શું ચિરાગ પાસવાન, ચંદ્રાબાબુ નાયડુ, સુખબીર બાદલની પાર્ટી NDAમાં જોડાશે? ભાજપે 18 જુલાઈએ બોલાવી ગઠબંધનની બેઠક
નવી દિલ્હી: દેશમાં યોજાનારી આગામી સામાન્ય ચૂંટણીમાં એક વર્ષથી પણ ઓછો સમય બાકી છે. આવી સ્થિતિમાં તમામ મુખ્ય પાર્ટીઓએ તૈયારીઓ શરૂ કરી દીધી છે. ભાજપ સામે ચૂંટણી મેદાનમાં એકસાથે આવવાના હેતુથી વિપક્ષી પાર્ટીઓ પણ મહાગઠબંધન બનાવવાનો પ્રયાસ કરી રહી છે. જ્યારે ભાજપમાં પણ બેઠકોનો દોર ચાલી રહ્યો છે. દરમિયાન હવે 18મી જુલાઈએ NDAની મોટી બેઠક બોલાવવામાં આવી છે. સૂત્રોના જણાવ્યા અનુસાર આ બેઠક દિલ્હીની અશોકા હોટલમાં યોજાશે.
આ બેઠકમાં લાંબા સમયથી NDAથી અલગ ચાલી રહેલા અકાલી દળ તરફથી સુખબીર બાદલ, LJPના ચિરાગ પાસવાન સામેલ થશે. ચંદ્રબાબુ નાયડુની ટીડીપી પણ બેઠકમાં ભાગ લઈ શકે છે. સુખબીર બાદલ અને ચિરાગ પાસવાને બેઠકમાં હાજરી આપવા માટે સંમતિ આપી દીધી છે. એનડીએની બેઠકમાં કેટલાક નવા પક્ષો પણ હાજરી આપી શકે છે.
યુપીના અનેક નેતાઓને મિશન 2024 માટે મળશે નવી જવાબદારી
બીજેપી યુપી અધ્યક્ષ ભૂપેન્દ્ર ચૌધરી અને સંગઠન મહાસચિવ ધરમપાલ સિંહની દિલ્હીમાં ભાજપના રાષ્ટ્રીય અધ્યક્ષ જેપી નડ્ડા અને સંગઠન મહાસચિવ બીએલ સંતોષ સાથે બેઠક થશે. આ બેઠકમાં યુપી ભાજપમાંથી જેપી નડ્ડાની ટીમમાં કોને સામેલ કરવામાં આવશે અને મોદી કેબિનેટના સંભવિત વિસ્તરણમાં કોને સામેલ કરવામાં આવશે તેના નામોની યાદી સોંપવામાં આવશે. કેન્દ્રીય નેતૃત્વએ આ બંને સંગઠન-સરકારના સંભવિત વિસ્તરણ માટે યુપી ભાજપ પાસેથી નામો માંગ્યા છે.
ભાજપ મિશન 2024 માટે દરેક મોરચે કામ કરી રહી છે. મોદી કેબિનેટમાંથી ટીમ નડ્ડામાં પરિવર્તનનો અવાજ આ કવાયતની એક કડી છે. પાર્ટીના કેન્દ્રીય સંગઠનમાં ફેરફારને લઈને જે નામોની ચર્ચા થઈ રહી છે તેમાંથી ઘણા યુપીના છે, આ ચહેરાઓમાં લાંબો સંગઠનાત્મક અનુભવ, યોગી સરકારના એક મંત્રી અને ઘણા પૂર્વ મંત્રીઓ પણ સામેલ છે. જેપી નડ્ડાના કાર્યકાળના દોઢ વર્ષના વિસ્તરણમાં તેમની ટીમમાં કોઈ ફેરફાર કરવામાં આવ્યો નથી.
આ પણ વાંચો-દેશના સાત રાજ્યોને મળશે નવા મુખ્ય ન્યાયાધીશ, જાણો ક્યા છે એ રાજ્યો?
