નૂહ હિંસા: ગુડગાંવની મસ્જિદમાં આગ લગાડી; ઇમામની ચાકુ મારી હત્યા- પોલીસ તપાસમાં વ્યસ્ત

નૂહ: હરિયાણાના નૂહમાં ફાટી નીકળેલી હિંસાની આગ હવે આસપાસના વિસ્તારોમાં પહોંચી ગઈ છે. પોલીસના જણાવ્યા અનુસાર, 70-80 લોકોના ટોળાએ આજે ​​(મંગળવારે) સવારે ગુડગાંવમાં એક મસ્જિદને કથિત રીતે આગ લગાવી દીધી હતી અને ઈમામની હત્યા કરી હતી.

ડીસીપી (પૂર્વ) નીતીશ અગ્રવાલના જણાવ્યા અનુસાર સેક્ટર 57માં આવેલી અંજુમન જામા મસ્જિદમાં સોમવારે રાત્રે આગ લગાવી દેવામાં આવી હતી. તેમણે કહ્યું, “અમે કેટલાક આરોપીઓની ઓળખ કરી લીધી છે અને ટૂંક સમયમાં જ કાર્યવાહી કરવામાં આવશે, ઘટના દરમિયાન આરોપીઓએ ગોળીબાર પણ કર્યો હતો જેમાં ઇમામ અને અન્ય એક વ્યક્તિ ખરાબ રીતે ઘાયલ થયા હતા અને તેમને હોસ્પિટલ લઇ જવામાં આવ્યા હતા. ઇમામને કથિત રીતે ચાકુ મારીને તેમની હત્યા કરવામાં આવી હતી.

પોલીસનું શું કહેવું છે?
પોલીસ કમિશનર કાલા રામચંદ્રને કહ્યું, “આજે લગભગ 12:10 વાગ્યે પીએસ સેક્ટર 56 જીજીએમ વિસ્તારના સેક્ટર 57માં આવેલી અંજુમન મસ્જિદ પર કેટલાક લોકોએ હુમલો કર્યો હતો, જેમાં એક વ્યક્તિનું મોત થયું હતું અને અન્ય ઘાયલ થયો હતો.

મસ્જિદમાં લાગેલી આગ પર કાબુ મેળવી લેવામાં આવ્યો છે. પોલીસે હુમલાખોરોની ઓળખ કરી લીધી છે અને રાતોરાત દરોડા પાડ્યા બાદ અનેક હુમલાખોરોની ધરપકડ કરવામાં આવી છે. ધાર્મિક સ્થળોની આસપાસ સુરક્ષા સઘન કરવામાં આવી છે.

પોલીસ અને વહીવટીતંત્ર શાંતિ સ્થાપવા માટે બંને સમુદાયના અગ્રણી સભ્યો સાથે બેઠકો કરી રહ્યું છે. સોહના/પટૌડી/માનેસર વિસ્તારોમાં ઈન્ટરનેટ સેવાઓ બંધ કરી દેવામાં આવી છે.

હિંસા કેમ થઈ?
સોમવારે હરિયાણાના નૂહમાં બજરંગ દળ અને વિશ્વ હિન્દુ પરિષદ (VHP) દ્વારા કાઢવામાં આવેલા શોભાયાત્રા દરમિયાન થયેલી અથડામણમાં બે હોમગાર્ડ સહિત ત્રણ લોકો માર્યા ગયા હતા અને ઘણા ઘાયલ થયા હતા. પોલીસે જણાવ્યું હતું કે યુવાનોના એક જૂથ દ્વારા સરઘસને લગભગ 5 કિમી દૂર અટકાવવામાં આવ્યું હતું અને મંદિર તરફ પાછા ફરી રહેલા સહભાગીઓ પર પથ્થરમારો કરવામાં આવ્યો હતો. અધિકારીઓએ જણાવ્યું હતું કે સરઘસમાં સામેલ “એક કે બે કાર” ને પણ સળગાવી દેવામાં આવી હતી અને ભારે પોલીસ તૈનાત હોવા છતાં હિંસા ચાલુ રહી હતી.

આ પણ વાંચો-રાહુલ ગાંધી સવારે 4 વાગે આઝાદપુર મંડી પહોંચ્યા, શાકભાજીના ભાવ પર લોકો સાથે વાત કરી