રાષ્ટ્રીય પ્રવાસન દિવસ : ભારતના આ ટૂરિસ્ટ પ્લેસ આખી દુનિયામાં પ્રખ્યાત

• આ વર્ષે “સ્થિર જર્ની, ટાઈમલેસ મેમરી” થીમ રાષ્ટ્રીય પ્રવાસન દિવસની કરવામાં આવી રહી છે ઉજવણી
• ઘણા લોકોને રોજગારી પૂરી પાડવા તેમજ દેશની જીડીપી વધારવામાં પ્રવાસન સ્થળોની વિશેષ ભૂમિકા

નવી દિલ્હી, 25 જાન્યુઆરી: ભારતના ઘણા સ્થળો સમગ્ર વિશ્વમાં ખૂબ પ્રખ્યાત છે અને મોટી સંખ્યામાં વિદેશી પ્રવાસીઓ અહીં આવવાનું પસંદ કરે છે. આ જગ્યાઓ તેમના મનને જ નહીં પરંતુ તમારા મનને પણ ખુશ કરી શકે છે. દર વર્ષે 25 જાન્યુઆરીને એટલે કે આજને ભારતમાં રાષ્ટ્રીય પ્રવાસન દિવસ તરીકે ઉજવવામાં આવે છે. દર વર્ષે રાષ્ટ્રીય પ્રવાસન દિવસ એક અલગ થીમ સાથે ઉજવવામાં આવે છે. આ વર્ષે તેની થીમ “સ્થિર જર્ની, ટાઈમલેસ મેમરી” છે. પ્રવાસન દ્વારા લોકોને માત્ર અનુભવ જ નથી મળતો. પરંતુ તેનાથી ઘણા લોકોને રોજગારી પણ પ્રાપ્ત થાય છે તેમજ દેશની જીડીપી વધારવામાં પ્રવાસન સ્થળો વિશેષ ભૂમિકા ભજવે છે. આ દિવસની ઉજવણી તેના મહત્વને ઉજાગર કરવાના હેતુથી શરૂ કરવામાં આવી હતી.

આ દિવસનો ઇતિહાસ અને મહત્વ શું છે ?

રાષ્ટ્રીય પ્રવાસન દિવસની ઉજવણી વર્ષ 1948માં શરૂ થઈ હતી. દેશના વિકાસમાં પ્રવાસન કેવી રીતે યોગદાન આપી શકે છે તેનું મહત્વ સમજીને સૌપ્રથમ પ્રવાસન ટ્રાફિક સમિતિની રચના કરવામાં આવી હતી. તેની રચનાના લગભગ ત્રણ વર્ષ પછી, એટલે કે 1951માં, કોલકાતા અને ચેન્નાઈમાં પ્રવાસન દિવસની પ્રાદેશિક કચેરીઓની સ્થાપના કરવામાં આવી. ત્યારબાદ દિલ્હી, મુંબઈ અને કોલકાતામાં પણ પ્રવાસન કચેરીઓ સ્થાપવામાં આવી. આ દિવસની ઉજવણીનો મુખ્ય ઉદ્દેશ્ય માત્ર દેશમાં જ નહીં પરંતુ સમગ્ર વિશ્વમાં ભારતમાં પ્રવાસન સ્થળોને પ્રોત્સાહન આપવાનો છે. જેના દ્વારા ભારતની અર્થવ્યવસ્થા મજબૂત બને છે. આ ઉપરાંત પ્રવાસન એ દરેક દેશ માટે રોજગારનું એક મોટું સાધન છે.

