વરુણ ધવન ફરી એકવાર દુલ્હો બનવા તૈયાર, ‘દુલ્હનિયાં-3’ ફાઈનલ!
- દુલ્હનિયાં ફ્રેન્ચાઇઝીના ત્રીજા ભાગમાં વરુણ ધવન ફરીથી દુલ્હાની ભૂમિકાને ભજવવા તૈયાર
- ફિલ્મ ‘દુલ્હનિયાં 3’ 2024ના અંત સુધીમાં ફ્લોર પર આવશે
મુંબઈ, 30 ડિસેમ્બર : વરુણ ધવન તેના શાનદાર અભિનય માટે જાણીતો છે. આ દિવસોમાં અભિનેતા તેની આગામી ફિલ્મ ‘વીડી 18’ના શૂટિંગમાં વ્યસ્ત છે. આ દરમિયાન વરુણ ધવનના ફેન્સ માટે વધુ એક સારા સમાચાર આવ્યા છે. મળતી માહિતી મુજબ, વરુણ ધવન ફરી એકવાર દુલ્હો બનવા જઈ રહ્યો છે. પરંતુ રિયલ લાઈફમાં નહીં પણ રીલ લાઈફમાં. હા, એવા અહેવાલો છે કે ‘હમ્પ્ટી શર્મા કી દુલ્હનિયાં’ અને ‘બદ્રીનાથ કી દુલ્હનિયાં’ની સફળતા બાદ, વરુણ ધવન ફ્રેન્ચાઇઝીના ત્રીજા ભાગમાં ફરીથી દુલ્હાની ભૂમિકા ભજવવા તૈયાર છે. વરુણ ધવન સ્ટારર ફિલ્મ ‘દુલ્હનિયાં 3’ 2024ના અંત સુધીમાં ફ્લોર પર આવશે. શશાંક ખૈતાન દ્વારા નિર્દેશિત આ ફિલ્મની લાંબા સમયથી રાહ જોવાઈ રહી હતી. અંતે, હવે આ ફિલ્મની સ્ટોરી ફાઇનલ થઈ ગઈ હોવાનું જાણવા મળ્યું છે, જેને સાંભળ્યા પછી ચાહકો ઘણા ખુશ દેખાઈ રહ્યા છે.
‘દુલ્હનિયાં 3’નું શૂટિંગ ક્યારે શરૂ થશે?
અહેવાલો અનુસાર, વરુણ ધવન સ્ટારર ફિલ્મ ‘દુલ્હનિયાં 3’નું શૂટિંગ 2024ના અંતમાં શરૂ થવા જઈ રહ્યું છે. વરુણ, શશાંક અને કરણ જોહરે ‘દુલ્હનિયાં 3’ માટે ઘણા વિચારો પર ચર્ચા કરી અને અંતે એકમત થયા છે. આ ફિલ્મ 2024ના અંત સુધીમાં ફ્લોર પર જવા માટે તૈયાર છે. ઉલ્લેખનીય છે કે, ધર્મા પ્રોડક્શનના બેનર હેઠળ બનેલી ફિલ્મ ‘હમ્પ્ટી શર્મા કી દુલ્હનિયાં’ વર્ષ 2014ની સફળ ફિલ્મોમાંથી એક હતી. કોમેડીથી ભરપૂર આ રોમેન્ટિક ફિલ્મમાં આલિયા ભટ્ટ અને વરુણ ધવનની કેમેસ્ટ્રીને ચાહકોએ ખૂબ વખાણી હતી. આ ફિલ્મની સફળતા પછી, તેનો બીજો હપ્તો વર્ષ 2017માં આવ્યો, જેમાં આલિયા અને વરુણની જોડી ફરી જોવા મળી. આ ફિલ્મને પણ ઘણો પ્રેમ મળ્યો. હવે આખરે આ ફિલ્મના ત્રીજા ભાગનું શૂટિંગ શરૂ થવાનું માનવામાં આવી રહ્યું છે. કરણ જોહર પણ તેના સ્ટુડન્ટ સાથે દુલ્હનિયા ટ્રાયોલોજી પૂર્ણ કરવા માટે ખૂબ જ ઉત્સાહિત છે.
કરણ જોહરે તેના ઈન્સ્ટાગ્રામ લાઈવ સેશનમાં ફેન્સના સવાલનો જવાબ આપતા કહ્યું હતું કે, “દુલ્હનિયાં એક શાનદાર ફ્રેન્ચાઈઝી છે. આ અમારી પ્રીમિયર ફ્રેન્ચાઇઝીઓમાંથી એક છે, જે પ્રેમ અને લાગણીઓથી ભરેલી છે. પ્રેમમાં બે લોકો સાથે લાગણીઓ અને કોમેડીનું મિશ્રણ દર્શકોનું સંપૂર્ણ મનોરંજન કરશે. અમે એક રસપ્રદ વાર્તા સાથે દુલ્હનિયાં ફ્રેન્ચાઈઝીને પરત લાવવાની આશા રાખીએ છીએ.”
વરુણ ધવનની કામગીરી
વરુણ ધવનની કામગીરીની વાત કરીએ તો, તે છેલ્લે નિતેશ તિવારીની રોમેન્ટિક ડ્રામા ફિલ્મ ‘બવાલ’માં જોવા મળ્યો હતો. આ ફિલ્મમાં તેની સાથે જ્હાન્વી કપૂર જોવા મળી હતી. વરુણના આગામી પ્રોજેક્ટ વિશે વાત કરીએ તો, તે VD18માં વામિકા ગબ્બી તેમજ વેબ સિરીઝ “સિટાડેલ ઇન્ડિયા”માં રાજ અને ડિકે સાથે જોવા મળશે. વરુણના આ તમામ પ્રોજેક્ટની રિલીઝની ચાહકો આતુરતાથી રાહ જોઈ રહ્યા છે.
