સૌરવ ગાંગુલીને હવે ‘Y’ને બદલે ‘Z’ કેટેગરીની સુરક્ષા, જાણો કેમ બંગાળ સરકારે લીધો આ નિર્ણય

પશ્ચિમ બંગાળ સરકારે ભારતીય ક્રિકેટ ટીમના પૂર્વ કેપ્ટન સૌરવ ગાંગુલીની સુરક્ષા વધારવાનો નિર્ણય કર્યો છે. મમતા બેનર્જી સરકાર હવે ગાંગુલીને Z શ્રેણીની સુરક્ષા આપશે. નવી સુરક્ષા વ્યવસ્થા હેઠળ, પૂર્વ બીસીસીઆઈ પ્રમુખની સુરક્ષા આઠથી દસ પોલીસકર્મીઓ દ્વારા કરવામાં આવશે. ગાંગુલીને Y-કેટેગરીના સુરક્ષા કવચ હેઠળ ત્રણ પોલીસકર્મીઓ દ્વારા રક્ષિત કરવામાં આવ્યા હતા. બેહાલામાં તેમના નિવાસસ્થાને પણ ત્રણ જ સુરક્ષાકર્મીઓ સુરક્ષા પૂરી પાડતા હતા. બીસીસીઆઈના ભૂતપૂર્વ પ્રમુખને અગાઉ ‘Y’ શ્રેણીની સુરક્ષા પૂરી પાડવામાં આવી હતી. તેની સમાપ્તિ પછી, મંગળવારે (16 મે) સરકારે ગાંગુલીની સુરક્ષાને અપગ્રેડ કરવાનો નિર્ણય કર્યો છે. બંગાળ સરકારના એક અધિકારીએ જણાવ્યું હતું કે, “વીવીઆઈપી સુરક્ષા પૂરી થયા બાદ પ્રોટોકોલ મુજબ સમીક્ષા કરવામાં આવી હતી. જે બાદ ગાંગુલીની સુરક્ષાને Z શ્રેણીમાં અપગ્રેડ કરવાનો નિર્ણય લેવામાં આવ્યો હતો.

આ પણ વાંચો : ‘ધીરેન્દ્ર શાસ્ત્રી’ ના ચમત્કારોનું શું છે રહસ્ય, કેમ થઈ રહી છે બાબાની ચર્ચા ?
અધિકારીઓ ગાંગુલીની ઓફિસે પહોંચ્યા
મંગળવારે, રાજ્ય સચિવાલયના પ્રતિનિધિઓ ગાંગુલીની બેહાલા ઓફિસ પહોંચ્યા હતા, જ્યાં તેઓએ કોલકાતા પોલીસ હેડક્વાર્ટર લાલબજાર અને સ્થાનિક પોલીસ સ્ટેશનના અધિકારીઓ સાથે બેઠક કરી હતી. અધિકારીએ જણાવ્યું હતું કે ગાંગુલી હાલમાં તેમની ટીમ દિલ્હી કેપિટલ્સ સાથે પ્રવાસ કરી રહ્યા છે અને 21 મેના રોજ કોલકાતા પરત ફરશે. તે દિવસથી, તેમને Z-કેટેગરીની સુરક્ષા મળવાનું શરૂ થશે.

બંગાળમાં કોને કઈ સુરક્ષા છે ?
પશ્ચિમ બંગાળમાં રાજ્યપાલ સીવી આનંદ બોઝ, મુખ્યમંત્રી મમતા બેનર્જી અને તૃણમૂલ કોંગ્રેસના સાંસદ અને રાષ્ટ્રીય સચિવ અભિષેક બેનર્જીને ઝેડ પ્લસ સુરક્ષા મળે છે. ફિરહાદ હકીમ અને મોલોય ઘટક જેવા મંત્રીઓને ઝેડ શ્રેણીની સુરક્ષા આપવામાં આવી છે. ભાજપના પશ્ચિમ બંગાળના અધ્યક્ષ સુકાંત મજુમદારને CISF સુરક્ષા સાથે Z પ્લસ સુરક્ષા મળે છે.