લોકસભા પહેલાં 3 રાજ્યોમાં વિધાનસભાની ચૂંટણી, જાણો સર્વેમાં કોની બની રહી છે સરકાર?

• બે મહિના પછી છત્તીસગઢ, રાજસ્થાન અને મધ્યપ્રદેશમાં વિધાનસભાની ચૂંટણી, જાણો આ ત્રણ રાજ્યોમાં કોની સરકાર બનવા જઈ રહી છે? સર્વેમાં કોને કેટલી બેઠકો?

વિધાનસભા ચૂંટણી: 2024માં યોજાનારી લોકસભાની ચૂંટણી માટે તૈયારીની વ્યૂહરચના બનાવવામાં આવી રહી છે. સામાન્ય ચૂંટણી પહેલા દેશના પાંચ રાજ્યોમાં વિધાનસભાની ચૂંટણી યોજાવાની છે, જેનો કાર્યકાળ ડિસેમ્બર અને જાન્યુઆરીમાં પૂરો થઈ રહ્યો છે. આ પાંચ રાજ્યોમાં છત્તીસગઢ, રાજસ્થાન અને મધ્યપ્રદેશ હિન્દીભાષી રાજ્યો છે અને આગામી લોકસભા ચૂંટણીની દૃષ્ટિએ પણ ખૂબ જ મહત્વપૂર્ણ છે. હાલમાં છત્તીસગઢ અને રાજસ્થાનમાં કોંગ્રેસ સત્તામાં છે જ્યારે મધ્યપ્રદેશમાં ભાજપ સત્તા પર છે. આ રાજ્યોમાં આગામી બે મહિનામાં યોજાનારી ચૂંટણીને લઈને જોરદાર રેલીઓ કાઢવામાં આવી રહી છે. આ દરમિયાન અહીં કોની સરકાર બને તેવી શક્યતા છે તે જાણવા માટે સર્વે હાથ ધરવામાં આવ્યો હતો. કોણ સત્તામાં પરત ફરશે અને કોને નિરાશ થવું પડશે? ચાલો જાણીએ શું આવ્યું સર્વેમાં…

તમને જણાવી દઈએ કે આ સર્વે IANS એજન્સી પોલ્સ્ટ્રેટ દ્વારા કરવામાં આવ્યો છે, જે 1 સપ્ટેમ્બરથી 13 સપ્ટેમ્બરની વચ્ચે કરવામાં આવ્યો હતો. સર્વેના આંકડા મુજબ વર્ષના અંતમાં યોજાનારી આ ત્રણેય રાજ્યોની વિધાનસભાની ચૂંટણીમાં સત્તા પરિવર્તન થાય તેવું લાગતું નથી. જોકે, રાજ્યોમાં પક્ષોની બેઠકોમાં વધઘટ થવાની સંભાવના છે. આ ત્રણ રાજ્યોમાંથી રાજસ્થાનમાં કુલ 200 વિધાનસભા બેઠકો, છત્તીસગઢમાં 90 અને મધ્યપ્રદેશમાં 230 વિધાનસભા બેઠકો છે. ચાલો જોઈએ કે રાજ્ય પ્રમાણે કઈ પાર્ટીને કેટલી બેઠકો મળવાની અપેક્ષા છે.

