Jio સેટેલાઇટ મારફતે પહોંચાડશે ઇન્ટરનેટ, ટૂંક સમયમાં સેવા થશે શરૂ

• ટૂંક સમયમાં Jio સતાવાર મંજૂરી મળતા આ સેવા કરી શકે છે શરૂ
• Jio અને સેટેલાઈટ કંપની SES સંયુક્ત રીતે આ સેવા પ્રદાન કરશે

નવી દિલ્હી, 2 જાન્યુઆરી : રિલાયન્સ જિયોને ટૂંક સમયમાં IN-SPACe તરફથી સેટેલાઇટ-આધારિત ઇન્ટરનેટની ગીગાબીટ ફાઇબર સેવાઓ માટે લેન્ડિંગ રાઇટ્સ અને માર્કેટ એક્સેસ માટેની મંજૂરી મળી શકે છે. Jio પ્લેટફોર્મ્સ અને લક્ઝમબર્ગ સ્થિત સેટેલાઇટ કંપની SES સંતુક્ત રૂટે સેટેલાઇટ મારફતે વપરાશકર્તાઓને બ્રોડબેન્ડ કનેક્ટિવિટી પ્રદાન કરશે.

તાજેતરમાં, આવા ઘણા વીડિયો વાયરલ થયા હતા, જેમાં એક તારા જેવી વસ્તુ આકાશમાં એક લાઇનમાં ફરતી જોવા મળી હતી. આ લાઇન જાણે તારાઓની ટ્રેન હોય એવું લાગતું હતું. વાસ્તવમાં આ એલોન માસ્કની સ્ટારલિંક કંપનીના ઉપગ્રહો હતા. સ્ટારલિંક આ ઉપગ્રહો દ્વારા ઇન્ટરનેટ સેવા પૂરી પાડે છે. ટૂંક સમયમાં જ રિલાયન્સ જિયો પણ ભારતમાં આવી જ સર્વિસ લાવી શકે છે. અહેવાલ અનુસાર, રિલાયન્સ જિયોને આ મહિને ઈન્ડિયન નેશનલ સ્પેસ પ્રમોશન એન્ડ ઓથોરાઈઝેશન સેન્ટર (IN-SPACE) તરફથી લેન્ડિંગ રાઈટ્સ અને માર્કેટ એક્સેસ માટે મંજૂરી મળી શકે છે. આ મંજૂરી પછી, મુકેશ અંબાણીની આગેવાની હેઠળની ટેલિકોમ કંપની ભારતમાં તેની સેટેલાઇટ આધારિત ગીગાબીટ ફાઇબર સેવાઓ શરૂ કરી શકશે.

મંજૂરી માટે જોવામાં આવી રહી છે રાહ

Jioએ તમામ જરૂરી દસ્તાવેજો સ્પેસ ઉદ્યોગના નિયમનકાર IN-SPACEને સબમિટ કર્યા છે. કંપનીને ટૂંક સમયમાં મંજૂરી મળવાની આશા છે. ભારતમાં વૈશ્વિક સેટેલાઇટ બેન્ડવિડ્થ કેપેસિટીને શરૂ કરવા માટે આ મંજૂરી ફરજિયાત છે. IN-SPACE માટે મંજૂરીની પ્રક્રિયા જટિલ છે. તેમાં ઘણા મંત્રાલયોની મંજૂરી અને સુરક્ષા મંજૂરીનો સમાવેશ થાય છે. IN-SPACEને મંજૂરી માટે ઘણી કંપનીઓ તરફથી અરજીઓ મળી છે.

Jio-SES સંયુક્ત રીતે આ સેવા પ્રદાન કરશે

ગયા વર્ષે, Jio પ્લેટફોર્મ્સ અને લક્ઝમબર્ગ સ્થિત સેટેલાઇટ કંપની SESએ સેટેલાઇટ દ્વારા બ્રોડબેન્ડ કનેક્ટિવિટી પ્રદાન કરવા માટે કંપનીમાં 51:49ના હિસ્સા સાથે સંયુક્ત સાહસની રચના કરી હતી. Eutelsat OneWeb, Elon Muskની Starlink, Amazon અને Tata આ સેક્ટરમાં આવી ચૂકી છે. Jioના સેટેલાઇટ આર્મને ટેલિકોમ્યુનિકેશન વિભાગ દ્વારા GMPCS લાઇસન્સ આપવામાં આવ્યું છે. પરંતુ હજુ સુધી IN-SPACE તરફથી મંજૂરી મળી નથી. ભારતી સમર્થિત Eutelsat OneWeb એકમાત્ર વૈશ્વિક ઉપગ્રહ નક્ષત્ર ઓપરેટર છે જેને IN-SPACe તરફથી જરૂરી મંજૂરીઓ મળી છે.

ભારતમાં ઊભરતું સેટેલાઇટ માર્કેટ

Jio-SES કોમ્બિનેશન અને Eutelsat OneWeb બંને ભારતના નવા સેટેલાઇટ માર્કેટમાં Starlink, Amazon અને Tata જેવી કંપનીઓને ટક્કર આપવાનો પ્રયાસ કરી રહ્યાં છે. Jioના ચેરમેન મેથ્યુ ઓમેને તાજેતરમાં જણાવ્યું હતું કે, “Jioનું સેટેલાઇટ સર્વિસ યુનિટ સ્પેક્ટ્રમ ફાળવણીના થોડા અઠવાડિયા પછી JioSpaceFiber સેવાઓ શરૂ કરી શકે છે.

2033 સુધીમાં અવકાશ અર્થતંત્ર 44 બિલિયન ડોલર સુધી પહોંચી શકે છે

IN-SPACEએ તાજેતરમાં અનુમાન લગાવ્યું હતું કે, ભારતની અવકાશ અર્થવ્યવસ્થા 2033 સુધીમાં 44 બિલિયન ડોલર સુધી પહોંચી શકે છે. તે જ સમયે, વૈશ્વિકમાં તેનો ફાળો વર્તમાન 2%થી વધીને 8% થઈ શકે છે. ભારતમાં ઉપગ્રહો દ્વારા આપવામાં આવતી બ્રોડબેન્ડ સેવાઓમાં મુખ્યત્વે એવા વિસ્તારોને લક્ષ્ય બનાવવામાં આવશે જે હાલમાં પરંપરાગત સ્થળીય બ્રોડબેન્ડ સોલ્યુશન્સ દ્વારા સેવામાં નથી. આમાં ગ્રામીણ અને દૂરના વિસ્તારોનો સમાવેશ થાય છે, જ્યાં હાઇ-સ્પીડ ઇન્ટરનેટની મર્યાદિત અથવા કોઈ ઍક્સેસ નથી.

આ પણ જુઓ :બ્લેક હૉલના ખુલશે રહસ્યો ! ISROએ નવા વર્ષે XPoSAT સેટેલાઈટ કર્યું લોન્ચ