ઇન્ટરનેશનલ ડેસ્કઃ રાજસ્થાનના ઉદયપુર શહેરમાં કન્હૈયાલાલની ભયાનક હત્યાને લઈને દેશભરમાં ગુસ્સો છે. કતાર મીડિયા અલ જઝીરાએ પણ કન્હૈયાલાલ મર્ડર કેસ પર પોતાનો રિપોર્ટ આપ્યો છે. કન્હૈયાલાલ મર્ડર પર અલ જઝીરાનો અહેવાલ મહત્વનો છે કારણ કે કતારે પયગંબર મોહમ્મદ વિશે નુપુર શર્માની ટિપ્પણી પર ભાજપે સખત વાંધો ઉઠાવ્યો હતો. ઉદયપુર પોલીસના પ્રાથમિક તપાસ રિપોર્ટમાં એ વાત સામે આવી છે કે નૂપુર શર્માની ટિપ્પણીને સમર્થન આપ્યા બાદ કન્હૈયાલાલની નિર્દયતાથી હત્યા કરવામાં આવી હતી. હત્યારાઓએ આ અંગે એક વીડિયો પણ જાહેર કર્યો હતો.
અલ જઝીરા અનુસાર, AIMIના વડા અસદુદ્દીન ઓવૈસીએ આ ઘટનાની નિંદા કરી છે. કોઈ પણ કાયદો પોતાના હાથમાં લઈ શકે નહીં. તે કરવું એક ભયંકર બાબત છે. આ અમાનવીય છે. મુસ્લિમ ધાર્મિક સંગઠન જમાત-એ-ઈસ્લામી હિંદે જણાવ્યું હતું કે, ઉદયપુરની ઘટના અસંસ્કારી છે અને હિંસાને વાજબી ઠેરવવા માટે ઈસ્લામમાં કોઈ સ્થાન નથી. સંગઠને ટ્વિટર પર પોસ્ટ કર્યું કે, ‘અમે આની સખત નિંદા કરીએ છીએ. કોઈપણ નાગરિકે કાયદો હાથમાં ન લેવો જોઈએ.’
રાજસ્થાનના મુખ્યમંત્રી અશોક ગેહલોતે ટ્વિટર પર જણાવ્યું હતું કે, હત્યાના બંને આરોપીઓની ધરપકડ કરવામાં આવી છે અને અમે કડક સજા અને ઝડપી ન્યાય સુનિશ્ચિત કરીશું. ગેહલોતે લોકોને શાંત રહેવા અને વીડિયો શેર ન કરવાની અપીલ કરી કારણ કે તે સમાજમાં વિખવાદ પેદા કરવાના હુમલાખોરોના ઉદ્દેશ્યને પૂર્ણ કરશે.
ઉદયપુર શહેરમાં ટેલરિંગની દુકાન ચલાવતા કન્હૈયા લાલની મંગળવારે નિર્દયતાથી હત્યા કરવામાં આવી હતી. બે લોકોએ રિયાઝ અને મોહમ્મદ ગૌસે તીક્ષ્ણ હથિયાર વડે કન્હૈયાલાલનું માથું કાપી નાખ્યું. હત્યારાઓએ હત્યાનો વીડિયો પણ બનાવ્યો હતો અને હત્યાના 10 દિવસ પહેલા અને પછી વીડિયો જાહેર કર્યો હતો. જેમાં બંનેએ હત્યાની કબૂલાત કરી હતી.
આ ઉપરાંત બંનેએ પીએમ નરેન્દ્ર મોદી માટે અપશબ્દોનો ઉપયોગ કર્યો હતો અને જાનથી મારી નાખવાની ધમકી પણ આપી હતી. ઉદયપુરમાં હત્યા અને મોબાઈલ ઈન્ટરનેટ સેવાઓ અને મોટા મેળાવડા પર પ્રતિબંધ લગાવ્યાના એક દિવસ બાદ પોલીસ એલર્ટ મોડ પર આવી ગઈ હતી. આ જઘન્ય હત્યા કેસમાં પોલીસે બંને આરોપીઓની ધરપકડ કરી છે.
ગૃહ મંત્રાલયે તેની આતંકવાદ વિરોધી એજન્સી(NIA)ની એક ટીમ રાજસ્થાન મોકલી છે કે શું આ હત્યાકાંડનો આતંકવાદી જૂથો સાથે કોઈ સંબંધ છે કે કેમ. હજુ સુધી રાજ્ય પોલીસે ધરપકડ કરાયેલા બે લોકો પર આતંકવાદનો આરોપ લગાવ્યો નથી.
