રેલવેમાં નોકરી આપવાના નામે 21 કરોડ લૂંટ્યા, પોલીસે જાળ પાથરી આરોપીને ઝડપી લીધો

મુંબઈ (મહારાષ્ટ્ર), 06 ફેબ્રુઆરી: રેલવેમાં સરકારી નોકરી આપવાના નામે છેતરપિંડી કરનારી ગેંગના લીડરની ધરપકડ કરવામાં આવી છે. 300થી વધુ લોકો સાથે 21 કરોડની છેતરપિંડી કરનારો શખ્સ મુંબઈ પોલીસના હાથે ઝડપાઈ ગયો છે. પશ્ચિમ રેલવેની વિજિલન્સ ટીમે નકલી રેલવે ભરતી રેકેટના મુખ્ય સૂત્રધાર હરતાલી પ્રસાદ રોહિદાસની ધરપકડ કરીને મોટી સફળતા મેળવી છે. તેણે 300થી વધુ ઉમેદવારોને રેલવેમાં સરકારી નોકરી આપવાની લાલચ આપી હતી. વિજિલન્સ ટીમ છેલ્લા ત્રણ મહિનાથી આરોપીની શોધ કરી રહી હતી.

મુંબઈ સેન્ટ્રલ સ્ટેશનના મંડપમાંથી ધરપકડ

પશ્ચિમ રેલવેના મુખ્ય જનસંપર્ક અધિકારી સુમિત ઠાકુરના જણાવ્યા મુજબ, બહારના વ્યક્તિ અને બે પ્રોક્સી ઉમેદવારોની મદદથી આરોપીને પકડવા માટે જાળ પાથરી હતી, જેમાં 20,000 રૂપિયા ગુગલ પે દ્વારા આરોપીને ટ્રાન્સફર કરવામાં આવ્યા હતા. બાકીના હપ્તાની ચુકવણી માટે આરોપીને મુંબઈ સેન્ટ્રલ સ્ટેશન પર મળવાનો પ્લાન ઘડવામાં આવ્યો હતો. તે 2 ફેબ્રુઆરીએ બપોરે 2 વાગ્યે મુંબઈ સેન્ટ્રલ સ્ટેશનમાંથી પકડાયો હતો.

નોકરીના બહાને ઉમેદવાર દીઠ 10 લાખ વસૂલ્યા

WRની તપાસમાં બહાર આવ્યું છે કે આરોપીએ કથિત રીતે ઉમેદવાર દીઠ 9-10 લાખ રૂપિયા વસૂલ્યા હતા. તે કોલકાતાના એક વ્યક્તિની મદદથી નકલી દસ્તાવેજો બનાવતો હતો. આ ઉપરાંત, આરોપીના સ્માર્ટફોનમાં કુલ 180 બ્લોક કરેલા નંબરો મળી આવ્યા હતા, જે પીડિતોના હોઈ શકે છે, જેમણે તેને રેલવેની આકર્ષક નોકરી મેળવવા માટે મોટી રકમ ચૂકવી હતી. તપાસમાં છેતરપિંડીનો ભોગ બનેલા લોકોની લગભગ 120 ચેટ પણ મળી આવી હતી, જેઓ તેમના પૈસા પાછા માંગી રહ્યા હતા.આરોપીને મુંબઈ સેન્ટ્રલ ખાતે સરકારી રેલવે પોલીસને સોંપવામાં આવ્યો હતો અને આઈપીસીની વિવિધ કલમો હેઠળ ગુનો નોંધવામાં આવ્યો હતો.

આ પણ વાંચો: ગુજરાતમાં સરકારી નોકરીના નામે કરોડો રૂપિયાની છેતરપિંડી