નેશનલ ડેસ્કઃ કેન્દ્રીય ગૃહ પ્રધાન અમિત શાહે જયપુરની તેમની એક દિવસીય મુલાકાત દરમિયાન રાજસ્થાન ભાજપના નેતાઓને જૂથવાદથી દૂર રહીને એકતા રહેવાની સલાહ આપી છે. સીએમ ચહેરા માટે ચાલી રહેલી ખેંચતાણ વચ્ચે અમિત શાહે સ્પષ્ટ કર્યું કે, રાજ્યના ચહેરાના આધારે ચૂંટણી લડવામાં આવશે નહીં. વિધાનસભા ચૂંટણી 2023માં પીએમ મોદી એકમાત્ર ચહેરો હશે.
શનિવારે જયપુરમાં ઉત્તરીય ઝોનલ કાઉન્સિલની 30મી બેઠકમાં ભાગ લીધા બાદ અમિત શાહે પાર્ટી કાર્યાલય જઈને ભાજપના નેતાઓ સાથે બેઠક કરી હતી. આ બેઠકમાં પૂર્વ સીએમ વસુંધરા રાજે સિંધિયા, ભાજપના પ્રદેશ અધ્યક્ષ સતીશ પુનિયા, વિપક્ષના ઉપનેતા રાજેન્દ્ર રાઠોડ, પ્રદેશ પ્રભારી અરુણ સિંહ અને ચંદ્રશેખર હાજર હતા. અમિત શાહે રાજ્ય ભાજપમાં ચાલી રહેલી આંતરકલહને રોકવા માટે એકતાનો સંદેશ આપ્યો હતો. સૂત્રોના જણાવ્યા પ્રમાણે અમિત શાહે તમામ નેતાઓને અનુશાસન સાથે કામ કરવા કહ્યું હતું. પક્ષ વિરોધી પ્રવૃત્તિ કોઈપણ ભોગે સાંખી લેવામાં આવશે નહીં.
અમિત શાહે એકતાનો સંદેશ આપ્યો
અમિત શાહે કોઈપણ નેતાનું નામ લીધા વિના જૂથવાદને રોકવા અને પક્ષના કાર્યક્રમો અને આંદોલનોમાં કોંગ્રેસ સામે એક થઈને કામ કરવાની સૂચના આપી હતી. અમિત શાહે કહ્યું કે, મોદી સરકારની લોકનીતિઓને રાજસ્થાનના લોકો વચ્ચે લઈ જવી પડશે. ઉલ્લેખનીય છે કે રાજસ્થાન વિધાનસભાની ચૂંટણી 2023ના અંતમાં યોજાવા જઈ રહી છે, પરંતુ ચૂંટણી પહેલા રાજ્યના ભાજપના નેતાઓ વચ્ચે સીએમ ચહેરાને લઈને ટક્કર ચાલી રહી છે. પાર્ટી જુદા જુદા જૂથોમાં વહેંચાયેલી છે. રાષ્ટ્રીય અધ્યક્ષ જેપી નડ્ડાની ચેતવણી છતાં જૂથવાદ પર અંકુશ આવી રહ્યો નથી. જો કે પ્રદેશ ભાજપ અધ્યક્ષ સતીશ પુનિયા કોઈપણ જૂથવાદને નકારે છે.
રાજસ્થાન ભાજપમાં આંતરિક વિખવાદ
રાજસ્થાન ભાજપમાં આંતરિક વિખવાદ જોર પકડ્યો છે. પાર્ટીનો એક વર્ગ વસુંધરા રાજેને મુખ્યમંત્રી બનાવવાની માંગ કરવા માટે કેન્દ્રીય નેતૃત્વ પર સતત દબાણ કરી રહ્યો છે. રાષ્ટ્રીય નેતૃત્વએ સીએમ ચહેરા અંગે પોતાનું વલણ સ્પષ્ટ કર્યું છે કે, ચૂંટણી પીએમ મોદીના ચહેરા અને પાર્ટીના ચૂંટણી ચિન્હ કમળ પર લડવામાં આવશે.
કોટામાં તાજેતરમાં યોજાયેલી રાજ્ય કાર્યકારી સમિતિની બેઠકમાં પક્ષનો જૂથવાદ સામે આવ્યો હતો. વસુંધરા તરફી રહેલા પૂર્વ ધારાસભ્યને બેઠકમાં જવા દેવામાં આવ્યા ન હતા. જ્યારે વસુંધરા રાજેના અંગત સ્ટાફ સાથે ઝપાઝપી થઈ હતી. આનાથી નારાજ પૂર્વ સીએમ અધવચ્ચે જ બેઠક છોડીને ચાલ્યા ગયા હતા.
