રાજકોટમાં ત્રિપલ સવારી બાઈકને ટ્રકે હડફેટે લેતા 2 મિત્રોના મોત થયા

રાજકોટના કાલાવડ રોડ પર આણંદપર નજીક ગાર્ડી કોલેજ પાસે નિકાવાથી પરત આવી રહેલા ત્રણ મિત્રોને અકસ્માત નડયો હતો. પૂરપાટ ઝડપે આવી રહેલા અજાણ્યા ટ્રક ચાલકે અડફેટે લેતા ત્રિપલ સવારી બાઈક ફંગોળાઇને રોડ પર પટકાયું હતું. જેમાં ચાલક સહિત બે મિત્રોનું ઘટનાસ્થળે જ મોત નીપજ્યું હતું. જ્યારે કે એક યુવકને ઈજા પહોંચતા સારવાર અર્થે રાજકોટ સિવિલ હોસ્પિટલ ખસેડવામાં આવ્યો હતો.

મળતી માહિતી મુજબ, કાલાવડ રોડ પર મેટોડા GIDC ગેટ નં. 2માં રહેતા રોહિત રસીકભાઈ જાખેલીયા (ઉં.વ.25) ગઇકાલે રાત્રિના તેના મિત્ર હસમુખભાઈ મહેતા (ઉં.વ.45) અને વિપુલ જેન્તીભાઈ પંસારા (ઉં.વ.28) સાથે બાઇકમાં સવાર થઈ નિકાવા જમવા માટે ગયા હતા. હોટલેથી જમીને મેટોડા પરત ફરવા માટે નીકળ્યા હતા ત્યારે આણંદપર નજીક ગાર્ડી કોલેજ પાસે પહોંચતા પાછળથી પૂરપાટ ઝડપે આવેલા ટ્રકે અડફેટે લેતા ત્રણેય મિત્રો ફૂટબોલના દડાની માફક ફંગોળાઇને રોડ પર પટકાયા હતા. જેમાં ત્રણેય મિત્રોને માથાના ભાગે ગંભીર ઈજા પહોંચી હતી. જેથી ત્રણેય ઈજાગ્રસ્તોને સારવારમાં 108 મારફતે સિવિલ હોસ્પિટલ ખસેડવામાં આવ્યા હતા. અહીં સારવારમાં રાજકોટ સિવિલે પહોંચે તે પહેલા રોહિત જાખેલીયા અને હસમુખભાઈ મહેતાએ રસ્તામાં જ દમ તોડી દીધો હતો. જ્યારે ઈજાગ્રસ્ત વિપુલ પંસારાને સારવારમાં ખસેડાયો હતો.

રાત્રિના સમયે અકસ્માતથી રોડ ટ્રાફિકજામ થઈ ગયો હતો. આથી લોધિકા પોલીસ દોડી આવી હતી અને ટ્રાફિક સમસ્યા દૂર કરી હતી. બાદમાં અજાણ્યા ટ્રક ચાલક સામે ગુનો નોંધી શોધખોળ હાથ ધરી હતી.