વડાપ્રધાન નરેન્દ્ર મોદી આજે ગાંધીનગરમાં આશરે રૂ. 4,400 કરોડના પ્રોજેક્ટનું ઉદ્ઘાટન અને શિલાન્યાસ કરશે. 10:30 વાગ્યે વડાપ્રધાન ગાંધીનગરમાં અખિલ ભારતીય શિક્ષણ સંઘના 29મા દ્વિવાર્ષિક સંમેલનમાં ભાગ લેશે. આ પછી પીએમ મોદી ગાંધીનગરમાં બપોરે 12 વાગ્યે લગભગ 4,400 કરોડ રૂપિયાના વિવિધ પ્રોજેક્ટનું ઉદ્ઘાટન અને શિલાન્યાસ કરશે. વડાપ્રધાન મોદી ગિફ્ટસિટીની પણ મુલાકાત લેશે. મુલાકાત દરમિયાન પીએમ મોદી ગિફ્ટ સિટીમાં ચાલી રહેલા વિવિધ પ્રોજેક્ટની સ્થિતિની સમીક્ષા કરશે.
આ પણ વાંચો : અમદાવાદઃ વેજલપુરમાં 3 માળની ઈમારત ધરાશાયી, રેસ્ક્યૂ ઓપરેશન ચાલુ
પીએમ મોદી ગિફ્ટ સિટીમાં તેમના અનુભવ અને ભાવિ યોજનાઓને સમજવા માટે GIFT IFSC સંસ્થાઓ સાથે પણ વાતચીત કરશે. વડાપ્રધાન મોદી શહેરની મુખ્ય માળખાકીય સુવિધાઓની પણ મુલાકાત લેશે. જેમાં ‘અંડરગ્રાઉન્ડ યુટિલિટી ટનલ’ અને ‘ઓટોમેટિક વેસ્ટ કલેક્શન પ્લાન્ટ’નો સમાવેશ થાય છે. આ પ્રસંગે પીએમ મોદી પ્રધાનમંત્રી આવાસ યોજનાના લાભાર્થીઓને ઘરની ચાવીઓ પણ સોંપશે. વડાપ્રધાન મોદી PMAY (ગ્રામીણ અને શહેરી) પ્રોજેક્ટ્સનું ઉદ્ઘાટન અને શિલાન્યાસ પણ કરશે. આ સાથે તે યોજના હેઠળ બનેલા લગભગ 19,000 ઘરોના હાઉસ વોર્મિંગમાં પણ ભાગ લેશે. કાર્યક્રમ દરમિયાન તેઓ યોજનાના લાભાર્થીઓને ચાવીઓ સોંપશે. આ પ્રોજેક્ટ્સ આશરે રૂ. 1,950 કરોડના ખર્ચે બનાવવામાં આવ્યા છે.
પીએમ મોદી ગાંધીનગરમાં રૂ. 2,450 કરોડથી વધુના વિકાસ પ્રોજેક્ટનું ઉદ્ઘાટન અને શિલાન્યાસ કરશે. જેમાં શહેરી વિકાસ વિભાગ, પાણી પુરવઠા વિભાગ, માર્ગ અને પરિવહન વિભાગ અને ખાણ અને ખનીજ વિભાગના પ્રોજેક્ટનો સમાવેશ થાય છે. જે પ્રોજેક્ટ્સનું ઉદ્ઘાટન કરવામાં આવી રહ્યું છે તેમાં બનાસકાંઠા જિલ્લામાં મલ્ટી-વિલેજ પીવાના પાણી પુરવઠા યોજનાઓનું વિસ્તરણ, અમદાવાદમાં એક રિવર ઓવરબ્રિજ, નરોડા GIDC ખાતે ડ્રેનેજ કલેક્શન નેટવર્ક, મહેસાણા અને અમદાવાદ ખાતે સુએજ ટ્રીટમેન્ટ પ્લાન્ટ્સ, દહેગામ ખાતે ઓડિટોરિયમ વગેરેનો સમાવેશ થાય છે. આજે જે પ્રોજેક્ટ માટે શિલાન્યાસ કરવામાં આવશે તેમાં જૂનાગઢ જિલ્લામાં બલ્ક પાઇપલાઇન પ્રોજેક્ટ, ગાંધીનગર જિલ્લામાં પાણી પુરવઠા યોજનાઓ, ફ્લાયઓવર બ્રિજનું નિર્માણ, નવા પાણી વિતરણ સ્ટેશનો અને વિવિધ ટાઉન પ્લાનિંગ રસ્તાઓનો સમાવેશ થાય છે.
