WhatsAppએ ભારતમાં 71 લાખથી વધુ WhatsApp એકાઉન્ટ બંધ કર્યા
02 જાન્યુઆરી 2024:WhatsAppએ ગયા વર્ષના નવેમ્બર મહિનામાં 71 લાખથી વધુ ભારતીય એકાઉન્ટ્સ પર પ્રતિબંધ મૂક્યો છે. કંપનીએ આઈટી નિયમો 2021 હેઠળ આ કાર્યવાહી કરી છે. આ નિયમ હેઠળ તમામ મોટી સોશિયલ મીડિયા કંપનીઓએ દર મહિને યુઝર સેફ્ટી રિપોર્ટ જાહેર કરવાનો રહેશે. આ ઉપરાંત ફરિયાદો અને તેમના પર કરવામાં આવેલી કાર્યવાહીનો પણ ઉલ્લેખ કરવાનો રહેશે. ગયા વર્ષે 1 નવેમ્બરથી 30 નવેમ્બરની વચ્ચે કંપનીએ ભારતમાં 71 લાખ 96,000 એકાઉન્ટ્સ પર પ્રતિબંધ મૂક્યો છે. તેમાંથી 19 લાખ 54,000 ખાતાઓને કંપનીએ પોતાની દેખરેખ હેઠળ કોઈપણ ફરિયાદ વિના પ્રતિબંધિત કરી દીધા છે.
નવેમ્બર મહિનામાં આટલી ફરિયાદો મળી
નવેમ્બર મહિનામાં WhatsAppને 8,841 ફરિયાદો મળી હતી, જેમાંથી કંપનીએ 6 વિરુદ્ધ કાર્યવાહી કરી હતી. દર મહિને કંપની યુઝર સેફ્ટી રિપોર્ટ જાહેર કરે છે. જો તમે WhatsAppના નિયમો અને શરતો અનુસાર તમારું એકાઉન્ટ ઓપરેટ કરતા નથી, તો તમારું એકાઉન્ટ પણ પ્રતિબંધિત થઈ શકે છે. જો તમે નગ્નતા, કૌભાંડ, છેતરપિંડી, ચોરી, દેશ વિરુદ્ધ કોઈપણ પ્રકારની પ્રવૃત્તિમાં સામેલ છો, તો કંપની કોઈપણ સમયે તમારા એકાઉન્ટને પ્રતિબંધિત કરી શકે છે.
WhatsApp યુઝર્સની સુરક્ષા માટે નવા ફીચર્સ જાહેર કર્યા
ગયા વર્ષે, WhatsAppએ યુઝર્સની સેફ્ટી માટે એપ્લિકેશનમાં ઘણા નવા ફીચર્સ ઉમેર્યા છે, જેમાં ચેટ લોક, ઈમેલ એડ્રેસ લિંક, પાસ કી વગેરેનો સમાવેશ થાય છે. જો તમે હજી સુધી તમારું ઈમેલ ID તમારા વોટ્સએપ એકાઉન્ટ સાથે લિંક નથી કર્યું, તો તેને ચોક્કસથી લિંક કરો. આમ કરવાથી તમે ઈમેલ દ્વારા પણ તમારા એકાઉન્ટમાં લોગીન કરી શકશો. આ ઉપરાંત, પાસકી પણ સેટ કરવાનું ભૂલશો નહીં. તે તમને ફિંગરપ્રિન્ટ દ્વારા તમારું એકાઉન્ટ ચકાસવાની મંજૂરી આપે છે જે એકાઉન્ટની સુરક્ષામાં વધારો કરે છે.