રાજસ્થાનમાં ભાજપની બેઠકોમાં વધારો પણ સરકાર કોંગ્રેસની જ રહેશે- IANS સર્વે

રાજસ્થાનમાં અશોક ગેહલોતના નેતૃત્વમાં હાલ કોંગ્રેસની સરકાર છે. જેમણે 2018ની વિધાનસભા ચૂંટણીમાં કુલ 200માંથી 100 બેઠકો જીતી હતી અને બહુમતીમાં માત્ર એક જ બેઠક ઓછી પડી હતી. જો કે ચૂંટણી બાદ તે BSP સાથે ગઠબંધન કરીને સરકાર બનાવવામાં કોંગ્રેસ સફળ રહી હતી. જ્યારે ભાજપને 73 અને બસપાને 6 બેઠકો મળી હતી. સાથે જ જો આ સર્વેની વાત કરીએ તો કોંગ્રેસ અહીં ફરી સત્તામાં આવી શકે છે. સર્વે અનુસાર 2023ની ચૂંટણીમાં કોંગ્રેસને 97થી 105 બેઠકો મળવાની આશા છે. જ્યારે રાજ્યની મુખ્ય વિપક્ષી પાર્ટી ભાજપને ગત ચૂંટણીની સરખામણીએ આ વખતે 16 થી 26 બેઠકો મળવાની ધારણા છે. સર્વેમાં ભાજપને 89થી 97 અને બસપાને 0થી 4 બેઠકો મળી છે.

શું આ વખતે મધ્યપ્રદેશમાં ભાજપને પૂર્ણ બહુમતી મળશે?

MPની 2018ની વિધાનસભા ચૂંટણીમાં ભાજપ અને કોંગ્રેસ વચ્ચે ગાઢ મુકાબલો હતો અને 15 વર્ષમાં પહેલીવાર કોઈ પક્ષ બહુમતી મેળવી શક્યો નહોતો. જો કે, કોંગ્રેસ સૌથી વધુ બેઠકો મળવાને કારણે સત્તામાં આવી હતી, પરંતુ એક વર્ષ પછી પલટવારે ભાજપને સત્તામાં પરત લાવી હતી. 230 વિધાનસભા બેઠકો ધરાવતા મધ્યપ્રદેશમાં 2018ની ચૂંટણીમાં કોંગ્રેસે 114 બેઠકો અને ભાજપને 109 બેઠકો મળી હતી. જ્યારે માયાવતીની બહુજન સમાજવાદી પાર્ટીને 2 બેઠકો મળી હતી. સર્વેના આંકડાઓ પર નજર કરીએ તો મધ્યપ્રદેશમાં ભાજપની સરકાર બની રહી હોય તેવું લાગી રહ્યું છે. સર્વે મુજબ ભાજપ 116થી 124 સીટો જીતી શકે છે. સાથે જ કોંગ્રેસને 100થી 108 બેઠકો મળવાની આશા છે. રાજ્યમાં ભાજપને 42 ટકા વોટશેર અને કોંગ્રેસને 40 ટકા વોટશેર મળશે તેવું દર્શાવામાં આવ્યું છે.

છત્તીસગઢમાં ફરી ભૂપેશ બઘેલની સરકાર?

2018ની વિધાનસભા ચૂંટણીમાં છત્તીસગઢમાં 15 વર્ષ બાદ સત્તા પરિવર્તન થયું છે. આટલા વર્ષો વિપક્ષમાં બેઠા પછી કોંગ્રેસને જંગી જીત મળી. તે ચૂંટણીમાં કુલ 90 વિધાનસભા બેઠકોમાંથી કોંગ્રેસને 68 બેઠકો મળી હતી. જ્યાં ભાજપ 49 બેઠકોથી ઘટીને 15 બેઠકો પર આવી ગયું હતું અને અહીં પણ BSP ગઠબંધનને 5 બેઠકો મળી હતી. હવે આ વર્ષની ચૂંટણી પહેલા આવેલા સર્વે મુજબ રાજ્યમાં કોંગ્રેસને સારી લીડ મળવાની આશા છે. પાર્ટીને 62 સીટો મળવાની સંભાવના દર્શાવવામાં આવી છે. ભાજપને 12 બેઠકોનો ફાયદો થઈ શકે છે, સર્વેમાં પાર્ટીને 27 બેઠકો મળી છે. જ્યારે રાજ્યમાં કોંગ્રેસને 44 ટકા અને ભાજપને 38 ટકા વોટ શેર મળવાની ધારણા છે. છત્તીસગઢમાં કરાયેલા સર્વેનું સેમ્પલ સાઈઝ 3672 છે.

આ પણ વાંચો: નૂહમાં ફરી ઈન્ટરનેટ બંધ, કલમ 144 લાગુ, કોંગ્રેસના ધારાસભ્ય મામન ખાનની ધરપકડ બાદ નિર્ણય