Air Indiaની ફ્લાઈટના કોકપીટમાં મહિલા મિત્રને બેસાડનાર પાયલટ પર સસ્પેન્ડ
Air Indiaની ફ્લાઈટના કોકપિટમાં મહિલા મિત્રને બેસાડવા બદલ પાઈલટ વિરુદ્ધ કાર્યવાહી કરવામાં આવી છે. કાર્યવાહી કરતા DGCAએ ત્રણ મહિના માટે પાઇલટનું લાઇસન્સ સસ્પેન્ડ કરી દીધું છે.
આ સાથે DGCAએ એર ઈન્ડિયાની બેદરકારી બદલ એરલાઈન્સ પર 30 લાખ રૂપિયાનો દંડ પણ લગાવ્યો છે. જણાવી દઈએ કે 27 ફેબ્રુઆરીના રોજ દુબઈથી દિલ્હી જતી ફ્લાઈટમાં પાઈલટે તેની મહિલા મિત્રને ફ્લાઈટના કોકપીટમાં બેસાડી દીધી હતી.
સીઈઓને કારણ બતાવો નોટિસ ફટકારવામાં આવી
આ પહેલા ડિરેક્ટોરેટ જનરલ ઓફ સિવિલ એવિએશન દ્વારા એર ઈન્ડિયાના સીઈઓને કારણ બતાવો નોટિસ જારી કરવામાં આવી હતી. મામલો સામે આવ્યા બાદ DGCAએ આરોપી પાયલટ વિરુદ્ધ તપાસ શરૂ કરી હતી. ડીજીસીએએ કહ્યું હતું કે પાયલોટે સલામતીના નિયમોનું ઉલ્લંઘન કર્યું હતું.
નિયમોનું ઉલ્લંઘન કર્યું
આ સિવાય એવિએશન સિક્યુરિટી હેડ હેનરી ડોનોહોને પણ આ મામલે બેદરકારી દાખવવા અને કોઈ ફરિયાદ ન નોંધવા બદલ નોટિસ મોકલવામાં આવી છે. ડિરેક્ટોરેટ જનરલ ઓફ સિવિલ એવિએશનએ જણાવ્યું હતું કે, “ફ્લાઇટના કમાન્ડિંગ પાઇલટે DGCAના નિયમોનું ઉલ્લંઘન કરીને ક્રુઝ દરમિયાન પેસેન્જર તરીકે મુસાફરી કરી રહેલા એર ઇન્ડિયાના કર્મચારીને કોકપિટમાં પ્રવેશવાની મંજૂરી આપી હતી.”
સુરક્ષા સંવેદનશીલ ભંગ હોવા છતાં…
ડીજીસીએએ જણાવ્યું હતું કે “સુરક્ષાના સંવેદનશીલ ભંગ” છતાં એર ઈન્ડિયાએ તાત્કાલિક સુધારાત્મક પગલાં લીધાં નથી. ડીજીસીએએ વધુમાં જણાવ્યું હતું કે, “સુરક્ષાના સંવેદનશીલ મુદ્દાને તાત્કાલિક અને અસરકારક રીતે સંબોધિત ન કરવા બદલ એર ઈન્ડિયા પર રૂ. 30 લાખનો દંડ લાદવામાં આવ્યો છે. એરક્રાફ્ટ રૂલ્સ 1937 હેઠળ આપવામાં આવેલી તેની સત્તાના દુરુપયોગ અને ઉલ્લંઘનને મંજૂરી આપવા બદલ PIC પાઈલટનું લાઇસન્સ ત્રણ મહિના માટે સસ્પેન્ડ કરવામાં આવ્યું છે.” આ સાથે DGCA એ કો-પાયલટને ચેતવણી આપી છે, કારણ કે તેણે પાર્ટનરની મહિલા મિત્રને કોકપિટમાં આવવાથી રોકી ન હતી.
જણાવી દઈએ કે ફ્લાઇટના કોકપીટમાં અનધિકૃત લોકોને પ્રવેશવાની મંજૂરી નથી. જો કોઈ આવું કરે છે, તો તે નિયમોનું ઉલ્લંઘન છે.
