- યુનાઈટેડ વર્લ્ડ રેસલિંગે સભ્યપદ પુનઃસ્થાપિત કર્યુ
- ગયા વર્ષે ઓગસ્ટમાં ફેડરેશનનું સભ્યપદ રદ કરવામાં આવ્યું હતું
- પ્રમુખ પદ માટે ચૂંટણી ન યોજતા પદ ગયું હતું
નવી દિલ્હી, 13 ફેબ્રુઆરી : યુનાઈટેડ વર્લ્ડ રેસલિંગે ભારતીય રેસલિંગ ફેડરેશનનું સભ્યપદ પુનઃસ્થાપિત કર્યુ છે. ગયા વર્ષે ઓગસ્ટમાં ફેડરેશનનું સભ્યપદ અનિશ્ચિત સમય માટે રદ કરવામાં આવ્યું હતું. જેની પાછળનું કારણ પ્રમુખ પદ માટે ચૂંટણી ન યોજવાનું બહાર આવ્યું હતું. આ સંબંધમાં યુનાઈટેડ વર્લ્ડ રેસલિંગ દ્વારા જારી કરવામાં આવેલા નિવેદનમાં કહેવામાં આવ્યું છે કે ભારતીય રેસલિંગ ફેડરેશનનું સભ્યપદ ગયા વર્ષે ઓગસ્ટમાં સસ્પેન્ડ કરવામાં આવ્યું હતું.
છ મહિના કરતા વધુ સમયથી ચૂંટણી થઈ ન હતી
UWWએ કહ્યું, યુનાઈટેડ વર્લ્ડ રેસલિંગે ગયા વર્ષે 23 ઓગસ્ટે ભારતીય કુસ્તી ફેડરેશનને કામચલાઉ સસ્પેન્શન હેઠળ મૂક્યું હતું કારણ કે ભારતીય સંસ્થા સમયસર ચૂંટણી કરાવવામાં નિષ્ફળ રહી હતી. UWW ડિસિપ્લિનરી ચેમ્બરે નક્કી કર્યું કે તેની પાસે બોડી પર કામચલાઉ સસ્પેન્શન લાદવા માટે પૂરતા કારણો છે કારણ કે ફેડરેશનમાં ઓછામાં ઓછા છ મહિના સુધી પરિસ્થિતિ યથાવત્ હતી.
9 ફેબ્રુઆરીએ મળેલી બેઠકમાં આ નિર્ણયો લેવામાં આવ્યા
સસ્પેન્શનની સમીક્ષા કરવા માટે 9 ફેબ્રુઆરીએ યોજાયેલી બેઠકમાં યુનાઈટેડ વર્લ્ડ રેસલિંગના અધિકારીઓએ અમુક શરતો હેઠળ સસ્પેન્શન હટાવવાનો નિર્ણય કર્યો હતો. UWW એ ભારતીય રેસલિંગ ફેડરેશનને તેના એથ્લેટ્સ કમિશન માટે ફરીથી ચૂંટણીઓ યોજવા માટે નિર્દેશ આપ્યો છે. તે જણાવે છે કે આ કમિશન માટેના ઉમેદવારો સક્રિય એથ્લેટ હોવા જોઈએ અથવા ચાર વર્ષથી વધુ સમયથી નિવૃત્ત થયા નથી. મતદારો ખાસ કરીને રમતવીરો હશે.
WFI એ લેખિતમાં ગેરેન્ટી આપવી પડશે
આ ચૂંટણીઓ 1 જુલાઈ, 2024 પછી કોઈપણ વરિષ્ઠ રાષ્ટ્રીય ચેમ્પિયનશિપ દરમિયાન યોજવામાં આવશે. આદેશમાં વધુમાં કહેવામાં આવ્યું છે કે, WFI તરત જ UWWને લેખિત ગેરંટી આપશે કે તમામ WFI ઈવેન્ટ્સ, ખાસ કરીને ઓલિમ્પિક ગેમ્સ અને અન્ય કોઈપણ મોટી રાષ્ટ્રીય અને આંતરરાષ્ટ્રીય ઈવેન્ટ્સમાં કોઈપણ ભેદભાવ વિના તમામ કુસ્તીબાજોને ભાગ લેવાની મંજૂરી આપવામાં આવશે.
