કેરળ બ્લાસ્ટ બાદ મુંબઈ અને રાજધાની દિલ્હી હાઇ એલર્ટ પર

• કેરળમાં એક કન્વેન્શન સેન્ટરમાં પ્રાર્થના સભા ચાલી રહી હતી તે સમયે વિસ્ફોટ થયો 
• 2000થી વધુ લોકો પ્રાર્થના માટે એકઠા થયા હતા
• વિસ્ફોટ બાદ મુંબઈ, દિલ્હી અને યુપીમાં ઉચ્ચસ્તરીય સુરક્ષા

નવી દિલ્હી, 29 ઑક્ટોબરઃ  કેરળના કોચીમાં એક ખ્રિસ્તી કન્વેન્શન સેન્ટરમાં વિસ્ફોટને પગલે દેશભરમાં સુરક્ષા એજન્સીઓ સતર્ક થઈ ગઈ છે. ખાસ કરીને રાજધાની નવી દિલ્હી તથા આર્થિક પાટનગર મુંબઈમાં સુરક્ષાતંત્ર સતર્ક થયું હોવાનું જાણવા મળે છે.

કેરળના કોચીમાં રવિવાર, 29 ઑક્ટોબરે ખ્રિસ્તીઓની પ્રાર્થના સભા ચાલી રહી હતી જેમાં 2000થી વધુ લોકો પ્રાર્થના માટે એકઠા થયા હતા વિસ્ફોટ થયો હતો જેમાં ઓછામાં ઓછી એક વ્યક્તિનું મૃત્યુ અને 36થી વધુ લોકો ઘાયલ થયા હોવાના પ્રાથમિક અહેવાલ મળ્યા હતા. આ વિસ્ફોટ બાદ સભામાં નાસભાગ મચી ગઈ હતી. બ્લાસ્ટ બાદ બહાર આવેલી તસવીરોમાં તૂટેલા કાચ અને ફર્નિચર જોઈ શકાય છે. અકસ્માતના સમાચાર મળતાની સાથે જ કેરળ ATS સહિત ઉચ્ચ પોલીસ અધિકારીઓ ઘટના સ્થળે પહોંચી ગયા હતા. સમગ્ર વિસ્તારને ઘેરી લેવામાં આવ્યો છે અને સુરક્ષાને ધ્યાનમાં રાખીને લોકોને અહીં આવતા રોકવામાં આવી રહ્યા છે. એક પછી એક બ્લાસ્ટના કારણે અહીંના લોકોમાં ભયનો માહોલ છે.

મુંબઈ હાઈ એલર્ટ પર

કેરળમાં એક ખ્રિસ્તી પ્રાર્થના સભામાં ત્રણ શ્રેણીબદ્ધ બ્લાસ્ટ થયા છે જેમાં એક વ્યક્તિના માર્યા ગયા હોવાના અહેવાલ છે. કેરળમાં થયેલા વિસ્ફોટ બાદ મુંબઈ એલર્ટ પર છે અને અહીં યહૂદી ધાર્મિક સ્થળો પર ઉચ્ચ સ્તરીય સુરક્ષા લાદવામાં આવી છે. કોચીમાં થયેલા વિસ્ફોટ બાદ નેશનલ સિક્યુરિટી ગાર્ડ (NSG) અને કાઉન્ટર ટેરર ​​ATCની ટીમો ઘટનાસ્થળે મોકલવામાં આવી છે. IED બ્લાસ્ટ હોવાની આશંકા છે. મુંબઈ અને પુણેમાં યહૂદી ધર્મના લોકોના ધાર્મિક સ્થળો છે, જોકે મુંબઈમાં પહેલાથી જ ઉચ્ચ સ્તરીય સુરક્ષા હતી પરંતુ કેરળ બ્લાસ્ટ બાદ પોલીસ અહીં નજર રાખી રહી છે.

દિલ્હીમાં પણ ગુપ્તચર એજન્સીઓ ખૂણે-ખૂણે નજર રાખી રહી છે

દિલ્હી પોલીસના જણાવ્યા અનુસાર રાજધાનીના દરેક ભીડવાળા વિસ્તારોમાં દેખરેખ રાખવામાં આવી રહી છે. આવા સ્થળોએ સુરક્ષા વ્યવસ્થા કરવામાં આવી રહી છે. દિલ્હી પોલીસે જણાવ્યું હતું કે, સ્પેશિયલ સેલ ગુપ્તચર એજન્સીઓના સતત સંપર્કમાં છે અને કોઈપણ ઇનપુટને હળવાશથી લેવામાં આવશે નહીં. ભીડવાળી જગ્યાઓ પર સુરક્ષા વ્યવસ્થા કરવામાં આવી રહી છે. તેવી જગ્યાઓ પર ખાસ તકેદારી રાખવામાં આવી રહી છે.

યુપીમાં હાઈ એલર્ટ

યુપીમાં હાઈ એલર્ટ જારી કરવામાં આવ્યું છે. યુપી પોલીસને ઇઝરાયલ-પેલેસ્ટાઇન સંબંધિત દરેક વિરોધ પ્રદર્શન પર ચાંપતી નજર રાખવાની સૂચના આપવામાં આવી છે. યુપી એટીએસ અને તમામ જિલ્લાઓની પોલીસને વધારાની તકેદારી રાખવા અને શંકાસ્પદોની ઓળખ કરવા સૂચના આપવામાં આવી છે.

સ્પેશિયલ ડીજી પ્રશાંત કુમારે કહ્યું કે ઇઝરાયેલ-હમાસ યુદ્ધને ધ્યાનમાં રાખીને અગાઉ પણ એલર્ટ આપવામાં આવ્યું હતું. કેરળમાં તાજેતરમાં બનેલી ઘટના અંગે માહિતી એકત્ર કરવામાં આવી રહી છે. સાવચેતીના ભાગરૂપે ઈઝરાયેલ અને પેલેસ્ટાઈનના સમર્થનમાં થઈ રહેલા વિરોધ પ્રદર્શન પર પણ બારીકાઈથી નજર રાખવામાં આવી રહી છે. ઉપસ્થિત લોકો તેમજ વર્ચ્યુઅલ રીતે જોડાયેલા લોકો વિશે સંપૂર્ણ માહિતી એકત્રિત કરવામાં આવી રહી છે. યુપી પોલીસ કેરળ પોલીસ અને અન્ય કેન્દ્રીય ગુપ્તચર એજન્સીઓના સંપર્કમાં છે. રાજ્યમાં કેરળના કટ્ટરપંથી સંગઠનો સાથે જોડાયેલા લોકોની ઓળખ કરવામાં આવી રહી છે.

આ પણ વાંચો, કેરળમાં ખ્રિસ્તી પ્રાર્થના સભામાં જોરદાર વિસ્ફોટ, ગાઝા યુદ્ધના છાંટા ઉડ્યાની શક્યતા