અમરનાથ યાત્રાનો ઉલ્લેખ કરતા મહેબૂબા મુફ્તીએ કહ્યું, ‘કાશ્મીરિયત બતાવવાની આ સુવર્ણ તક છે’

અમરનાથની પવિત્ર યાત્રા આવતા મહિનાથી શરૂ થવા જઈ રહી છે. આ અંગે બુધવારે (21 જૂન) PDP ચીફ મહેબૂબા મુફ્તીનું નિવેદન સામે આવ્યું છે. જેમાં તેમણે તેમની પાર્ટીના કાર્યકર્તાઓને આ યાત્રાને સમર્થન આપવા માટે કહ્યું છે. આ સાથે પૂર્વ મુખ્યમંત્રીએ કહ્યું છે કે યાત્રિકોની સેવા કરીને દેશને કાશ્મીરિયત બતાવવાની આ એક સુવર્ણ તક છે.

અમરનાથ યાત્રીઓની કાળજીમાં કોઈ કમી નહીં રાખીએ: મહેબૂબા મુફ્તી

સમાચાર એજન્સી PTI અનુસાર, તેમણે દક્ષિણ કાશ્મીરના અનંતનાગ જિલ્લો અને ગાંદરબલના પાર્ટીના પદાધિકારીઓને તેમના કાર્યકરોને આગામી અમરનાથ યાત્રાને સમર્થન આપવા માટે આમંત્રિત કર્યા હતા. પત્રકારો સાથે વાત કરતાં મહેબૂબા મુફ્તીએ કહ્યું કે યાત્રીઓ અમારા મહેમાન છે, તેમની કાળજીમાં કોઈ કમી ન હોવી જોઈએ.

‘ઘાટીએ ભાઈચારાનો સંદેશ આપ્યો’

તેમણે આગળ કહ્યું, “આ અમારી પરંપરા રહી છે. જ્યારે દેશમાં હિન્દુ-મુસ્લિમ સંબંધોને સાંપ્રદાયિક બનાવવાના પ્રયાસો થઈ રહ્યા છે. આવી સ્થિતિમાં ખીણમાં રહેતા લોકોએ દેશને ભાઈચારાનો સંદેશ આપ્યો છે. આજે આ અમરનાથ યાત્રા અમારા માટે આખા દેશને ફરી એકવાર કાશ્મીરિયતની યાદ અપાવવાની સુવર્ણ તક છે.”

પીડીપીના વડાએ વધુમાં કહ્યું, “હું પાર્ટીના તમામ કાર્યકર્તાઓને અપીલ કરું છું કે તેઓ આ અમરનાથ યાત્રાને સફળ બનાવે, યાત્રીઓનું સ્વાગત કરે અને તેમને દરેક રીતે મદદ કરે.”

મહેબૂબા મુફ્તીએ સરકારને પણ કરી અપીલ
આ સાથે તેમણે સરકારને અપીલ કરી છે કે સ્થાનિક લોકોને કોઈ અસુવિધા ન થાય તે માટે વ્યવસ્થા કરવામાં આવે અને યાત્રીઓને પણ અગવડ ન પડે તેવી વ્યવસ્થા કરવામાં આવે.

આ પણ વાંચો: NCERT પુસ્તકોમાંથી ડાર્વિનની થિયરી હટાવવા પર શિક્ષણ મંત્રીએ શું કહ્યું?