60 વર્ષીય અભિનેતા આશિષ વિદ્યાર્થીએ કર્યા બીજા લગ્ન, શું કહ્યુ તેમણે?

બોલિવૂડના લોકોના ફેવરિટ વિલન આશિષ વિદ્યાર્થીએ 60 વર્ષની ઉંમરે આસામની રૂપાલી બરુઆ સાથે લગ્ન કર્યા છે. આજે(25મે) આશિષે ગુરુવારે રૂપાલી સાથે રજિસ્ટર્ડ મેરેજ કર્યા છે. અભિનેતાના આ બીજા લગ્ન છે. આશિષે તેમના લગ્ન પ્રસંગે કહ્યુ હતુ કે, ‘જીવનના આ તબક્કે રૂપાલી સાથે લગ્ન કરવા એ મારા માટે એક્સ્ટ્રા ઓર્ડિનરી ફિલિંગ્સ છે.’ આશિષ અને રૂપાલીના લગ્નની તસવીરો હાલ સોશિયલ મીડિયા પર વાયરલ થઈ રહી છે.

આ લગ્નમાં ફક્ત તેમના પરિવાર અને નજીકના મિત્રો જ હાજર રહ્યા

ગુરુવારે કોલકાતામાં યોજાયેલા આ લગ્નમાં ફક્ત તેમના પરિવાર અને નજીકના મિત્રો જ હાજર રહ્યા હતા. મળતી માહિતી મુજબ લગ્ન બાદ હવે આ કપલ મિત્રો અને સંબંધીઓ માટે રિસેપ્શન પાર્ટીનું આયોજન કરશે. આશિષની બીજી પત્નીની વાત કરીએ તો તે આસામની ફેશન ઈન્ડસ્ટ્રી સાથે જોડાયેલી છે. મળતી માહિતી મુજબ, ગુવાહાટીની રહેવાસી રૂપાલી કોલકાતામાં એક ફેશન સ્ટોરની માલિક પણ છે.

બંન્નેએ કોર્ટ મેરેજ કર્યા

આશિષે કહ્યુ ‘અમે સવારે કોર્ટ મેરેજ કર્યા છે અને સાંજે અમે ગેટ-ટુગેધર કરીશું.’ પોતાની લવ સ્ટોરી વિશે મીડિયા સાથે વાત કરતાં આશિષે કહ્યું, ‘અરે, આ એક લાંબી કહાની છે. તે ક્યારેક સમય મળ્યે તમને જણાવીશુ.’ આ અંગે રૂપાલીએ કહ્યું, ‘અમે થોડા સમય પહેલા જ મળ્યા હતા અને અમે અમારા સંબંધોને આગળ વધારવાનો નિર્ણય કર્યો. અમે બંને ઈચ્છતા હતા કે અમારા લગ્ન ખૂબ જ સાદાઈથી થાય.

આશિષના પ્રથમ લગ્ન અભિનેત્રી રાજોશી વિદ્યાર્થી સાથે થયા હતા

રૂપાલી પહેલા આશિષના લગ્ન અભિનેત્રી રાજોશી વિદ્યાર્થી સાથે થયા હતા. રાજોશી એક પ્રખ્યાત અભિનેત્રી, ગાયિકા અને થિયેટર કલાકાર છે. આશિષની વાત કરીએ તો આશિષે 11 થી વધુ ભાષાની ફિલ્મોમાં કામ કર્યું છે. તે વર્ષોથી ફિલ્મી દુનિયાનો હિસ્સો છે. તે અત્યાર સુધી 200 થી વધુ ફિલ્મોમાં જોવા મળ્યા છે. તે તમિલ, કન્નડ, મલયાલમ, અંગ્રેજી ભાષાની ફિલ્મોમાં પણ દેખાયા છે. આશિષ વિદ્યાર્થી ‘બિચ્છુ’, ‘ઝિદ્દી’, ‘અર્જુન પંડિત’, ‘વાસ્તવ’, ‘બાદલ’ જેવી ઘણી ફિલ્મોમાં નેગેટિવ રોલમાં જોવા મળ્યા હતા. તેઓ તાજેતરમાં જ અભિનેતા અમિતાભ બચ્ચન અને રશ્મિકા મંદન્ના સ્ટારર ફિલ્મ ‘ગુડબાય’માં જોવા મળ્યા હતા. અભિનેતા સોશિયલ મીડિયામાં છેલ્લા કેટલાક સમયથી ખૂબ જ સક્રિય છે અને ફૂડ બ્લોગિંગ પણ કરે છે. તેમની પોતાની You Tube ચેનલ પણ છે.

આ પણ વાંચો: વધુ એક ફિલ્મનો વિરોધ, જાણો કઈ અપકમિંગ મુવી માટે અમદાવાદમાં બજરંગ દળે મચાવ્યો હંગામો