ગુજરાતમાં ફરવા માટેના પ્રવાસન સ્થળો :

1. સ્ટેચ્યુ ઓફ યુનિટી – Statue of Unity

સ્ટેચ્યુ ઓફ યુનિટીએ વિશ્વની સૌથી ઊંચી પ્રતિમા છે, જેની ઉંચાઈ 182 મીટર (597 ફીટ) છે, જે ભારતના ગુજરાત રાજ્યમાં કેવડિયા નજીક આવેલી છે. તે ભારતીય રાજનેતા અને સ્વતંત્રતા કાર્યકર્તા વલ્લભભાઈ પટેલ (1875-1950)ને દર્શાવે છે, જેઓ સ્વતંત્ર ભારતના પ્રથમ નાયબ વડાપ્રધાન અને ગૃહપ્રધાન હતા અને મહાત્મા ગાંધીના અનુયાયી હતા. પટેલ ભારતના રાજકીય એકીકરણમાં મહત્વપૂર્ણ ભૂમિકા ભજવવા માટે ખૂબ આદરણીય છે. આ પ્રતિમા ગુજરાતમાં કેવડિયા વસાહતમાં નર્મદા નદી પર સ્થિત છે, જે વડોદરા શહેરથી 100 કિલોમીટર (62 માઇલ) દક્ષિણ-પૂર્વમાં સરદાર સરોવર બંધની સામે છે.

2. ધોરડો – Dhordo, Kutch

કચ્છમાં આવેલા ધોરડોને ‘શ્રેષ્ઠ પ્રવાસન ગામ’નું બિરુદ મળ્યું છે. જે ગુજરાતીઓ અને વડાપ્રધાન નરેન્દ્ર મોદી માટે ગર્વની વાત છે કારણ કે યુનાઈટેડ નેશન્સ વર્લ્ડ ટ્રેડ ઓર્ગેનાઈઝેશને 20 ઓક્ટોબર, 2023ના રોજ, ગુજરાતના કચ્છમાં આવેલા ધોરડો, ‘શ્રેષ્ઠ પ્રવાસન ગામ’નું શીર્ષક આપ્યું હતું. તેથી ધોરડોએ ગુજરાતના પ્રવાસન સ્થળોમાંથી પ્રખ્યાત એક સ્થળ બની ચૂક્યું છે જેની મુલાકાત લઈને પ્રવાસીઓ આનંદ અને ઉત્સાહની લાગણી અનુભવે છે.

3. કચ્છનું રણ: કચ્છના સફેદ રણમાં સફેદ મીઠાની દુનિયામાં પ્રવેશ કર્યો હોય તેવો અનુભવ થાય છે. આ વિશાળ સફેદ રણ સંગીત, નૃત્ય અને હસ્તકલાના ઉત્સવ માટેનું ઉત્તમ સ્થળ છે, ખાસ કરીને રણ ઉત્સવ દરમિયાન આ રણનું મહત્ત્વ વધી જાય છે. જ્યાં તમે ક્ષિતિજમાં સૂર્યાસ્તનો આનંદ પણ લઈ શકો છો.

4. ગીર રાષ્ટ્રીય ઉદ્યાન: ગીર રાષ્ટ્રીય ઉદ્યાન વન્યજીવ પ્રેમીઓ માટે એક સુંદર સ્થળ છે. વિશ્વમાં આ એકમાત્ર જગ્યા છે જ્યાં એશિયાટિક સિંહ જોઈ શકાય છે. તમે સફારીનો આનંદ પણ માણી શકો છો અને ચિત્તા, હરણ અને વિવિધ પક્ષીઓની પ્રજાતિઓ સહિત વિવિધ વનસ્પતિ અને પ્રાણીસૃષ્ટિના સાક્ષી બની શકો છો.

5. દ્વારકાધીશ મંદિર, દેવભૂમિ દ્વારકા: દ્વારકાધીશ મંદિરએ ભગવાન કૃષ્ણને સમર્પિત એક તીર્થસ્થાન છે અને ઘણા લોકો માટે અપાર આધ્યાત્મિક મૂલ્ય ધરાવે છે. આર્કિટેક્ચરની શ્રેષ્ઠ સ્થળોમાંનું એક આ મંદિરના વાતાવરણમાં લીન થઈ પ્રવાસીઓ પરમ શાંતિની લાગણી અનુભવે છે.

6. સોમનાથ મંદિર, સોમનાથ:  સોમનાથ મંદિરએ ભગવાન શિવના બાર જ્યોતિર્લિંગોમાંનું એક છે. અરબી સમુદ્રના કિનારે મંદિરનું સ્થાન તેના આધ્યાત્મિક મહત્વમાં એક શાંત સ્પર્શ ઉમેરે છે અને જો તમને તક મળે તો આ મંદિરની મુલાકાત લેવી આવશ્યક છે.

