USAમાં કોરોનાને કારણે લાગુ કરેલી રાષ્ટ્રીય કટોકટીનો અંત

US સરકારે દેશમાં લાગુ કરાયેલ કોવિડ પબ્લિક હેલ્થ ઈમરજન્સી અને નેશનલ ઈમરજન્સીના અંતની જાહેરાત કરી છે. બિડેન પ્રશાસને આ વર્ષે જાન્યુઆરીમાં જાહેરાત કરી હતી કે તે કોરોનાની સ્થિતિ અને કેસોની સમીક્ષા કર્યા પછી 11 મેથી દેશમાં રાષ્ટ્રીય કટોકટીનો અંત લાવશે. જોકે, તેના એક મહિના પહેલા રાષ્ટ્રપતિએ ઈમરજન્સી હટાવવાની જાહેરાત કરી. અમેરિકામાં છેલ્લા ત્રણ વર્ષથી આ ઈમરજન્સી લાગુ હતી. ડોનાલ્ડ ટ્રમ્પ વહીવટીતંત્ર દ્વારા જાન્યુઆરી 2020માં કોરોનાના કેસ વધ્યા પછી તેનો અમલ કરવામાં આવ્યો હતો.

રાષ્ટ્રપતિ બાઈડને ઠરાવ પર હસ્તાક્ષર કર્યા

10 એપ્રિલ, 2023ના રોજ, રાષ્ટ્રપતિ બાઈડને કોરોનાને પગલે લાદવામાં આવેલી રાષ્ટ્રીય કટોકટીનો અંત લાવવાના ઠરાવ પર હસ્તાક્ષર કર્યા હતા. બાઈડને જે ઠરાવ પર હસ્તાક્ષર કર્યા છે તે હાઉસ ઓફ રિપ્રેઝન્ટેટિવ્સના સાંસદ પોલ ગોસર દ્વારા રજૂ કરવામાં આવ્યો હતો અને હાઉસમાં 229 તરફેણમાં અને 197 વિરૂદ્ધ મતોથી પસાર થયો હતો. આ પ્રસ્તાવને સેનેટમાં પણ 68-23ના માર્જિનથી પસાર કરવામાં આવ્યો હતો.

બાઈડેન દ્વારા નવા પ્રસ્તાવ પર હસ્તાક્ષર કર્યા પછી હવે અમલમાં આવેલા કાયદા હેઠળ, USમાં રાષ્ટ્રીય કટોકટી અને જાહેર આરોગ્ય કટોકટી પણ સમાપ્ત થઈ ગઈ છે. જો કે, યુએસ ઈમિગ્રેશન નીતિ પર તેની અસર અને વિદ્યાર્થી દેવાને દૂર કરવાની યોજના હજુ સ્પષ્ટ નથી.

રાષ્ટ્રીય કટોકટી દર 90 દિવસે લંબાવવામાં આવી હતી

જણાવી દઈએ કે અમેરિકામાં કોવિડ ઈમરજન્સી લાગુ થયા બાદ તેને દર 90 દિવસે લંબાવવામાં આવી રહી હતી. આ રીતે, અમેરિકામાં કોરોનાના નવા પ્રકારની અસર દેખાઈ રહી હોવાથી, હેલ્થ ઈમરજન્સીને લંબાવવામાં આવી રહી હતી. હવે જ્યારે અમેરિકામાં કોવિડની સ્થિતિ સામાન્ય છે અને સ્થિતિ નિયંત્રણમાં છે, ત્યારે યુએસ સરકારે કટોકટી સમાપ્ત કરવાનો નિર્ણય લીધો છે.

જાન્યુઆરીમાં સરકારે ત્રણ મહિના પછી કટોકટી સમાપ્ત કરવા પાછળનું કારણ આપતા કહ્યું હતું કે તે હોસ્પિટલોને તેમની ચૂકવણી વગેરે ક્લિયર કરવા માટે સમય આપશે. નિવેદનમાં કહેવામાં આવ્યું છે કે જો ઈમરજન્સી તાત્કાલિક ખતમ થઈ ગઈ હોત તો ઘણી હોસ્પિટલોને નુકસાન થયું હોત. જો કે, હોસ્પિટલોની સુધરતી સ્થિતિ અને કોરોના કેસની સમીક્ષા કર્યા પછી, બાઈડન પ્રશાસને એપ્રિલમાં એક મહિના પહેલા આ કટોકટીનો અંત લાવ્યો છે.

કોરોનાની રસી ખાનગી ક્ષેત્રને સોંપવાની તૈયારી

વ્હાઇટ હાઉસ હવે અમેરિકામાં ખાનગી ક્ષેત્રને કોરોનાની રસી સોંપવાની તૈયારી કરી રહ્યું છે. અત્યાર સુધી વેક્સીનનો ખર્ચ સરકાર ઉઠાવતી હતી, પરંતુ હવે લોકોએ મોડર્ના અને ફાઈઝર જેવી રસી માટે પ્રતિ રસી 130 ડોલરનો ખર્ચ કરવો પડી શકે છે.