અદાણીને હિંડનબર્ગ કેસમાં અમેરિકાની ક્લિનચીટ મળી

• અદાણી ગ્રુપને હિંડનબર્ગ કેસમાં અમેરિકા તરફથી ક્લીનચીટ આપવામાં આવી છે
• DFCએ અદાણી પર લાગેલા આરોપોને ખોટા ગણાવ્યા અને 4600 કરોડની લોન આપી
• ક્લિનચીટ મળતાંની સાથે જ અદાણી ગ્રુપની વિવિધ કંપનીઓના શેરમાં ઉછાળો જોવા મળ્યો

નવી દિલ્હી, 05 ડિસેમ્બર: ગૌતમ અદાણીના નેતૃત્વમાં અદાણી ગ્રૂપની વિવિધ કંપનીઓના શેરમાં ઉછાળો જોવા મળી રહ્યો છે. અદાણી પાવર 6 ટકાથી વધુ વધીને રૂ. 495 પર ટ્રેડ કરી રહ્યો છે. એ જ રીતે અદાણી ગ્રીન 17 ટકાથી વધુના ઉછાળા સાથે રૂ. 1325ની નજીક પહોંચી ગયો છે. અદાણી વિલ્મરના શેરમાં લગભગ 7 ટકાનો વધારો થયો છે. અદાણીના શેરમાં ઉછાળાનું કારણ અમેરિકા દ્વારા તેને આપવામાં આવેલી ક્લીનચીટ અને લોનને જવાબદાર ગણવામાં આવી રહ્યું છે. અમેરિકાના ઈન્ટરનેશનલ ડેવલપમેન્ટ ફાઈનાન્સ કોર્પોરેશન (DFC)એ અદાણી સામેના આરોપોને ખોટા ગણાવ્યા છે.

DFCએ અદાણી ગ્રુપને 4600 કરોડની લોન આપી

DFC એ શ્રીલંકામાં કન્ટેનર ટર્મિનલ બનાવવા માટે અદાણીને $553 મિલિયન એટલે કે રૂ. 4600 કરોડથી વધુની લોન આપી છે. લોન આપતા પહેલા, DFCએ કહ્યું છે કે તેમણે શોર્ટ સેલર ફર્મ હિંડનબર્ગના આરોપોની તપાસ કરી છે અને તે ખોટા હોવાનું જણાયું છે. હિંડનબર્ગે આક્ષેપ કર્યો હતો કે અદાણી કોર્પોરેટ ઇતિહાસમાં સૌથી મોટી છેતરપિંડી કરી રહી છે. DFCએ કહ્યું છે કે આ આરોપો અદાણી પોર્ટ્સ અને સ્પેસ ઇકોનોમિક ઝોન લિમિટેડ પર લાગુ પડતા નથી. આ કંપનીની પેટાકંપની શ્રીલંકામાં કન્ટેનર ટર્મિનલ બનાવી રહી છે. ડીએફસીએ તપાસ બાદ જ અદાણીને લોન આપી છે. જોકે, DFCએ લોનની શરતો અંગે કોઈ માહિતી આપી નથી. પરંતુ DFCએ કહ્યું છે કે તે અદાણીની કંપની પર દેખરેખ રાખશે.

અદાણી પોર્ટ્સના શેરની સ્થિતિ

અદાણી પોર્ટ્સ અને સ્પેશિયલ ઈકોનોમિક ઝોનના શેરમાં જબરદસ્ત વધારો થયો છે. સમાચાર લખાયા ત્યાં સુધી તેનો શેર 9 ટકાથી વધુના વધારા સાથે રૂ. 958ની આસપાસ ટ્રેડ કરી રહ્યો છે. છેલ્લા એક સપ્તાહમાં આ શેરોએ લગભગ 20 ટકા અથવા પ્રતિ શેર 160 રૂપિયાનું વળતર આપ્યું છે. અદાણી ગ્રુપના શેરમાં થયેલા વધારાને કારણે છેલ્લા 6 દિવસમાં ગૌતમ અદાણીની નેટવર્થમાં રૂ. 46663 કરોડનો વધારો થયો છે. નોંધનીય છે કે હિંડનબર્ગના આરોપો બાદ અદાણી ગ્રૂપની કંપનીઓના માર્કેટ વેલ્યુમાં 100 અબજ ડોલરનો ઘટાડો થયો હતો.

આ પણ વાંચો: મ્યુઝિક સ્ટ્રીમિંગ પ્લેટફોર્મ Spotify 1500 કર્મચારીઓ છુટા કરશે