સુપ્રીમ કોર્ટે મધ્યપ્રદેશના કુનો નેશનલ પાર્ક (KNP)માં બે મહિનામાં ત્રણ ચિત્તાઓના મોત પર ચિંતા વ્યક્ત કરી છે. નિરાશા વ્યક્ત કરીને, સુપ્રીમ કોર્ટે ગુરુવારે કેન્દ્ર સરકારને ચિત્તાઓને રાજસ્થાનમાં સ્થાનાંતરિત કરવા અંગે વિચારણા કરવા જણાવ્યું હતું. જસ્ટિસ બીઆર ગવઈ અને સંજય કરોલની બેન્ચે જણાવ્યું હતું કે નિષ્ણાતો અને મીડિયા લેખોના અહેવાલો દર્શાવે છે કે કુનો નેશનલ પાર્કમાં મોટી સંખ્યાઓમાં ચિત્તાઓ સમાવવા માટે પૂરતી વ્યવસ્થા નથી. તેમણે સૂચન કર્યું હતું કે કેન્દ્ર સરકારે તેમને અન્ય અભયારણ્યોમાં સ્થાનાંતરિત કરવાનું વિચારવું જોઈએ. સુપ્રીમ કોર્ટે જણાવ્યું હતું કે બે મહિના કરતાં ઓછા સમયમાં ત્રણ મૃત્યુ (ચિત્તાના) ગંભીર ચિંતાનો વિષય છે. એવું લાગે છે કે આટલા બધા ચિત્તાઓ માટે કુનો પાર્ક પૂરતો નથી.
સુપ્રીમ કોર્ટે કેન્દ્ર સરકારને કહ્યું કે તમે રાજસ્થાનમાં યોગ્ય જગ્યા કેમ નથી શોધતા ? રાજસ્થાનમાં વિપક્ષી પાર્ટીનું શાસન હોવાનો અર્થ એ નથી કે તમે તેના પર વિચાર ન કરી શકો. વધારાના સોલિસિટર જનરલ ઐશ્વર્યા ભાટીએ કોર્ટને માહિતી આપી હતી કે એક ટાસ્ક ફોર્સ પહેલાથી જ મૃત્યુની તપાસ કરી રહી છે અને તેમને અન્ય અભયારણ્યમાં સ્થાનાંતરિત કરવાની સંભાવના પર વિચારણા કરી રહી છે. જણાવી દઈએ કે કુનો નેશનલ પાર્કમાં જીવ ગુમાવનારા અનેક ચિત્તાઓ પૈકી નામીબિયાની સાશા નામની માદા ચિત્તાનું 27 માર્ચે કિડનીની બિમારીના કારણે મોત થયું હતું. દક્ષિણ આફ્રિકાના ઉદયનું 23 એપ્રિલના રોજ હૃદયરોગના હુમલાથી મૃત્યુ થયું હતું, જ્યારે બીજી દક્ષિણ આફ્રિકાની માદા ચિત્તાનું 9 મેના રોજ ચિત્તાઓ વચ્ચેના હિંસક હુમલામાં મૃત્યુ થયું હતું.
આ પણ વાંચો : પત્નીની જાસૂસી કરવા પતિએ લગાવ્યા CCTV, પછી જે થયું તે જાણી રહેશો દંગ !
પ્રથમ ચિત્તાને પહેલાથી અસ્તિત્વમાં રહેલી કિડનીની બિમારી હતી, અને તેમણે પ્રશ્ન કર્યો હતો કે ચિત્તાને આયાત માટે કેવી રીતે મંજૂરી આપવામાં આવી હતી. તે પહેલાથી જ રોગથી પીડિત હતો. ભાટીએ કોર્ટને ખાતરી આપી હતી કે તમામ મૃત ચિત્તાઓનું પોસ્ટમોર્ટમ કરવામાં આવ્યું છે અને ટાસ્ક ફોર્સ આ બાબતની સંપૂર્ણ તપાસ કરી રહી છે. ભાટીએ ચાર ચિત્તાના બચ્ચાઓના સફળ જન્મ પર પણ પ્રકાશ પાડ્યો હતો, જે દર્શાવે છે કે તેઓ કુનોમાં સારી રીતે કામ કરી રહ્યા છે. ખંડપીઠે કહ્યું કે તમે વિદેશથી ચિત્તા લાવો છો તે સારી વાત છે. પરંતુ તેમને સુરક્ષિત રાખવાની જરૂર છે. તેમને યોગ્ય આવાસ આપવાની જરૂર છે. બેન્ચે કહ્યું કે તે સરકાર પર કોઈ દોષ નથી લગાવી રહી પરંતુ મૃત્યુ અંગે ચિંતા વ્યક્ત કરી રહી છે.
