જમ્મુ-કાશ્મીરના શ્રીનગરના સૌથી વ્યસ્ત વિસ્તાર લાલ બજારમાં મંગળવારે આતંકવાદીઓએ નાકા પોલીસ પાર્ટી પર હુમલો કર્યો હતો. જોકે આ હુમલામાં ASI મુશ્તાક અહેમદ શહીદ થયા હતા, પરંતુ સુરક્ષા દળોએ આતંકવાદીઓના નાપાક કાવતરાને નિષ્ફળ બનાવ્યો હતો અને તેમને ભાગી જવા મજબૂર કર્યા હતા. આ આતંકી હુમલાનો એક વીડિયો સામે આવ્યો છે. આ વીડિયો આતંકવાદીઓ દ્વારા જાહેર કરવામાં આવ્યો છે. બીજી તરફ, સુરક્ષા દળોને ગુપ્તચર માહિતી મળી છે કે આતંકવાદીઓ ઘાટીમાં વધુ હુમલા કરવાની યોજના બનાવી રહ્યા છે.
Shot on camera: terror attack on police naka party in Lal Bazaar area of Srinagar pic.twitter.com/6nuV1399Di
— Pradeep Dutta (@deepduttajourno) July 13, 2022
જમ્મુ અને કાશ્મીરના પોલીસ અધિકારીઓના જણાવ્યા અનુસાર, આ હુમલાની જવાબદારી ISIS અને ધ રેઝિસ્ટન્સ ફ્રન્ટ (TRF), લશ્કર-એ-તૈયબાની આતંકવાદી ટીમ દ્વારા લેવામાં આવી છે, જે વર્ષ 2019 થી જમ્મુ અને કાશ્મીરમાં સામે આવી છે. એક વરિષ્ઠ પોલીસ અધિકારીએ જણાવ્યું હતું કે, તેઓએ હુમલાને ફિલ્માવવા માટે પ્રોફેશનલ બોડી કેમેરાનો ઉપયોગ કર્યો હતો અને પછી જવાબદારી સ્વીકારતો વિડિયો બહાર પાડ્યો હતો.અત્યાર સુધીની તપાસમાં આ હુમલામાં ઓછામાં ઓછા ત્રણ આતંકવાદીઓ સામેલ હોવાનું બહાર આવ્યું છે. પોલીસ અધિકારીએ જણાવ્યું હતું કે, બે આતંકવાદીઓ મોટરસાયકલ પર આવ્યા અને પિસ્તોલથી ગોળીબાર કરવાનું શરૂ કર્યું, જે વિડીયો ક્લિપમાં દેખાઈ આવે છે.
શ્રીનગરમાં લગભગ 15 દિવસમાં આ પ્રથમ આતંકવાદી હુમલાની ઘટના છે. અમરનાથ યાત્રા શરૂ થયા બાદ આ પહેલો હુમલો છે. એનડીટીવી અનુસાર, સુરક્ષા દળોને ગુપ્તચર માહિતીથી જાણવા મળ્યું છે કે હજુ ઘણું બધું થઈ શકે છે.આ ત્રીજો હુમલો છે જેમાં આતંકવાદીઓએ હુમલાને શૂટ કરવા માટે બોડી કેમેરાનો ઉપયોગ કર્યો હતો. “આ વર્ષે આ પ્રથમ વખત છે. અગાઉ 2020 માં તેઓએ બારામુલ્લામાં સમાન પદ્ધતિનો ઉપયોગ કર્યો હતો. અને પછી 2021 માં પમ્પોર બાયપાસ નજીક,” એક અધિકારીએ જણાવ્યું હતું.