દેશમાં ફરવા માટેના પ્રવાસન સ્થળો :

1. તાજમહેલ – TAJ MAHAL

વિશ્વમાં તાજમહેલ જેટલા પ્રતિષ્ઠિત સ્થાનો થોડાક જ છે, જે સૌથી વધુ વિદેશી પ્રવાસીઓની યાદીમાં સામેલ છે. આ સુંદર સમાધિનું નામ શાહજહાંની પ્રિય પત્ની મુમતાઝ મહેલના નામ પરથી રાખવામાં આવ્યું હતું. તેથી, ફક્ત વિદેશી પ્રવાસીઓ જ નહીં પરંતુ ભારતીય પ્રવાસીઓ પણ આ સ્થળની મુલાકાત લેવા માંગે છે.

2. લાલ કિલ્લો-Red Fort, Delhi

દિલ્હીનો લાલ કિલ્લોએ ભારતનો એક ઐતિહાસિક કિલ્લો છે, જે મુઘલ સમ્રાટોનું મુખ્ય નિવાસસ્થાન હતું. બાદશાહ શાહજહાંએ 12 મે 1639ના રોજ લાલ કિલ્લાનું બાંધકામ શરૂ કર્યું, જ્યારે તેણે પોતાની રાજધાની આગ્રાથી દિલ્હી ખસેડવાનું નક્કી કર્યું. તે જોવામાં ખૂબ જ સુંદર અને ભવ્ય છે અને દુનિયાભરમાંથી લોકો લાલ કિલ્લો જોવા માટે ભારત આવે છે.

3. હવા મહેલ- Hawa Mahal

આ પાંચ માળની ઇમારત મધપૂડા જેવી લાગે છે અને અસંખ્ય બારીઓ અને છિદ્રોને કારણે, તેની અંદર હંમેશા પવનની લહેર અવર જવર કરે છે. મહેલમાં હાજર આ અદ્ભુત વેન્ટિલેશનને કારણે તેને હવા મહેલ નામ આપવામાં આવ્યું, જેનો શાબ્દિક અર્થ પવનનો મહેલ થાય છે. જેને જોવા માટે દુનિયાભરમાંથી લોકો અહીં આવે છે.

4. આમેર પેલેસ- Amer Fort, Jaipur

જયપુરનો આમેર કિલ્લો તેની કલાત્મક શૈલીના તત્વો માટે જાણીતો છે. તેના વિશાળ રેમ્પાર્ટ્સ, દરવાજા અને પથ્થરના પગથિયાની શ્રેણી સાથે, કિલ્લો માઓટા તળાવની નજર રાખે છે, જે આમેર પેલેસ માટે પાણીનો મુખ્ય સ્ત્રોત છે. અહીં મોટી સંખ્યામાં વિદેશી પ્રવાસીઓ મુલાકાત લેવા આવે છે.

5. સુવર્ણ મંદિર -Golden Temple, Amritsar

અમૃતસરએ ઉત્તર-પશ્ચિમ ભારતના પંજાબ રાજ્યનું એક શહેર છે, જે પાકિસ્તાનની સરહદથી 28 કિલોમીટર દૂર છે. અમૃતસરની મધ્યમ સુવર્ણ મંદિર (હરમંદિર સાહિબ) શીખ ધર્મનું સૌથી પવિત્ર ગુરુદ્વારા છે. તે પવિત્ર અમૃત સરોવર તળાવથી ઘેરાયેલું છે, જ્યાં યાત્રાળુઓ સ્નાન કરે છે. તેથી, આ સ્થળને જોવા માટે લોકો દૂર-દૂરથી ભારતમાં આવે છે.

આ પણ જુઓ: ગુજરાતમાં પ્રવાસન વિભાગની હરણફાળ, ગિફ્ટસિટી ખાતે ફિલ્મફેર એવોર્ડમાં મ્યૂઝિક કોન્સર્ટની જમાવટ