વિપક્ષી પાર્ટીઓ માટે સૌથી મોટો પડકાર INDIA ગઠબંધન માટે એક મુખ્ય સકારાત્મક એજન્ડા સાથે આવવાનો છે જે તેને ભાજપનો સામનો કરવામાં મદદ કરશે. રાષ્ટ્રીય રાજધાની દિલ્હીમાં વિરોધ પક્ષોના ગઠબંધનની આગામી બેઠકમાં બેઠકોની વહેંચણી અને સંયુક્ત રેલીઓ યોજવા અંગે ચર્ચા કરવામાં આવશે. કોંગ્રેસના વરિષ્ઠ નેતાએ જયરામ રમેશે રવિવારે આ વાત કરી હતી.
વધુમાં તેમણે કહ્યું કે વિપક્ષી પાર્ટીઓ 19 ડિસેમ્બરે યોજાનારી બેઠકમાં વડાપ્રધાન નરેન્દ્ર મોદીના જવાબમાં ‘હું નહીં, અમે’ એકતાની થીમ સાથે આગળ વધવા માંગે છે. આ બેઠક તાજેતરમાં પૂર્ણ થયેલી વિધાનસભાની ચૂંટણીમાં કોંગ્રેસના ખરાબ પ્રદર્શનની પૃષ્ઠભૂમિમાં થઈ રહી છે. રાજસ્થાન, છત્તીસગઢ અને મધ્યપ્રદેશમાં પાર્ટીને હારનો સામનો કરવો પડ્યો હતો. દરમિયાન ભાજપનું કહેવું છે કે લોકોએ મોદીની ગેરંટી પર વિશ્વાસ વ્યક્ત કર્યો છે અને તેઓ 2024માં તેમની સરકારને ફરીથી ચૂંટશે.
કોંગ્રેસના વરિષ્ઠ નેતાએ કહ્યું કે વિરોધ પક્ષો સમક્ષ હવે આગામી સામાન્ય ચૂંટણીઓમાં ભાજપનો સામનો કરવા માટે વૈકલ્પિક સકારાત્મક એજન્ડા સાથે આવવાનો પડકાર છે. સૂત્રોએ જણાવ્યું હતું કે બેઠક દરમિયાન, પક્ષો સંયુક્ત ચૂંટણી રેલીઓનું આયોજન કરવા અને તેમના માટે એક સામાન્ય કાર્યક્રમ તૈયાર કરવા માટે બેઠકોની વહેંચણી પર એક યોજના ઘડશે. જ્ઞાતિની વસ્તી ગણતરી અને વિરોધ પક્ષો દ્વારા ઉઠાવવામાં આવેલી જૂની પેન્શન યોજનાને પુનઃસ્થાપિત કરવા જેવા ચૂંટણી મુદ્દાઓ પર નેતાએ કહ્યું, ‘આ ચૂંટણી પરિણામો આ ચૂંટણી પ્રચાર દરમિયાન ઉઠાવવામાં આવેલા મુદ્દાઓને નકારવા સમાન નથી.’
જો કે, તેમણે સ્વીકાર્યું કે પાર્ટી 2024 માં ભાજપને ટક્કર આપવા માટે બોક્સની બહાર વિચારશે. ‘મૈં નહીં, હમ’ (અમે, હું નહીં) એ સંભવિત સૂત્ર છે જેના પર વિરોધ પક્ષો મોદીનો સામનો કરવા માટે કામ કરશે, એમ તેમણે કહ્યું હતું. સૂત્રોનું કહેવું છે કે વિપક્ષી ગઠબંધન જાતિની વસ્તી ગણતરી, MSPની કાયદાકીય ગેરંટી અને કામદારો માટે સામાજિક સુરક્ષાના મુદ્દાઓને આગળ ધપાવી શકે છે.
