અયોધ્યા રામ મંદિરમાં રામલલ્લાના પ્રાણ-પ્રતિષ્ઠા મહોત્સવ પહેલા શું-શું થશે?

• રામ લલ્લાના પ્રાણ-પ્રતિષ્ઠા મહોત્સવની તૈયારીઓ અંતિમ તબક્કામાં
• વડાપ્રધાન નરેન્દ્ર મોદી શનિવારે 30 ડિસેમ્બરે આવશે રામનગરી
• PMના આગમન પહેલા CM યોગી આદિત્યનાથ આજે આયોધ્યાની મુલાકાતે

અયોધ્યા, 29 ડિસેમ્બર : અયોધ્યામાં રામલલ્લાના પ્રાણ-પ્રતિષ્ઠા મહોત્સવની તૈયારીઓ અંતિમ તબક્કામાં છે. વડાપ્રધાન નરેન્દ્ર મોદી શનિવારે 30 ડિસેમ્બરે રામનગરી આવી રહ્યા છે. આ દિવસે તેઓ એરપોર્ટ સહિત અનેક વિકાસ કાર્યોનું ઉદ્ઘાટન કરશે. આ પછી 22 જાન્યુઆરીએ રામ મંદિરમાં પ્રાણ પ્રતિષ્ઠા કરવામાં આવશે. જોકે, પ્રાણ પ્રતિષ્ઠા સંબંધિત કાર્યક્રમો 16 જાન્યુઆરીથી જ શરૂ થશે. 16 જાન્યુઆરીથી શરૂ થનારા આ કાર્યક્રમ 22 જાન્યુઆરી સુધી ચાલશે. આ તમામ કાર્યક્રમો શ્રી રામ જન્મભૂમિ તીર્થ ક્ષેત્રની દેખરેખ હેઠળ હાથ ધરવામાં આવશે.

શનિવારે પીએમ મોદીની મુલાકાત પહેલા મુખ્યમંત્રી યોગી આદિત્યનાથ આજે અયોધ્યા પહોંચી રહ્યા છે. પ્રાપ્ત માહિતી અનુસાર, સીએમ યોગી અયોધ્યામાં પહેલા હનુમાનગઢી અને રામ જન્મભૂમિ મંદિરમાં દર્શન અને પૂજા કરશે, ત્યારબાદ અધિકારીઓ સાથે સમીક્ષા બેઠક કરશે. સીએમ યોગી અયોધ્યાધામ રેલવે સ્ટેશન, શ્રી રામ એરપોર્ટ અને જાહેર સભા સ્થળનું નિરીક્ષણ કરશે. આ ઉપરાંત તેઓ વડાપ્રધાનના રોડ શોના રૂટનું પણ નિરીક્ષણ કરશે.

16 જાન્યુઆરીથી શરૂ થશે કાર્યક્રમો

મળતી માહિતી અનુસાર, 16 જાન્યુઆરીએ મંદિર ટ્રસ્ટ દ્વારા નિયુક્ત યજમાન શ્રી રામ જન્મભૂમિ તીર્થ ક્ષેત્ર પ્રાયશ્ચિત સમારોહનું સંચાલન કરશે. સૌ પ્રથમ, સરયુ નદીના કિનારે ‘દશવિધ’ સ્નાન, વિષ્ણુ પૂજા અને ગાયોને પ્રસાદ અર્પણ કરવામાં આવશે. આ બાદ, 17 જાન્યુઆરીએ ભગવાન રામ (રામ લલ્લા) ના બાળ સ્વરૂપની મૂર્તિને લઈને એક શોભાયાત્રા અયોધ્યા પહોંચશે. મંગલ કલશમાં સરયુ જળ લઈને ભક્તો રામ જન્મભૂમિ મંદિર પહોંચશે.

20 જાન્યુઆરીએ ગર્ભગૃહને સરયૂના પાણીથી ધોવામાં આવશે

ત્યારબાદ 18 જાન્યુઆરીએ ગણેશ અંબિકા પૂજા, વરુણ પૂજા, માતૃકા પૂજા, બ્રાહ્મણ વરણ અને વાસ્તુ પૂજા સાથે ઔપચારિક વિધિ શરૂ થશે. બીજા દિવસે એટલે કે 19 જાન્યુઆરીએ પવિત્ર અગ્નિ પ્રગટાવવામાં આવશે. આ બાદ ‘નવગ્રહ’ની સ્થાપના કરવામાં આવશે અને હવન કરવામાં આવશે. 20 જાન્યુઆરીએ રામજન્મભૂમિ મંદિરના ગર્ભગૃહને સરયૂ નદીના પાણીથી ધોવામાં આવશે, ત્યારબાદ વાસ્તુ શાંતિ અને ‘અન્નધિવાસ’ વિધિ થશે.

પ્રાણ-પ્રતિષ્ઠા મહોત્સવ 22મી જાન્યુઆરીએ થશે

21 જાન્યુઆરીએ રામલલ્લાની મૂર્તિને 125 કલશથી સ્નાન કરાવવામાં આવશે અને અંતે ભગવાન રામની મૂર્તિને સ્થાપિત કરવામાં આવશે. અંતિમ દિવસે 22 જાન્યુઆરીએ સવારની પૂજા બાદ બપોરે ‘મૃગશિરા નક્ષત્ર’માં રામલલ્લાની મૂર્તિની પ્રાણપ્રતિષ્ઠા કરવામાં આવશે જેમાં વડાપ્રધાન નરેન્દ્ર મોદી ભાગ લેશે.

આ પણ જુઓ :અબુધાબીમાં પ્રથમ ભવ્ય હિન્દૂ મંદિરનું PM મોદી કરશે ઉદ્ઘાટન