ઇન્ટરનેશનલ ડેસ્કઃ અવકાશ અને વિજ્ઞાનની દુનિયા પોતાનામાં એક અજાયબી છે. ઘણી વખત આપણે અવકાશમાંથી કેટલીક એવી વસ્તુઓ વિશે જાણીએ છીએ, જેના વિશે જોઈને અને સાંભળીને દરેકને આશ્ચર્ય થાય છે. યુએસ સ્પેસ એજન્સી નાસાએ વિશ્વના સૌથી મોટા અને શક્તિશાળી જેમ્સ વેબ સ્પેસ ટેલિસ્કોપ દ્વારા ગેલેક્સીની આ પ્રકારની પ્રથમ તસવીર બતાવી છે, જે પહેલાં ક્યારેય જોવા મળી નથી. આ પ્રથમ વખત ગેલેક્સીનું રંગીન ચિત્ર દેખાયું હતું.
અમેરિકી રાષ્ટ્રપતિ જો બાઇડન ઉપરાષ્ટ્રપતિ કમલા હેરિસ સાથે આ તસ્વીરો સૌપ્રથમ નિહાળી હતી. હાલમાં આ તસવીર નાસા, યુરોપિયન સ્પેસ એજન્સી અને કેનેડિયન સ્પેસ એજન્સી દ્વારા જાહેર કરવામાં આવી છે. જેમાં અંતરીક્ષને ખૂબ જ બારીકાઈથી ક્લિક કરવામાં આવ્યું છે. તેમાં નાના કણો પણ જોઈ શકાય છે. તસવીર જાહેર કરતાં જો બાઈડને કહ્યું કે, આખા અમેરિકા અને માનવતા માટે આ સૌથી ઐતિહાસિક ક્ષણ છે.
જેમ્સ વેબ ટેલિસ્કોપને ગયા વર્ષે ડિસેમ્બરમાં લોન્ચ કરવામાં આવ્યું હતું. તે દરમિયાન વૈજ્ઞાનિકો જે અપેક્ષા રાખવામાં આવી હતી તે આ તસવીર સામે આવ્યા બાદ સાચી સાબિત થઈ છે. વૈજ્ઞાનિકોએ વેબ ટેલિસ્કોપની ઉંમર દસ વર્ષ હશે તેવું જણાવ્યું છે, પરંતુ તેઓ અપેક્ષા રાખે છે કે તે લગભગ 20 વર્ષ કામ કરશે. જેમ્સ વેબ ટેલિસ્કોપ અવકાશમાં લોન્ચ કરાયેલા સૌથી શક્તિશાળી ટેલિસ્કોપમાંનું એક છે.
નાસાના એડમિનિસ્ટ્રેટર બિલ નેલ્સને કહ્યું કે, અમે 13 અબજ વર્ષથી વધુ પાછળ જોઈ રહ્યા છીએ. તમે ચિત્રમાં જે પ્રકાશિત વસ્તુઓ જોઈ રહ્યા છો તે 13 અબજ વર્ષોથી આવી રીતે જ ચમકી રહી છે. ત્યારે NASAના ડેપ્યુટી એડમિનિસ્ટ્રેટર પામ મેલરોયના જણાવ્યા અનુસાર, નાસાના મિશનમાં 20 વર્ષ સુધી કામ કરવા માટે પૂરતી વધારાની ઇંધણ ક્ષમતા છે.
આ સાથે એવું પણ કહેવામાં આવ્યું હતું કે, આ તસવીરો સાથે વેબ સાયન્સ ઓપરેશનની સત્તાવાર શરૂઆત થઈ છે, જે આ મિશન હેઠળ સંશોધન કરવાનું ચાલુ રાખશે. ઉલ્લેખનીય છે કે, જેમ્સ વેબ ટેલિસ્કોપથી લેવામાં આવેલી તસવીર પર છેલ્લા 6 મહિનાથી પ્રક્રિયા ચાલી રહી હતી.
