મહેસાણાના વડ્સમાં કુદરતી હાજતે ગયેલી પરિણીતાને જેઠે શારીરિક અડપલાં કર્યા

મહેસાણાઃ વડ્સમાં ગામની સીમમાં કુદરતી હાજતે ગયેલી પરિણીતા સાથે તેના જેઠે શારીરિક અડપલા કર્યા હતા. તે સમયે ઝપાઝપી થતા મહિલાના મોઢા ઉપર પથ્થર મારતા તેના બે દાંત પડી જતા લોહીલુહાણ થઇ ગઇ હતી. હોબાળો થયા બાદ સાળા-બનેવીએ છૂટા પથ્થર મારતાં માતા અને પુત્રને ઇજા થતા તેઓને સારવાર માટે લાઘણજ સરકારી દવાખાને ખસેડવામાં આવ્યા હતા.

વડ્સમાંથી હાડવી જવાના રસ્તે ગામની સીમમાં રહેતી 30 વર્ષીય પરિણીતા પોતાના ઘરની સામેના ખરાબામાં આવેલી બાવળની ઝાડીઓમાં કુદરતી હાજતે ગઈ હતી. તે વખતે મોકો જોઈને ત્યાં તેનો જેઠ સુરેશ નનુભાઈ દંતાણી પહોંચી ગયો હતો અને પરિણીતા સાથે શારીરિક અડપલા કરીને બીભત્સ ચેનચાળા કર્યા હતા.

ગભરાઈ ગયેલી મહિલાએ તેને ધક્કો મારી દોડવા જતા સુરેશ નામના ઇસમે એક પથ્થર ઉઠાવીને મહિલાના મોઢા પર મારતા તેના બે દાંત પડી ગયા હતા અને લોહીલુહાણ થઈ ગઈ હતી. જેથી હોબાળો થતા ત્યાં ઉપરાણું લઈને જેઠનો સાળો વિજય આવી જતા તેણે પણ પરિણીતાને ગરદાપાટુનો માર માર્યો હતો.

પરિણીતાને માર ખાતા જોઈ તેઓ દીકરો પણ ત્યાં તેને છોડાવવા આવી જતા તેણે પણ પથર મારતા તે પણ ઈજાગ્રસ્ત થયો હતો. બાદમાં ભારે હોબાળો થતા લોકો આવી જતા અડપલા કરનાર જેઠ અને તેનો સાળો ધમકીઓ આપી ત્યાંથી ફરાર થઈ ગયા હતા. બાદમાં મહિલાને સારવાર માટે મોકલી અપાઈ હતી અને અડપલાં કરનાર અને માર મારનાર જેઠ અને સાળા વિરુદ્ધ પોલીસ ફરિયાદ નોંધાવી હતી.