- મુર્મુ આસામના પ્રવાસ દરમિયાન કરશે અનુભવ
- ભારત અને ચીન વચ્ચે ચાલી રહેલા ઝઘડામાં મોટો સંદેશ
- અગાઉ પૂર્વ રાષ્ટ્રપતિ કલામ, પ્રતિભા પાટીલ અને કોવિંદ પણ કરી ચુક્યા છે સફર
રાષ્ટ્રપતિ દ્રૌપદી મુર્મુ 8મી એપ્રિલ 2023ના રોજ એટલે કે આવતીકાલે તેજપુર એરફોર્સ સ્ટેશનથી સુખોઈ Su-30MKI ફાઈટર જેટમાં ઉડાન ભરવાના છે. ત્રણેય સેનાઓના સર્વોચ્ચ કમાન્ડર હોવાના કારણે તેમને સેનાના દળો, શસ્ત્રો અને નીતિઓ વિશે માહિતગાર કરવામાં આવે છે. રાષ્ટ્રપતિ મુર્મુ પહેલા પૂર્વ રાષ્ટ્રપતિ અને ભારત રત્ન ડૉ. એપીજે અબ્દુલ કલામ, પ્રતિભા પાટીલ અને રામનાથ કોવિંદ એરફોર્સના ફાઈટર જેટમાં ઉડાન ભરી ચૂક્યા છે. હાલ રાષ્ટ્રપતિ દ્રૌપદી મુર્મુ આસામના પ્રવાસે છે. ત્યારે અરુણાચલ પ્રદેશને લઈને ભારત અને ચીન વચ્ચે ઝઘડો ચાલી રહ્યો છે. આવી સ્થિતિમાં સુખોઈ ફાઈટર એરક્રાફ્ટમાં ઉડતા રાષ્ટ્રપતિ ભારત તરફથી એક શક્તિશાળી સંદેશ આપશે.
4 દેશોથી રક્ષણ કરે છે તેજપુર એરફોર્સ
તેજપુર એરફોર્સ બેઝ ચીન, મ્યાનમાર, બાંગ્લાદેશ અને ભૂતાન જેવા ચાર દેશોથી ભારતનું રક્ષણ કરે છે. આ પહેલા કલામ, પ્રતિભા પાટીલ અને રામનાથ કોવિંદે આ ફાઈટર જેટમાં ઉડાન ભરી હતી. પરંતુ તેમનું એરફોર્સ સ્ટેશન પુણે હતું. ઈસ્ટર્ન એર કમાન્ડ એર માર્શલ એસપી ધારકર રાષ્ટ્રપતિ દ્રૌપદી મુર્મુનું સ્વાગત કરશે. આ પ્રસંગે આસામના રાજ્યપાલ ગુલાબચંદ કટારિયા અને મુખ્યમંત્રી હિમંતા બિસ્વા સરમા પણ હાજર રહેશે.
જાણો એ ફાઈટર જેટની ખાસિયત જેમાં રાષ્ટ્રપતિ ઉડાન ભરવાના છે
સુખોઈ જબરદસ્ત ઝડપ અને જીવલેણ હુમલા માટે જાણીતું છે
સુખોઈ Su-30MKI ની લંબાઈ 72 ફૂટ, પાંખો 48.3 ફૂટ અને ઊંચાઈ 20.10 ફૂટ છે. તેનું વજન 18,400 કિલોગ્રામ છે. સુખોઈ લ્યુલ્કા L-31FP આફ્ટરબર્નિંગ ટર્બોફન એન્જિન દ્વારા સંચાલિત છે, જે તેને 123 કિલોન્યુટનની શક્તિ આપે છે. તે 2120 કિમી પ્રતિ કલાકની ઝડપે ઉડે છે. તેની લડાયક રેન્જ 3000 કિલોમીટર છે. જો ઈંધણ અધવચ્ચે મળી જાય તો તે 8000 કિલોમીટર સુધી જઈ શકે છે.
Su-30MKI પાસે અનેક પ્રકારના શસ્ત્રો સ્થાપિત કરવાની સિસ્ટમ છે
Sukhoi-Su30MKI મહત્તમ 57 હજાર ફૂટની ઊંચાઈ સુધી ઉડી શકે છે. સુખોઈ એક મિનિટમાં 59 હજાર ફૂટ સુધી જઈ શકે છે. Sukhoi-30MKI 30mm ગ્રિઝેવ-શિપુનોવ ઓટોકેનનથી સજ્જ છે. જે એક મિનિટમાં 150 રાઉન્ડ ફાયર કરે છે. મતલબ કે દુશ્મનનું વિમાન, ડ્રોન કે હેલિકોપ્ટર છટકી નહીં શકે. તેમાં 12 હાર્ડ પોઈન્ટ છે. એટલે કે, જ્યાં હથિયાર મૂકવામાં આવે છે. તેમાં 4 પ્રકારના રોકેટ લગાવી શકાય છે. ચાર પ્રકારની મિસાઇલ અને 10 પ્રકારના બોમ્બનો ઉપયોગ કરી શકાય છે અથવા આ બધાનું મિશ્રણ પણ લગાવી શકાય છે.
સુખોઈમાં લગાવેલી બ્રહ્મોસ મિસાઈલ તેને ઘાતક બનાવે છે
સુખોઈ Su-30MKI ના હાર્ડપોઈન્ટમાં હથિયારો ચલાવવા માટે વધુ સુવિધાઓ છે. જો એકથી વધુ રેક લગાવવામાં આવે તો તેમાં 14 હથિયારો લગાવી શકાય છે. તે કુલ 8130 કિલોગ્રામ વજનના હથિયારો ઉપાડી શકે છે. આ ફાઈટર જેટમાં બ્રહ્મોસ મિસાઈલ પણ તૈનાત કરી શકાય છે. ચીન પણ જાણે છે કે બ્રહ્મોસ મિસાઈલ કેટલી ઘાતક અને ઝડપી છે. જો ભારત બ્રહ્મોસથી હુમલો કરશે તો ચીનને બચાવ કરવાની તક પણ નહીં મળે.
