મુસ્લિમ મહિલાઓ UCC અંગે શું વિચારે છે? સર્વેમાં થયો ચોંકાવનારો ખુલાસો

દેશમાં યુનિફોર્મ સિવિલ કોડ (યુસીસી)ની ચર્ચા જોર પકડી રહી છે. કાયદા પંચે ધાર્મિક સંગઠનો અને લોકોને UCC પર પોતાનો અભિપ્રાય આપવા કહ્યું છે, જેનો છેલ્લો દિવસ 14 જુલાઈ છે. યુનિફોર્મ સિવિલ કોડનો સૌથી વધુ વિરોધ મુસ્લિમ ધર્મગુરુઓ તરફથી થઈ રહ્યો છે. News18 એ મુસ્લિમ મહિલાઓ UCC વિશે શું વિચારે છે તે અંગે એક સર્વે કર્યો છે, જેમાં ચોંકાવનારા જવાબો સામે આવ્યા છે.

કેવા પ્રશ્નો છે સર્વેમા ?

સર્વેમાં દેશના 25 રાજ્યો અને કેન્દ્રશાસિત પ્રદેશોમાં 8035 મહિલાઓની પૂછપરછ કરવામાં આવી હતી અને યુસીસીમાં સમાવી શકાય તેવા મુદ્દાઓ વિશે તેઓ શું વિચારે છે તે જાણવાનો પ્રયાસ કરવામાં આવ્યો હતો. સર્વેમાં મહિલાઓને 7 મુખ્ય પ્રશ્નો પૂછવામાં આવ્યા હતા. આ પ્રશ્નોમાં UCCનો કોઈ સીધો ઉલ્લેખ ન હતો, પરંતુ તમામ પ્રશ્નો આ જ વિષય સાથે સંબંધિત હતા જે તેના હેઠળ આવરી શકાય છે. આવો જોઈએ મુસ્લિમ મહિલાઓએ આના પર શું જવાબો આપ્યા છે. સર્વેમાં અલગ-અલગ શિક્ષણ અને વયજૂથના આંકડા પણ આપવામાં આવ્યા છે.

1- બધા માટે એક કાયદો

મહિલાઓને પૂછવામાં આવ્યું હતું કે શું તેઓ લગ્ન, તલાક, બાળક દત્તક લેવા અને ઉત્તરાધિકાર જેવી અંગત બાબતોમાં દેશના તમામ લોકો માટે એક કાયદાનું સમર્થન કરે છે. આ પ્રશ્નનો 67.2 ટકા મુસ્લિમ મહિલાઓએ ‘હા’માં જવાબ આપ્યો છે. 25.4 ટકા મુસ્લિમ મહિલાઓએ કહ્યું કે તેઓ તેનું સમર્થન કરતી નથી, જ્યારે 7.4 ટકાએ તેના વિશે કોઈ અભિપ્રાય નથી.

2- મુસ્લિમ પુરુષોના 4 લગ્ન

મુસ્લિમ મહિલાઓને પૂછવામાં આવ્યું કે શું મુસ્લિમ પુરુષોએ 4 મહિલાઓ સાથે લગ્ન કરવા જોઈએ. સર્વેમાં સામેલ 76.5 ટકા મહિલાઓએ 4 પત્નીઓ રાખવાનો વિરોધ કર્યો છે. 17.4 ટકા તેની તરફેણમાં છે જ્યારે 6.1 ટકા મહિલાઓએ કોઈ જવાબ આપ્યો નથી. મહત્વનું છે કે 78.6 ટકા સ્નાતક પાસ મહિલાઓ તેની વિરુદ્ધ છે.

આ પણ વાંચો: સાઉદી અરેબિયાના ઈસ્લામિક નેતાએ અજીત ડોભાલ સામે ભારતીય મુસ્લિમો પર શું કહ્યું?

