રૂ.2000ની 9760 કરોડના મૂલ્યની નોટ પરત આવવાની રાહ જોઈ રહી છે RBI

• 19મે 2023 સુધી બજારમાં રૂ. 3.56 લાખ કરોડના મૂલ્યની 2000ની નોટો હતી ચલણમાં 

નવી દિલ્હી, 1 ડિસેમ્બર : ભારતીય રિઝર્વ બેંક હજુ પણ રૂ. 9760 કરોડના મૂલ્યની રૂ. 2000ની નોટ પરત કરવાની રાહ જોઈ રહી છે. શુક્રવારના રોજ સેન્ટ્રલ બેંકે 30 નવેમ્બર 2023 સુધી આ મામલે ડેટા જાહેર કરતી વખતે કહ્યું કે, 19મે 2023 સુધી બજારમાં 3.56 લાખ કરોડ રૂપિયાના મૂલ્યની 2000 રૂપિયાની નોટો ચલણમાં હતી. મે 2023માં, ભારતીય રિઝર્વ બેંકે બેંકોને તાત્કાલિક અસરથી રૂપિયા 2000ના મૂલ્યની બેંક નોટ જારી કરવાનું બંધ કરવાની સલાહ આપી હતી. આ દર્શાવે છે કે મોટી સંખ્યામાં લોકોએ હજુ સુધી બેંકો અથવા RBIમાંથી રૂ. 2,000ની નોટો બદલી નથી. જો કે, RBIએ ફરી એકવાર પુનરોચ્ચાર કર્યો છે કે રૂ. 2000ની નોટ લીગલ ટેન્ડર રહેશે. 2000 રૂપિયાની નોટ નવેમ્બર 2016માં રજૂ કરવામાં આવી હતી. RBIએ 19-મે 2023ના રોજ આ નોટને ચલણમાંથી પાછી ખેંચવાની જાહેરાત કરી હતી.

Withdrawal of ₹2000 Denomination Banknotes – Statushttps://t.co/XrEH5skquL

— ReserveBankOfIndia (@RBI) December 1, 2023

7 ઓક્ટોબર 2023 સુધી બેંકોમાં જમા અથવા વિનિમય કરી શકાશે

RBIએ તેની રજૂઆતમાં જણાવ્યું છે કે, શરૂઆતમાં બેંકોમાં 2000 રૂપિયાની નોટો બદલવા અથવા જમા કરાવવાની અંતિમ તારીખ 30 સપ્ટેમ્બર 2023 હતી, જે બાદમાં 7 ઓક્ટોબર 2023 સુધી લંબાવી દેવામાં આવી હતી. આ પછી, લોકોને RBIની પ્રાદેશિક કચેરીઓમાં 2000 રૂપિયાની નોટ જમા કરાવવા અથવા બદલવા માટે કહેવામાં આવ્યું. પરંતુ તેમ છતાં મોટી સંખ્યામાં આ નોટો હજુ પરત આવી નથી.

આ સમયે 2000 રૂપિયાની નોટની કુલ કિંમત તેની ટોચ પર હતી

RBIના જણાવ્યા અનુસાર, માર્ચ 2017 પહેલા રૂ.2,000ના મૂલ્યની બેંકનોટમાંથી લગભગ 89% જારી કરવામાં આવી હતી. ચલણમાં રહેલી આ બેંક નોટોનું કુલ મૂલ્ય 31 માર્ચ, 2018ના રોજ તેની ટોચ પરના 6.73 લાખ કરોડ રૂપિયાથી ઘટીને 31 માર્ચ, 2023ના રોજ 3.62 લાખ કરોડ રૂપિયા થઈ ગયું હતું, જે ચલણમાં રહેલી નોટોના માત્ર 10.8 ટકા છે. RBIને એ પણ જાણવા મળ્યું કે, આ નોટનો સામાન્ય રીતે વ્યવહારો માટે ઉપયોગ થતો નથી. વધુમાં, અન્ય મૂલ્યોની બેંક નોટોનો સ્ટોક લોકોની ચલણી જરૂરિયાતોને પહોંચી વળવા માટે પૂરતો રહે છે.

આ પણ જુઓ :નિરાશ ન થશો, 2000ની ચલણી નોટ RBI હજુ સ્વીકારે છે