રેસમાં નારજગી ચોક્કસપણે વધી શકે છે.

સોનિયા ગાંધી 1999માં રાયબરેલીથી પહેલીવાર ચૂંટણી જીત્યા હતા

રાયબરેલી લોકસભા મતવિસ્તારનું પ્રતિનિધિત્વ કરતા 77 વર્ષીય સોનિયા ગાંધી 1999માં કોંગ્રેસ અધ્યક્ષ બન્યા બાદ પ્રથમ વખત ત્યાંથી સાંસદ તરીકે ચૂંટાયા હતા. સોનિયા ગાંધીએ 2019માં જાહેરાત કરી હતી કે આ તેમની છેલ્લી લોકસભા ચૂંટણી હશે. એવી અટકળો છે કે સોનિયા ગાંધી આ વખતે ચૂંટણી નહીં લડે તો તેમની પુત્રી પ્રિયંકા ગાંધી વાડ્રા રાયબરેલી લોકસભા બેઠક પરથી ચૂંટણી લડી શકે છે.

આ પણ વાંચો: યુપીમાં ભાજપ એકને છોડીને તમામ સાંસદોની ટિકિટ કાપી રહી છે: અખિલેશ યાદવ