પટના, 10 ફેબ્રુઆરી : બિહારમાં નવી સરકાર બન્યા બાદ 12મી ફેબ્રુઆરીએ ફ્લોર ટેસ્ટ થવાનો છે. આ પહેલા 11 ફેબ્રુઆરીના રોજ જનતા દળ યુનાઈટેડ (JDU) એ ધારાસભ્ય દળની બેઠક બોલાવી છે. જેડીયુના ધારાસભ્યોને આમાં ફરજિયાત રીતે ભાગ લેવાની સૂચના આપવામાં આવી છે. આ દરમિયાન આરજેડીએ તેના ધારાસભ્યોને મીટિંગ માટે બોલાવ્યા છે અને તેજસ્વી યાદવના ઘરે તેમને રોક્યા છે. આરજેડીની બેઠક 3 કલાક સુધી ચાલી હતી. આ પછી ધારાસભ્યોને પંચ દેશ રત્ન માર્ગ સ્થિત તેજસ્વીના આવાસ પર રોકી દેવામાં આવ્યા હતા. ધારાસભ્યનો સામાન તેમના નિવાસસ્થાને મોકલવામાં આવી રહ્યો છે.
કોંગ્રેસે પણ બોલાવી બેઠક
બીજી તરફ બિહાર કોંગ્રેસના ધારાસભ્યો ફ્લોર ટેસ્ટ પહેલા હૈદરાબાદ પહોંચી ગયા છે. ધારાસભ્યો તૂટવાના ડરને કારણે તેમને હૈદરાબાદ મોકલવામાં આવ્યા છે. તાજેતરમાં દિલ્હીમાં રાજ્યના કોંગ્રેસના ધારાસભ્યોની બેઠક પણ યોજાઈ હતી. જેમાં 19માંથી 17 ધારાસભ્યોએ ભાગ લીધો હતો. આ પછી બિહાર કોંગ્રેસના 16 ધારાસભ્યો હૈદરાબાદ પહોંચ્યા હતા.
જેડીયુએ ધારાસભ્યો માટે લંચનું આયોજન કર્યું
ઉલ્લેખનીય છે કે, જેડીયુએ તેના ધારાસભ્યોને આજે મંત્રી શ્રવણ કુમારના ઘરે લંચ માટે બોલાવ્યા છે. જેડીયુ પોતાના ધારાસભ્યો પર નજર રાખવા માંગે છે. બીજી તરફ લાલુ પ્રસાદ યાદવની પાર્ટી આરજેડીના ધારાસભ્યોની આજે બપોરે 3 વાગે તેજસ્વી યાદવના ઘરે બેઠક થઈ હતી. આરજેડીએ તેના ધારાસભ્યોને 12મી ફેબ્રુઆરીએ ગૃહમાં હાજર રહેવા વ્હીપ જાહેર કર્યો છે.
ષડયંત્રથી રાજકીય વાતાવરણ ગરમાયું
ષડયંત્રના કારણે બિહારના રાજકારણમાં વાતાવરણ ગરમાયું છે. હિન્દુસ્તાન અવમ મોરચાના પ્રમુખ અને પૂર્વ મુખ્યમંત્રી જીતનરામ માંઝી નવી સરકારમાં મહત્વનો વિભાગ લેવાનો પ્રયાસ કરી રહ્યા છે અથવા વધુ એક મંત્રીની માંગણી આગળ ધપાવી રહ્યા છે. જ્યારથી જીતનરામ માંઝી વિશે ચર્ચા થઈ રહી છે, ત્યારથી તેઓ મહાગઠબંધન કેમ્પના સંપર્કમાં છે. આવા અહેવાલો વારંવાર આવ્યા અને મંત્રી સંતોષ સુમને આ અહેવાલોને ફગાવી દીધા હતા.
નવા સ્પીકરની ચૂંટણી પણ 12મીએ યોજાશે
મહત્વનું છે કે, નીતિશ કુમારે 28 જાન્યુઆરીની સાંજે 8 મંત્રીઓ સાથે મુખ્યમંત્રી તરીકે શપથ લીધા હતા. વિજય સિંહા (ડેપ્યુટી સીએમ), સમ્રાટ ચૌધરી (ડેપ્યુટી સીએમ), વિજય કુમાર ચૌધરી, ડો. પ્રેમ કુમાર, બ્રિજેન્દ્ર પ્રસાદ યાદવ, સુમિત કુમાર સિંહ, સંતોષ કુમાર, શ્રવણ કુમાર નીતિશના નવા કેબિનેટનો ભાગ છે. વિધાનસભાના નવા અધ્યક્ષની પણ ચૂંટણી થવાની છે, જેની ચૂંટણી 12 ફેબ્રુઆરીએ થશે.
