સમગ્ર દેશમાં ડૉકટર્સ માટે વન નેશન, વન રજીસ્ટ્રેશન લાગુ થશે

નવી દિલ્હીઃ દેશમાં ડૉકટર્સ માટે વન નેશન, વન રજીસ્ટ્રેશન લાગુ કરવામાં આવશે. નેશનલ મેડિકલ કમિશન (NMC) એ તેની સંપૂર્ણ રૂપરેખા તૈયાર કરી છે, જે આગામી છ મહિનામાં પાયલોટ પ્રોજેક્ટ તરીકે લાગુ કરવામાં આવશે. આ પછી આ નિયમ રાષ્ટ્રીય સ્તરે લાગુ કરાશે. વન નેશન, વન રજીસ્ટ્રેશન દ્વારા દરેક ડૉકટરને એક યુનિક આઈડી આપવામાં આવશે જે તેમની ઓળખ તરીકે કામ કરશે. આ ID કમિશનના IT પ્લેટફોર્મ સાથે લિંક કરવામાં આવશે જેના પર સંબંધિત ડૉક્ટરના તમામ દસ્તાવેજો, અભ્યાસક્રમો, તાલીમ અને લાયસન્સ વિશેની માહિતી ઉપલબ્ધ હશે.

કમિશનના પ્રવક્તા ડૉ. યોગેન્દ્ર મલિકે કહ્યું કે આ પ્રસ્તાવ પર અત્યાર સુધી ઘણું કામ થઈ ચૂક્યું છે. આ પ્રોજેક્ટ હેઠળ ડૉક્ટરને બે વખત આઈડી આપવામાં આવશે. જ્યારે તે પહેલીવાર MBBS કોર્સમાં એડમિશન લેશે ત્યારે તેને પ્રોવિઝનલ નંબર આપવામાં આવશે. અભ્યાસ પૂર્ણ કર્યા બાદ તેને કાયમી નંબર આપવામાં આવશે. બીજી તરફ, જેઓ હાલમાં પ્રેક્ટિસ કરી રહ્યા છે તેમને સીધા જ કાયમી આઈડી આપવામાં આવશે.

ID દર્દીઓ માટે પણ મદદરૂપ બનશે

ડો.મલિકના કહેવા પ્રમાણે, એક જ નામના ઘણા ડૉક્ટર હોઈ શકે છે, પરંતુ હવે યુનિક આઈડીથી દરેકની ઓળખ અલગ હશે. દર્દીઓ તેમના ડૉક્ટરનું શિક્ષણ, અનુભવ, લાઇસન્સ વિશે પણ જાણી શકશે. સાથે જ ડૉક્ટરોને એ પણ ફાયદો થશે કે જ્યારે પણ તેમને તેમના દસ્તાવેજોની ચકાસણીની જરૂર પડશે ત્યારે તેમને સંબંધિત મેડિકલ કોલેજ કે સરકારી વિભાગમાં વારંવાર ધક્કા ખાવા પડશે નહીં. યુનિક આઈડી મેળવ્યા પછી કોઈપણ ડૉક્ટર દેશના કોઈપણ રાજ્યમાં પ્રેક્ટિસ માટે સંબંધિત સ્ટેટ મેડિકલ કાઉન્સિલમાં રજીસ્ટ્રેશન કરાવી શકે છે.

પ્રક્રિયા શું છે?

નેશનલ હેલ્થ કમિશનના જણાવ્યા અનુસાર, હાલમાં લાયસન્સ મેળવતા સમયે જ ડૉક્ટરની નોંધણી કરવામાં આવે છે. પ્રક્રિયા પૂર્ણ કર્યા પછી રાજ્ય તબીબી પરિષદ રાષ્ટ્રીય આરોગ્ય આયોગને સંપૂર્ણ માહિતી પ્રદાન કરે છે. હાલમાં દેશમાં લગભગ 14 લાખ રજિસ્ટર્ડ ડૉક્ટર દર્દીઓની સેવામાં રોકાયેલા છે. આ સિવાય દેશની 200 થી વધુ મેડિકલ કોલેજોમાં 1.08 લાખથી વધુ MBBS સીટો છે. WHO મુજબ, દર 1000 વસ્તીએ એક ડૉક્ટર હોવું જરૂરી છે અને નેશનલ હેલ્થ કમિશન કહે છે કે ભારત આ ધોરણને ઘણા સમય પહેલા પાર કરી ચૂક્યું છે.

આ પણ વાંચો: ગુજરાતમાં ફેમિલી ડોક્ટર્સ પ્રેક્ટિસનું પ્રમાણ ઘટ્યું, આંકડો જાણી રહેશો દંગ