IND vs AFG : ઈન્દોર T20 મેચમાં જીત સાથે ભારતનો સીરીઝ ઉપર કબજો

ઈન્દોર, 14જાન્યુઆરી : ભારતીય બેટ્સમેનોએ ઈન્દોરના મેદાન પર હંગામો મચાવ્યો અને અફઘાનિસ્તાનને કારમી હાર આપી હતી. ભારતીય ટીમે 3 મેચની T20 શ્રેણીની બીજી મેચમાં તેમને 6 વિકેટથી હરાવ્યું હતું. આ સાથે રોહિત શર્માની કપ્તાનીવાળી ભારતીય ટીમે શ્રેણી 2-0થી કબજે કરી લીધી છે. શ્રેણીની ત્રીજી અને છેલ્લી મેચ હવે 17 જાન્યુઆરીએ બેંગલુરુમાં રમાશે. જ્યારે પ્રથમ મેચ મોહાલીમાં યોજાઈ હતી, જેમાં ભારતીય ટીમે 6 વિકેટે જીત મેળવી હતી. બંને ટીમો વચ્ચે આ પ્રથમ દ્વિપક્ષીય T20 શ્રેણી રમાઈ રહી છે. આવી સ્થિતિમાં ભારતીય ટીમ પાસે હવે ક્લીન સ્વીપ કરવાની તક છે.

યશસ્વી અને શિવમની ફિફ્ટી

ઈન્દોરમાં રમાયેલી શ્રેણીની બીજી મેચમાં ભારતીય ટીમને 173 રનનો લક્ષ્યાંક મળ્યો હતો. જવાબમાં ભારતીય ટીમે માત્ર 15.4 ઓવરમાં 4 વિકેટ ગુમાવીને મેચ જીતી લીધી હતી. આ મેચના હીરો યશસ્વી જયસ્વાલ અને શિવમ દુબે હતા. યશસ્વીએ 27 બોલમાં ફિફ્ટી અને શિવમે 22 બોલમાં ફિફ્ટી ફટકારી હતી. મેચમાં યશસ્વીએ 34 બોલમાં 68 રનની શાનદાર ઇનિંગ રમી હતી. આ દરમિયાન તેણે 6 સિક્સર અને 5 ફોર ફટકારી હતી. જ્યારે શિવમે 32 બોલમાં 63 રનની અણનમ ઇનિંગ રમી હતી. આ દરમિયાન તેણે 4 સિક્સ અને 5 ફોર ફટકારી હતી. આ સિવાય વિરાટ કોહલીએ 29 રન બનાવ્યા હતા. અફઘાનિસ્તાન તરફથી કરીમ જનાતે 2 વિકેટ લીધી હતી.

ભારતીય ટીમની વિકેટ આ રીતે પડી

પ્રથમ વિકેટ: રોહિત શર્મા (0), વિકેટ- ફઝલહક ફારૂકી (5/1)
બીજી વિકેટ: વિરાટ કોહલી (29), વિકેટ- નવીન ઉલ હક (62/2)
ત્રીજી વિકેટ: યશસ્વી જયસ્વાલ (68), વિકેટ- કરીમ જનાત (154/3)
ચોથી વિકેટ: જીતેશ શર્મા (0), વિકેટ- કરીમ જનાત (156/4)

કેપ્ટન રોહિતે ધોનીની બરાબરી કરી

રોહિત શર્માની કેપ્ટન્સીમાં ભારતીય ટીમે આ મેચ જીતીને ઈતિહાસ રચ્યો છે. ભારતીય ટીમે પહેલા શ્રેણી 2-0થી કબજે કરી છે. પરંતુ આ જીત સાથે રોહિતે એક શાનદાર રેકોર્ડના મામલે પૂર્વ કેપ્ટન મહેન્દ્ર સિંહ ધોનીની બરાબરી પણ કરી લીધી છે. રોહિત શર્માની કેપ્ટન્સીમાં ભારતીય ટીમે અત્યાર સુધીમાં 41 T20 આંતરરાષ્ટ્રીય મેચ જીતી છે. આ રીતે તેણે ભારતીય કેપ્ટન તરીકે સૌથી વધુ T20 ઈન્ટરનેશનલ મેચ જીતવાના મામલે ધોની (41)ની બરાબરી કરી લીધી છે. હાલમાં અફઘાનિસ્તાનના અસગર અફઘાન, પાકિસ્તાનના બાબર આઝમ અને યુગાન્ડાના બ્રાયન મસાબાએ બરાબર 42 મેચ જીતી છે.