Rajkot : મોબાઈલ શોપમાં બોમ્બ બ્લાસ્ટ કરનાર મહિલા સહિત 3ની ધરપકડ
રાજકોટ પોલીસે ગુરુવારે જણાવ્યું હતું કે શહેરની એક મોબાઈલ એસેસરીઝની દુકાનમાં 6 એપ્રિલે વિસ્ફોટ થયો હતો, જેમાં દુકાનને ભારે નુકસાન થયું હતું, કથિત રૂપે ટાઇમ બોમ્બ બનાવવા અને પ્લાન્ટ કરવા બદલ એક મહિલા સહિત ત્રણ લોકોની ધરપકડ કરી છે. પોલીસના જણાવ્યા મુજબ, હુમલા પાછળનું કારણ બે મોબાઈલ શોપ માલિકો વચ્ચેની ધંધાકીય હરીફાઈ હોવાનું કહેવાય છે.
પ્રાથમિક તપાસમાં સૌપ્રથમ પોલીસને શોર્ટ સર્કિટનો મામલો લાગતો હતો જેના કારણે દુકાનમાં આગ લાગી હતી, જો કે, રાજકોટ પોલીસ અને સીસીટીવી ફૂટેજની તપાસમાં જાણવા મળ્યું છે કે વિસ્ફોટ રમકડાની કારમાં છુપાયેલા ટાઈમર બોમ્બને કારણે થયો હતો. રાજકોટ ક્રાઈમ બ્રાન્ચના આસિસ્ટન્ટ કમિશનર ઓફ પોલીસ ભરત બસિયાએ મીડિયાને જણાવ્યું હતું કે, અમે અમારી પાસેના પ્રાથમિક દ્રષ્ટીએ પુરાવાના આધારે બોમ્બ પ્લાન્ટ કરીને દુકાનને નુકસાન પહોંચાડવા બદલ એક મહિલા સહિત ત્રણ લોકોની ધરપકડ કરી છે. ભારતીય દંડ સંહિતાની કલમ 436, 286 અને 120B અને વિસ્ફોટક પદાર્થ અધિનિયમ 1908ની કલમ 3, 5 અને 6 હેઠળ ધરપકડ કરવામાં આવી હતી. ધરપકડ કરાયેલા લોકોની ઓળખ કાલારામ ઉર્ફે કલ્પેશ ચૌધરી તરીકે થઈ છે, જે રાજકોટમાં મોબાઈલ એસેસરીઝની દુકાન ચલાવે છે, તેના સાળા શ્રવણ ચૌધરી અને બોમ્બ પ્લાન્ટ કરનાર મહિલા ડોલી છે.
આ પણ વાંચો : વલસાડ : હાઈ પ્રોફાઇલ દારૂ પાર્ટી પર પોલીસના દરોડા, ભાજપના નેતા સહિત 15 નબીરા ઝડપાયા
કલ્પેશ અને શ્રવણે મોબાઈલની બેટરી, ઈલેક્ટ્રીક વાયર, એક ઘડિયાળ અને ફટાકડામાંથી દારૂગોળોનો ઉપયોગ કરીને ટાઈમર બોમ્બ બનાવ્યો હતો, બંનેએ ટાઈમ બોમ્બ બનાવવા માટે ઓનલાઈન વીડિયો જોયા હતા. 7 એપ્રિલના રોજ ભક્તિનગર પોલીસ સ્ટેશનમાં ફરિયાદ નોંધાવનાર ગુજરાત મોબાઈલ્સના મેનેજર ભાવરામ ચૌધરીના જણાવ્યા અનુસાર, એક મહિલા 6 એપ્રિલના રોજ તેમની દુકાનમાં મોબાઈલ ફોન એસેસરી ખરીદવા માટે આવી હતી અને ટોયબોક્સ જેવું દેખાતું પેકેજ પાછળ છોડી ગઈ હતી.