3- મહિલાઓ અને પુરૂષોને મિલકતમાં સમાન અધિકાર

સંપત્તિમાં પુત્ર અને પુત્રીઓને સમાન અધિકાર આપવાના પ્રશ્ન પર 82.3 ટકા મુસ્લિમ મહિલાઓએ તેનું સમર્થન કર્યું છે. માત્ર 11.1 ટકા મહિલાઓએ ‘ના’ માં જવાબ આપ્યો છે, જ્યારે 6.6 ટકા મહિલાઓ આ અંગે સ્પષ્ટ નથી.

4- તલાક બાદ લગ્ન (હલાલા અંગે)

73.7 ટકા મુસ્લિમ મહિલાઓ ઈચ્છે છે કે છૂટાછેડા પછી મુસ્લિમ યુગલોને કોઈપણ પ્રતિબંધ કે શરતો વિના ફરીથી લગ્ન કરવાનો અધિકાર મળવો જોઈએ. 18 ટકા મહિલાઓ એવું નથી વિચારતી અને તેમણે ‘ના’ માં જવાબ આપ્યો છે. 8.3 ટકા મહિલાઓએ કોઈ અભિપ્રાય આપ્યો નથી. જો ગ્રેજ્યુએટ મહિલાઓના આંકડા જોઈએ તો 79 ટકા કોઈ પણ શરત વગર ફરીથી લગ્ન કરવા માંગે છે. આપને જણાવી દઈએ કે મુસ્લિમ સમુદાયમાં તલાક (છૂટાછેડા) પછી, પતિ-પત્નીને પુનર્લગ્ન માટે હલાલાની પ્રક્રિયામાંથી પસાર થવું પડે છે. જેનો ઘણી મુસ્લિમ મહિલાઓ વિરોધ કરી રહી છે.

આ પણ વાંચો: મુસ્લિમ વર્લ્ડ લીગના મહાસચિવે ભારતના કર્યા વખાણ, કહ્યું મે આવો દેશ બીજે ક્યાંય નથી જોયો

5- દત્તક લેવામાં ધર્મની ભૂમિકા

શું દત્તક લેવામાં ધર્મને ધ્યાનમાં લીધા વિના બાળક દત્તક લેવાની મંજૂરી આપવી જોઈએ? 64.9 ટકા મહિલાઓએ આ પ્રશ્નનો જવાબ ‘હા’માં આપ્યો છે. 22.9 ટકા મહિલાઓ તેની વિરુદ્ધ છે, જ્યારે 12.2 ટકાએ કહ્યું કે તેઓ જાણતા નથી અથવા તેઓ કંઈ કહી શકતા નથી.

6- વસીયતનો અધિકાર

શું તમામ પુખ્ત ભારતીયો તેમની ઈચ્છા મુજબ તેમની મિલકત વસીયત કરવા માટે સ્વતંત્ર હોવા જોઈએ? 69.3 ટકા મુસ્લિમ મહિલાઓએ તેનું સમર્થન કર્યું છે. 16.6 ટકા મહિલાઓ તેની વિરુદ્ધ છે. જ્યારે, 14.1 ટકાએ કહ્યું કે તેઓ જાણતા નથી.

7- લગ્નની ઉંમર

સર્વેમાં પુરુષ અને મહિલા બંને માટે લગ્નની ઉંમર વધારીને 21 વર્ષ કરવા અંગે પ્રશ્ન પૂછવામાં આવ્યો તો 78.7 મુસ્લિમ મહિલાઓએ તેનું સમર્થન કર્યું. 16.6 ટકા મહિલાઓ એવી છે જે તેને સમર્થન આપતી નથી. કોઈ અભિપ્રાય ન આપવાવાળી સ્ત્રીઓની ટકાવારી 4.7 છે.

આ પણ વાંચો: Chandrayaan 3 Launch Live: ભારતે રચ્યો ઇતિહાસ! ચંદ્રયાન-3 થયું લોન્ચ