PM મોદી અને શેખ હસીનાએ 3 મોટા પ્રોજેક્ટ્સનું ઉદ્દઘાટન કર્યું

• ખૂબ જ આનંદની વાત છે કે અમે ફરી એકવાર ભારત-બાંગ્લાદેશની સફળતાની ઉજવણી કરવા માટે સાથે આવ્યા છીએ- પીએમ મોદી
• બંને દેશો વચ્ચે મિત્રતાના બંધનને મજબૂત કરવા માટે તમારી પ્રતિબદ્ધતા બદલ હું આભાર વ્યક્ત કરું છું-પીએમ શેખ હસીના

નવી દિલ્હીઃ વડા પ્રધાન નરેન્દ્ર મોદી અને બાંગ્લાદેશના વડા પ્રધાન શેખ હસીનાએ સંયુક્તપણે વીડિયો કોન્ફરન્સિંગ દ્વારા ભારતની મદદથી બનેલા ત્રણ પ્રોજેક્ટનું ઉદ્ઘાટન કર્યું. તેમાં અખૌરા-અગરતલા ક્રોસ-બોર્ડર રેલ લિંક, ખુલના-મોંગલા પોર્ટ રેલ લાઇન અને મૈત્રી સુપર થર્મલ પાવર પ્લાન્ટ પ્રોજેક્ટના યુનિટ-3નો સમાવેશ થાય છે. આ દરમિયાન પીએમ મોદીએ કાર્યક્રમને સંબોધિત કરતા કહ્યું કે, આ ખૂબ જ આનંદની વાત છે કે અમે ફરી એકવાર ભારત-બાંગ્લાદેશની સફળતાની ઉજવણી કરવા માટે સાથે આવ્યા છીએ. અમારા સંબંધો નવી ઊંચાઈઓને સ્પર્શી રહ્યા છે. નવ વર્ષમાં જેટલું કામ થયું છે તેટલું કામ ઘણા દાયકાઓમાં થયું નથી. બંને દેશો વચ્ચે જમીન સીમા કરાર અને દરિયાઈ કરાર કરવામાં આવ્યા હતા. બંને દેશોની આકાંક્ષાઓને પૂર્ણ કરવા પર વિશેષ ભાર મૂકવામાં આવ્યો હતો. ત્રણ નવી બસોની સેવા શરૂ કરવામાં આવી હતી. ગયા નવા વર્ષમાં ત્રણ રેલ સેવાઓ પણ શરૂ કરવામાં આવી હતી.

તેમણે કહ્યું કે ભારત-બાંગ્લાદેશે બંને દેશોના લોકોની સામાન્ય અપેક્ષાઓ અને આકાંક્ષાઓને પૂર્ણ કરવા માટે ઈન્ફ્રાસ્ટ્રક્ચર અને કનેક્ટિવિટીના વિકાસ પર વિશેષ ભાર મૂક્યો છે.વર્ષ 2020થી ભારત અને બાંગ્લાદેશ વચ્ચે કન્ટેનર અને પાર્સલ ટ્રેનો પણ દોડી રહી છે.છેલ્લા નવ વર્ષોમાં મુસાફરો અને માલસામાનના પરિવહન માટે દરિયાઈ માર્ગ વિકસાવવામાં આવ્યો હતો. આ માર્ગ દ્વારા બાંગ્લાદેશથી ત્રિપુરામાં નિકાસનો માર્ગ ખુલી ગયો છે. ભારત અને બાંગ્લાદેશ વચ્ચે વિશ્વની સૌથી મોટી ક્રુઝ સેવા ગંગા વિલાસની શરૂઆતથી પ્રવાસનને વેગ મળ્યો છે, જ્યારે ભારતના ઉત્તર-પૂર્વીય રાજ્યોને ચિત્તાગોંગ અને મોંગલા બંદરો દ્વારા જોડવાનો લાભ પણ બંને દેશોને મળ્યો છે.

ભારત અને બાંગ્લાદેશ વચ્ચે ત્રણ વિકાસ પરિયોજનાઓના ઉદ્ઘાટન સમયે બાંગ્લાદેશના પીએમ શેખ હસીનાએ કહ્યું, આપણા બંને દેશો વચ્ચે મિત્રતાના બંધનને મજબૂત કરવા માટે તમારી પ્રતિબદ્ધતા બદલ હું આભાર વ્યક્ત કરું છું.

ભારત અને બાંગ્લાદેશ વચ્ચે ત્રણ વિકાસ પ્રોજેક્ટ્સ શું છે?

આ ત્રણેય પ્રોજેક્ટ ભારતના સહયોગથી અમલમાં મુકાયા છે. અખૌરા-અગરતલા ક્રોસ-બોર્ડર રેલ લિંક પ્રોજેક્ટ ભારત સરકાર દ્વારા બાંગ્લાદેશને આપવામાં આવેલી રૂપિયા 392.52 કરોડના અનુદાન હેઠળ અમલમાં મૂકવામાં આવ્યો છે. બાંગ્લાદેશમાં 6.78 કિમી ડ્યુઅલ ગેજ રેલ લાઇન અને ત્રિપુરામાં 5.46 કિમી સાથે રેલ લિંકની લંબાઈ 12.24 કિમી છે.

ખુલના-મોંગલા પોર્ટ રેલ લાઇન પ્રોજેક્ટ ભારત સરકારની રાહત ધિરાણ સુવિધા હેઠળ વિકસાવવામાં આવ્યો છે જેની કુલ પ્રોજેક્ટ કિંમત 38.83 કરોડ અમેરિકન ડોલર જેટલી છે. આ પ્રોજેક્ટમાં મોંગલા પોર્ટ અને ખુલનામાં હાલના રેલ નેટવર્ક વચ્ચે લગભગ 65 કિમીના બ્રોડગેજ રેલ માર્ગનું નિર્માણ સામેલ છે. આ સાથે બાંગ્લાદેશનું બીજું સૌથી મોટું બંદર મોંગલા બ્રોડગેજ રેલ્વે નેટવર્ક સાથે જોડાયેલું છે.

15 કિમી લાંબી અગરતલા-અખૌરા ક્રોસ બોર્ડર રેલ લિંક (ભારતમાં 5 કિમી અને બાંગ્લાદેશમાં 10 કિમી) ક્રોસ બોર્ડર વેપારને વેગ આપશે અને અગરતલાથી કોલકાતા વાયા ઢાકા સુધીની મુસાફરીનો સમય પણ ઘટાડશે. હાલમાં ટ્રેનને અગરતલાથી કોલકાતા પહોંચવામાં 31 કલાક લાગે છે જે આ પ્રોજેક્ટ શરૂ થયા બાદ ઘટીને 21 કલાક થઈ જશે.

આ પણ વાંચો, મરાઠા અનામત મુદ્દે તમામ પક્ષો સરકાર સાથે છેઃ એકનાથ શિંદે