બિહારમાં 75 ટકા અનામત લાગુ, નીતીશ સરકારે જાહેરનામું બહાર પાડ્યું

• બિહારના રાજ્યપાલ રાજેન્દ્ર આર્લેકરે અનામતનો વ્યાપ વધારીને 75 ટકા કરવાના બિલને મંજૂરી આપી.
• આજથી જ સરકારી નોકરીઓ અને શૈક્ષણિક સંસ્થાઓમાં 75 ટકા અનામત લાગુ.

બિહાર: હવે બિહારમાં 75 ટકા અનામતનો લાભ મળશે. બિહારની નીતીશ કુમારની સરકારે આ અંગે એક ગેઝેટ પ્રકાશિત કર્યું છે. એટલે કે હવેથી અનુસૂચિત જાતિ/જનજાતિ, EBC અને OBCને શૈક્ષણિક સંસ્થાઓ અને નોકરીઓમાં 75 ટકા અનામતનો લાભ મળશે. મંગળવાર (21 નવેમ્બર)થી તેનો અમલ કરવામાં આવ્યો છે. બિહાર સરકારે અનામત મર્યાદામાં 15 ટકાનો વધારો કર્યો છે.

રાજ્યપાલે બિલને મંજૂરી આપી

બિહાર સરકારે વિધાનસભાના શિયાળુ સત્ર દરમિયાન અનામત સંશોધન બિલ 2023 રજૂ કર્યું હતું. તે 9 નવેમ્બરના રોજ બંને ગૃહો દ્વારા પસાર કરવામાં આવ્યું હતું. અનામતનો વ્યાપ વધારીને 75 ટકા કરવાની જોગવાઈ હતી. રાજ્યની મુખ્ય વિપક્ષી પાર્ટી ભાજપે પણ આ બિલને સમર્થન આપ્યું હતું. દિલ્હીથી પરત ફરતાની સાથે જ રાજ્યપાલ રાજેન્દ્ર આર્લેકરે આરક્ષણ બિલ-2023ને મંજૂરી આપી દીધી.

બિહારના મુખ્યમંત્રી નીતિશ કુમારે 7 નવેમ્બરે ગૃહમાં જાહેરાત કરી હતી કે બિહારમાં અનામતનો વ્યાપ વિસ્તારવામાં આવશે. મુખ્યમંત્રીએ બિહારમાં 60 ટકા અનામતની વ્યવસ્થા વધારીને 75 ટકા કરવાની જાહેરાત કરી હતી. આ જાહેરાત બાદ તરત જ નીતિશ કુમારે કેબિનેટની બેઠક બોલાવી હતી. અઢી કલાકમાં કેબિનેટે અનામતનો વ્યાપ વધારવાના પ્રસ્તાવને મંજૂરી આપી દીધી હતી. આ પછી, 9 નવેમ્બરના રોજ બંને ગૃહો દ્વારા તેને પસાર કરવામાં આવ્યો હતો.

બિહારમાં હવે કોને કેટલી અનામત મળશે?

બિલ લાગુ થયા બાદ બિહારમાં SCને 20 ટકા અને STને 2 ટકા મળશે. અતિ પછાત વર્ગને 25 ટકા અને પછાત વર્ગને 18 ટકા અનામતનો લાભ મળશે. આ સાથે જ સામાન્ય વર્ગના આર્થિક રીતે નબળા વર્ગ માટે 10 ટકા અનામતની જોગવાઈ યથાવત રહેશે. અગાઉના દલિતો અને મહાદલિતોને શૈક્ષણિક સંસ્થાઓ અને સરકારી નોકરીઓમાં આ અનામતનો લાભ મળશે. સરકારી કોલેજો અને યુનિવર્સિટીઓમાં આ કેટેગરીના વિદ્યાર્થીઓને આનો લાભ મળશે.

આ પણ વાંચો: ‘રાહુલ ગાંધીએ દેશની એકતા માટે જીવ આપ્યો’ : ખડગેએ ભાષણમાં કરી મોટી ભૂલ, થયા ટ્રોલ