રેમન્ડના સિંઘાનિયા પરિવારનો વિખવાદઃ પુત્રને બિઝનેસ સોંપવા બદલ પિતાએ કર્યો પસ્તાવો

• વિજયપત સિંઘાનિયાએ પુત્ર ગૌતમને કારોબાર સોંપવાની ભૂલ કરી હોવાનું સ્વીકાર્યું
• દિગ્ગજ ઉદ્યોગપતિ વિજયપત સિંઘાનિયાએ નવાઝ મોદી અંગે કરી વાત
• મને રસ્તા પર જોઈને પુત્ર ગૌતમને આનંદ થાય છે : વિજયપત સિંઘાનિયા

મુંબઈ, 24 નવેમ્બર : રેમન્ડ ગ્રૂપના માલિક ગૌતમ સિંઘાનિયા અને તેમની પત્ની નવાઝ મોદી સિંઘાનિયા વચ્ચે ચાલી રહેલા છૂટાછેડાના વિવાદમાં પિતા અને દિગ્ગજ ઉદ્યોગપતિ વિજયપત સિંઘાનિયાએ પણ પ્રવેશ કર્યો છે અને તેમણે તેમના પુત્ર ગૌતમ સિંઘાનિયા પર ઉગ્ર નિશાન સાધ્યું છે. રેમન્ડને નાની કંપનીમાંથી વૈશ્વિક બ્રાન્ડમાં પરિવર્તિત કરનાર વિજયપત સિંઘાનિયાએ પુત્ર ગૌતમને કારોબાર સોંપવાની ભૂલ કરી હોવાનું સ્વીકાર્યું હતું અને કહ્યું કે, ‘મને રસ્તા પર જોઈને ગૌતમને આનંદ થાય છે.’

મારા પુત્રને બધું આપીને મેં મોટી ભૂલ કરી : વિજયપત સિંઘાનિયા

બિઝનેસ ટુડેના ઇન્ટરવ્યૂમાં રેમન્ડના CMD વિજયપત સિંઘાનિયાએ કહ્યું કે, ગૌતમ સિંઘાનિયા મને રસ્તા પર જોઈને ખુશ થશે.” વર્ષ 2015માં તેમણે રેમન્ડની બાગડોર તેમના પુત્ર ગૌતમને સોંપી હતી, આ નિર્ણય અંગે પણ વિજયપત સિંઘાનિયાએ કહ્યું હતું કે, તેમણે તેમના પુત્રને બધું આપીને મૂર્ખામીભરી ભૂલ કરી છે.  સિનિયર સિંઘાનિયાએ કહ્યું કે, કોઈ પિતાઓ પોતાનો સંપૂર્ણ બિઝનેસ પુત્રને સોંપી દેવો ન જોઈએ. તેમણે ગૌતમ સિંઘાનિયા અને તેમની પત્ની નવાઝ મોદીના છૂટાછેડા મુદ્દે આ વાત કહી હતી.

માતા-પિતાઓને આપી મહાન અને મહત્વપૂર્ણ સલાહ

વિજયપત સિંઘાનિયાએ વધુમાં કહ્યું કે, તેણે પોતાના પુત્રને બધું આપીને મોટી ભૂલ કરી છે. જે માતા-પિતા પોતાના બાળકોને બધું જ આપે છે તેઓએ પહેલા ખૂબ જ કાળજીપૂર્વક વિચારવું જોઈએ. હાલમાં, પત્ની નવાઝ મોદી સાથેના વિવાદને કારણે લાઈમલાઈટમાં આવેલા ગૌતમ સિંઘાનિયા, 2017માં તેમના પિતા વિજયપત સિંઘાનિયાને દક્ષિણ મુંબઈના રેમન્ડ હાઉસ અથવા જેકે હાઉસમાંથી હાંકી કાઢવાના આરોપોને કારણે ચર્ચામાં રહ્યા હતા. આ ઘરમાં આયોજિત દિવાળી પાર્ટી દરમિયાન ગત 13 નવેમ્બરે ગૌતમ સિંઘાનિયાએ સોશિયલ મીડિયા પર તેમના પત્ની નવાઝ સાથેના 32 વર્ષ જૂના દામપત્ય જીવનના અંતની જાહેરાત કરી હતી.

પુત્રના કારણે હું રસ્તા પર આવી ગયો : વિજયપત સિંઘાનિયા

વિજયપત સિંઘાનિયાએ તેમની સાથે બનેલી ઘટનાનું વર્ણન કરતાં કહ્યું હતું કે, તેમના પુત્ર દ્વારા બરતરફ કર્યા પછી, તેમની પાસે કોઈ વ્યવસાય નથી. ગૌતમ કંપનીના કેટલાક શેર આપવા માટે સંમત થયા હતા, પરંતુ પછીથી તેણે પણ પીછેહઠ કરી લીધી હતી. “મેં તેને બધું આપ્યું, પરંતુ ભૂલથી મારી પાસે થોડા પૈસા બચી ગયા જેના પર હું જીવતો છું. હું આજે બચી ગયો છું, નહીંતર હું રસ્તા પર હોત.” ગૌતમ અને નવાઝ મુદ્દા અંગે તેણે કહ્યું કે, “મને ખાતરી છે કે જો તે તેના પિતાને બહાર કાઢી શકે છે, તો તે તેની પત્નીને પણ તે જ રીતે ફેંકી શકે છે, મને ખબર નથી કે તે શું છે.”

વિજયપત સિંઘાનિયાએ પ્રોપર્ટીમાં 75% હિસ્સા પર શું કહ્યું?

આશરે રૂ. 11,000 કરોડની સંપત્તિના માલિક ગૌતમ સિંઘાનિયાની પત્ની નવાઝ મોદીએ છૂટાછેડાના બદલામાં પોતાની અને તેની બે પુત્રીઓ નિહારિકા-નીસા માટે મિલકતનો 75 ટકા હિસ્સો માંગ્યો હતો. બીજા જ દિવસે, તેણે ગૌતમ સિંઘાનિયા પર તેની અને તેની પુત્રી પર હુમલો કરવાનો આરોપ પણ લગાવ્યો હતો. નવાઝ મોદીએ છૂટાછેડાના બદલામાં ગૌતમ સિંઘાનિયા પાસેથી પ્રોપર્ટીમાં 75% હિસ્સો માંગ્યો તે અંગે વિજયપત સિંઘાનિયાએ કહ્યું કે, “હિંદુ મેરેજ એક્ટ હેઠળ, અલગ થવાના કિસ્સામાં, પતિનો 50% હિસ્સો આપોઆપ પત્નીને મળી જાય છે, આવી સ્થિતિમાં, નવાઝને આ માટે લડવાની જરૂર નહીં પડે, એક સામાન્ય વકીલ પણ તેને આ માટે તેનો હક મેળવી શકે છે.” જો કે, તેણે કહ્યું કે, “ગૌતમ ક્યારેય હાર માનવાનો નથી, કારણ કે તેનું સૂત્ર છે ‘બધાને ખરીદો અને બધું ખરીદો’. આ તેણે મારી સાથે કર્યું.”

આ પણ જાણો :GPay અને Paytm વાપરવું થયું મોંઘુ, હવે ચૂકવવો પડશે ચાર્જ