- અંતિમ મેચમાં સ્કોટલેન્ડને હરાવ્યું હતું
- 278 રનનો લક્ષ્યાંક મેળવ્યો હતો
- અગાઉ સ્કોટલેન્ડે સર્જયા હતા બે અપસેટ
નેધરલેન્ડની ટીમે ભારતમાં યોજાનાર ODI વર્લ્ડ કપમાં પોતાની જગ્યા બનાવી લીધી છે. તેઓએ ઝિમ્બાબ્વેમાં ચાલી રહેલા વર્લ્ડ કપ ક્વોલિફાયરના સુપર સિક્સ રાઉન્ડમાં સ્કોટલેન્ડને હરાવ્યું. નેધરલેન્ડની ટીમ વર્લ્ડ કપમાં ભાગ લેનારી 10મી ટીમ બની હતી. તેના માટે ક્વોલિફાય કરનાર તમામ ટીમો હવે નક્કી થઈ ગઈ છે. શ્રીલંકાએ પણ ક્વોલિફાઈંગ રાઉન્ડમાંથી પોતાની જગ્યા બનાવી લીધી છે. હવે તે વર્લ્ડ કપ ક્વોલિફાયર ટાઇટલ જીતવા માટે શ્રીલંકા સામે ફાઇનલમાં રમશે. શ્રીલંકાની ટીમ પહેલા જ ક્વોલિફાય કરી ચૂકી છે.
વેસ્ટ ઈન્ડિઝ અને ઝિમ્બાબ્વેને હરાવ્યા હતા
અગાઉ સ્કોટલેન્ડે વેસ્ટ ઈન્ડિઝ અને ઝિમ્બાબ્વેને હરાવીને આ ટુર્નામેન્ટમાં અપસેટ સર્જ્યો હતો. વેસ્ટ ઈન્ડિઝ અને ઝિમ્બાબ્વેની ટીમો તેમની સામેની હારને કારણે બહાર થઈ ગઈ હતી. સ્કોટલેન્ડે આ બે ટીમો પર જીત સાથે તેમનું સ્થાન લગભગ સીલ કરી દીધું હતું, પરંતુ અંતિમ અવરોધને પાર કરવામાં અસમર્થ હતા. તેમને દરેક કિંમતે નેધરલેન્ડ સામે જીતની જરૂર હતી. સ્કોટિશ ટીમ જીતની હેટ્રિક નોંધાવી શકી ન હતી અને વર્લ્ડ કપની ટિકિટ મેળવી શકી ન હતી.
નેધરલેન્ડ અગાઉ 4 વર્લ્ડકપ રમી ચૂકી છે
સ્કોટ એડવર્ડ્સના નેતૃત્વમાં નેધરલેન્ડે વર્લ્ડ કપ ક્વોલિફાયરની મહત્ત્વપૂર્ણ મેચમાં સ્કોટલેન્ડને ચાર વિકેટે હરાવીને આ સિદ્ધિ મેળવી હતી. નેધરલેન્ડની ટીમ પાંચમી વખત ODI વર્લ્ડ કપ રમવા જઈ રહી છે. આ પહેલા તે 1996, 2003, 2007 અને 2011નો વર્લ્ડ કપ રમી ચુકી છે. નેધરલેન્ડે વર્લ્ડ કપ માટે ક્વોલિફાય થવા માટે 44 ઓવરમાં લક્ષ્ય હાંસલ કરવાનું હતું, તો જ તેનો નેટ-રનરેટ સ્કોટલેન્ડ કરતા સારો હોઈ શકે છે. પરંતુ ડચ ટીમે 42.5 ઓવરમાં 278 રનનો લક્ષ્યાંક હાંસલ કરી લીધો હતો. બુલાવાયોમાં રમાયેલી આ મેચમાં નેધરલેન્ડની જીતનો હીરો બાસ ડી લીડે રહ્યો હતો. ડી લીડેએ 92 બોલમાં 123 રન બનાવ્યા જેમાં સાત ચોગ્ગા અને પાંચ છગ્ગાનો સમાવેશ થાય છે. એટલું જ નહીં, ડી લીડે બોલિંગ વખતે પણ પાંચ વિકેટ લીધી હતી.
આ 10 ટીમો વર્લ્ડ કપમાં ભાગ લેશે
ODI વર્લ્ડ કપ 2023માં કુલ દસ ટીમો ભાગ લેવા જઈ રહી છે. યજમાન ભારત ઉપરાંત ન્યુઝીલેન્ડ, ઈંગ્લેન્ડ, ઓસ્ટ્રેલિયા, પાકિસ્તાન, દક્ષિણ આફ્રિકા, બાંગ્લાદેશ અને અફઘાનિસ્તાને આ ટૂર્નામેન્ટ માટે પોતપોતાના સ્થાનની પુષ્ટિ કરી હતી. અન્ય બે ટીમોનો નિર્ણય ઝિમ્બાબ્વેમાં આયોજિત વર્લ્ડ કપ ક્વોલિફાયર દ્વારા થવાનો હતો. હવે શ્રીલંકા અને નેધરલેન્ડે વર્લ્ડ કપ ક્વોલિફાયર દ્વારા આ સિદ્ધિ મેળવી છે.
