ઈમરાન ખાન પર પંજો કસવા પાકિસ્તાન સરકારે અડધી રાત્રે કાયદામાં કર્યો ફેરફાર

કરાચી: પાકિસ્તાન સરકારે ભ્રષ્ટાચાર વિરોધી કાયદામાં રાતોરાત ફેરફાર કર્યા છે. ઈમરાન ખાન ભ્રષ્ટાચાર સંબંધિત કેસમાં પૂછપરછ માટે હાજર થયા તેના થોડા કલાકો પહેલા જ આ ફેરફારો કરવામાં આવ્યા છે.

એવું માનવામાં આવે છે કે આ ફેરફારોનો હેતુ ઇમરાન ખાનને દબાવવાનો છે. પાકિસ્તાનના રાષ્ટ્રપતિ આરિફ અલ્વીની ગેરહાજરીમાં કાર્યવાહક રાષ્ટ્રપતિ સાદિક સંજરાણીએ વટહુકમ બહાર પાડ્યો છે.

આ વટહુકમ હેઠળ નેશનલ એકાઉન્ટેબિલિટી બ્યુરો એટલે કે એનએબીને તપાસ દરમિયાન શંકાસ્પદ વ્યક્તિની ધરપકડ કરવાની સત્તા આપવામાં આવી છે અને એનએબી કોર્ટને પણ એવી સત્તા આપવામાં આવી છે કે તે શંકાસ્પદ વ્યક્તિને અટકાયતમાં લીધા બાદ 30 દિવસની અંદર અટકાયત માટે રિમાન્ડ પર મોકલી શકે છે. પહેલા આ સમયગાળો 15 દિવસનો હતો.

આ વટહુકમ પાકિસ્તાનના વડાપ્રધાન શાહબાઝ શરીફની સલાહ પર લાવવામાં આવ્યો છે. આ ફેરફારો મધ્યરાત્રિએ કરવામાં આવ્યા છે. જે કેસમાં ઈમરાન ખાને NAB સમક્ષ હાજર થવું પડ્યું તે અલ-કાદિર ટ્રસ્ટ સાથે સંબંધિત છે. આ ટ્રસ્ટે ઈમરાન ખાન અને તેમની પત્ની બુશરા બીબી પર 50 અબજ રૂપિયાના ભ્રષ્ટાચારનો આરોપ લગાવ્યો છે.

ઈમરાન ખાને આ આરોપોને ફગાવી દીધા છે અને કહ્યું છે કે તેમને રાજકીય કારણોસર નિશાન બનાવવામાં આવી રહ્યા છે. જોકે મંગળવારે ઈમરાન ખાનને અન્ય એક કેસમાં ઈસ્લામાબાદ હાઈકોર્ટમાંથી રાહત મળી છે.

ઈસ્લામાબાદ હાઈકોર્ટના ચીફ જસ્ટિસ અમીર ફારુકે તોશાખાના કેસમાં ઈમરાન ખાન વિરુદ્ધ ચાલી રહેલા ફોજદારી કેસને અસ્વીકાર્ય ગણાવ્યો છે.

આ પણ વાંચો- શી જિનપિંગ અને શહેબાઝ શરીફની હાજરીમાં બોલ્યા પીએમ મોદી- કેટલાક દેશ બોર્ડર પાર…!