ભારતની સંરક્ષણ નિકાસ 600 કરોડથી વધી 16,000 કરોડ થઈ

• IDAS, IOFSના અધિકારીઓએ લીધી રાષ્ટ્રપતિની મુલાકાત

નવી દિલ્હી, નવેમ્બર 17 : ભારતીય ઓર્ડનન્સ ફેક્ટરી સેવાના અધિકારીઓ અને ભારતીય સંરક્ષણ ખાતા સેવાના પ્રોબેશનર્સે આજે રાષ્ટ્રપતિ ભવન ખાતે ભારતના રાષ્ટ્રપતિ દ્રૌપદી મુર્મુને મળ્યા હતા. આ અધિકારીઓને સંબોધતા રાષ્ટ્રપતિએ કહ્યું હતું કે, તેઓ એવા સમયે તેમની સેવાઓમાં જોડાયા છે જ્યારે દેશ સ્થાનિક તેમજ વૈશ્વિક સ્તરે વ્યાપક પરિવર્તનમાંથી પસાર થઈ રહ્યો છે. નવી તકનીકોના ઉદભવ સાથે માહિતી વિશ્વના દરેક ખૂણે ઝડપી ગતિએ ફેલાઈ રહી છે, જેથી ભારતને વિકસિત રાષ્ટ્ર અને વૈશ્વિક સ્તરે સ્પર્ધાત્મક બનાવવામાં તેમની ભૂમિકા વધુ મહત્વપૂર્ણ બનશે. તેમજ યુવા અધિકારીઓના વિચારો, નિર્ણયો અને કાર્યો સંરક્ષણ પ્રણાલી અને દેશના ભાવિને આકાર આપવામાં મોટો ફાળો આપશે.

આ ઉપરાંત, સ્વ-નિર્ભર, સ્પર્ધાત્મક અને મજબૂત અર્થતંત્ર બનાવવામાં સ્વદેશી ઉદ્યોગોની મોટી ભૂમિકા છે. સરકારે છેલ્લા કેટલાક વર્ષોમાં અનેક નીતિગત પહેલ કરી છે અને સ્વદેશી ડિઝાઇન, વિકાસ અને સંરક્ષણ સાધનોના ઉત્પાદનને પ્રોત્સાહિત કરવા પણ ઘણા સુધારા લાવ્યા છે. આઇઓએફએસ અધિકારીઓ સંરક્ષણ પ્રણાલીમાં સ્વદેશીકરણના પ્રેરક અને સહાયક હશે, સાથે જ તેઓ ભારતની સંરક્ષણ ઉત્પાદન ક્ષમતાઓને વધારવા માટે પણ કાર્ય કરે.

ભારતની સંરક્ષણ નિકાસ નાણાકીય વર્ષ 2013-14માં રૂ. 686 કરોડથી વધીને નાણાકીય વર્ષ 2022-23માં 16,000 કરોડ થઈ છે. IOFS અધિકારીઓ વિકાસ કાર્યક્રમોમાં સક્રિયપણે ભાગ લે અને ભારતને સંરક્ષણ ઉત્પાદન હબ બનાવવાની પ્રક્રિયાને સરળ બનાવે. તેઓ દેશના સશસ્ત્ર દળોના નાણાકીય પાસાઓના સંચાલનમાં મહત્વપૂર્ણ ભૂમિકા ભજવશે. તેમજ સંરક્ષણ ક્ષેત્રમાં કાર્યક્ષમ નાણાકીય વ્યવસ્થાપન અને જવાબદારી સુનિશ્ચિત કરવા માટે જવાબદાર રહેશે. તેમના તાલીમ મોડ્યુલના આધારે, IDAS અધિકારીઓ સંરક્ષણ દળોમાં નાણાકીય સમજદારીને પ્રોત્સાહન આપી શકશે અને રાષ્ટ્ર નિર્માણમાં નોંધપાત્ર યોગદાન આપી શકશે. સાથે જ સંરક્ષણ પ્રણાલીઓની કામગીરીમાં વધુ પારદર્શિતા અને જવાબદારી લાવવા માટે ઓડિટ અને એકાઉન્ટિંગ માટે નવીનતમ તકનીકો અને પદ્ધતિઓ અપનાવવા જણાવ્યું હતું.

આ પણ વાંચો : ચીને કર્યો લાઈટનિંગ સ્પીડનું ઈન્ટરનેટ લૉન્ચ કરવાનો દાવો