છત્તીસગઢમાં વોટિંગ દરમિયાન CRPFની ટીમ પર નક્સલીઓએ હુમલો કર્યો

• મતદાન પાર્ટીને સુરક્ષા આપવા માટે સુરક્ષા દળોની ટીમ નીકળી હતી.
• સુરક્ષા દળોને નુકસાન પહોંચાડવા માટે નક્સલવાદીઓએ આ વિસ્ફોટ કર્યો હતો.
• ગઈકાલે જ નક્સલવાદીઓ દ્વારા મતદાનનો બહિષ્કાર કરવાના બેનરો અને પોસ્ટરો લગાવવામાં આવ્યા હતા.

છત્તીસગઢ: છત્તીસગઢમાં આજે બીજા અને અંતિમ તબક્કા માટે 70 બેઠકો પર મતદાન થઈ રહ્યું છે. આ દરમિયાન ધમતરીમાં સીઆરપીએફની ટીમ પર નક્સલી હુમલો થયો છે. પેટ્રોલિંગમાં નીકળેલી CRPF અને DRGની ટીમો પર નક્સલવાદીઓએ એક પછી એક IED બ્લાસ્ટ કર્યા હતા. આ દરમિયાન બાઇક પર સવાર બે સીઆરપીએફ જવાનોનો આબાદ બચાવ થયો હતો.

સ્થળ પરથી બે IED મળી આવ્યા છે

મતદાન પાર્ટીને સુરક્ષા આપવા માટે સુરક્ષા દળોની ટીમ નીકળી હતી. સ્થળ પર બે IEDની પુષ્ટિ થઈ છે. સુરક્ષા દળોને નુકસાન પહોંચાડવા માટે નક્સલવાદીઓએ આ વિસ્ફોટ કર્યો હતો. ગઈકાલે જ નક્સલવાદીઓ દ્વારા મતદાનનો બહિષ્કાર કરવાના બેનરો અને પોસ્ટરો લગાવવામાં આવ્યા હતા. તેને જોતા ચૂંટણી પંચ દ્વારા નક્સલ પ્રભાવિત વિસ્તારોમાં કડક સુરક્ષા વ્યવસ્થા કરવામાં આવી હતી.

આજે 70 બેઠકો પર મતદાન થઈ રહ્યું છે

રાજ્યની કુલ 90 વિધાનસભા બેઠકોમાંથી 70 બેઠકો માટે આજે બીજા તબક્કામાં મતદાન થઈ રહ્યું છે. અગાઉ પ્રથમ તબક્કામાં 20 બેઠકો પર મતદાન થયું હતું. રાજ્યમાં વિધાનસભા ચૂંટણીની જાહેરાત બાદ બસ્તરમાં ઘણી જગ્યાએથી ચૂંટણી બહિષ્કારનું આહ્વાન કરતા નક્સલવાદી બેનરો અને પેમ્ફલેટ મળી આવ્યા હતા.

રાજ્યના મતદાન મથકોમાંથી 109ને અતિસંવેદનશીલ અને 1670ને સંવેદનશીલ જાહેર કરવામાં આવ્યા છે. મુક્ત, ન્યાયી અને શાંતિપૂર્ણ મતદાન માટે વ્યાપક સુરક્ષા વ્યવસ્થા કરવામાં આવી છે. રાજ્યમાં કુલ 90 હજાર 272 મતદાન કર્મચારીઓને તૈનાત કરવામાં આવ્યા છે. 20 સીટો માટે પ્રથમ તબક્કાનું મતદાન 7 નવેમ્બરના રોજ થયું હતું. ચૂંટણીના પરિણામો 3 ડિસેમ્બરે જાહેર થશે.

પ્રથમ તબક્કાના મતદાનના દિવસે પણ બ્લાસ્ટ કરવામાં આવ્યો હતો

 છત્તીસગઢમાં પ્રથમ તબક્કાના મતદાનના દિવસે સુકમા જિલ્લામાં નક્સલવાદીઓએ IED બ્લાસ્ટ કર્યો હતો. આ IED બ્લાસ્ટમાં CRPFના ચુનંદા યુનિટ કોબ્રાનો એક કમાન્ડો ઘાયલ થયો હતો. પોલીસના જણાવ્યા અનુસાર, CRPF અને કોબ્રાની 206મી બટાલિયનની સંયુક્ત ટીમ ટોંડામાર્કા કેમ્પથી એલમાગુંડા ગામ તરફ રવાના થઈ હતી. આ દરમિયાન કોબ્રા 206મી બટાલિયનના ઈન્સ્પેક્ટર શ્રીકાંતે નક્સલવાદીઓ દ્વારા લગાવવામાં આવેલા આઈઈડી પર પગ મૂક્યો, જેના કારણે વિસ્ફોટ થયો અને તેઓ ઈજાગ્રસ્ત થયા હતા.

આ પણ વાંચો, મહિલા અધિકારીની છેડતીના કેસમાં વરિષ્ઠ IAS અધિકારી ફસાયા