અમીષા પટેલની થઈ શકે છે ધરપકડ, રાંચી કોર્ટે જારી કર્યું વોરંટ, જાણો- શું છે મામલો

બોલિવૂડ એક્ટ્રેસ અમીષા પટેલ સાથે હાલ મુશ્કેલીમાં ફસાયેલી જોવા મળી રહી છે. રાંચીની સિવિલ કોર્ટે અમીષા અને તેના બિઝનેસ પાર્ટનર કૃણાલ વિરુદ્ધ છેતરપિંડી અને ચેક બાઉન્સ કેસમાં વોરંટ જારી કર્યું છે. ફરિયાદ નોંધાવનાર અજય કુમાર સિંહ ઝારખંડના ફિલ્મ નિર્માતા છે. તેમણે જ અમીષા પટેલ અને તેના સાથી વિરુદ્ધ કેસ દાખલ કર્યો હતો.

કેસની આગામી સુનાવણી 15 એપ્રિલે

રાંચીની સિવિલ કોર્ટે નારાજગી વ્યક્ત કરી છે કારણ કે અમીષા પટલે કે તેના વકીલ તેમનો કેસ રજૂ કરવા માટે સમન્સ છતાં કોર્ટમાં હાજર થયા ન હતા. તો, કેસની આગામી સુનાવણી માટે 15 એપ્રિલની તારીખ નક્કી કરવામાં આવી છે.

શું છે સમગ્ર મામલો

રાંચી જિલ્લાના હરમુના રહેવાસી અજય કુમાર સિંહે અભિનેત્રી અમીષા અને તેના બિઝનેસ પાર્ટનર વિરુદ્ધ છેતરપિંડીનો કેસ દાખલ કર્યો હતો. ફરિયાદી અનુસાર, અમીષાએ તેને દેશી મેજિક નામની ફિલ્મમાં પૈસા રોકવા માટે આમંત્રણ આપ્યું હતું. ત્યારબાદ તેણે ફિલ્મના નિર્માણ અને પ્રમોશન માટે અમીષાના બેંક ખાતામાં 2.5 કરોડ રૂપિયા ટ્રાન્સફર કર્યા. ફરિયાદી અનુસાર, ફિલ્મનું શૂટિંગ 2013માં શરૂ થયું હતું પરંતુ હજુ સુધી ફિલ્મ પૂર્ણ થઈ નથી. આ જ કારણ છે કે અજયે તેના પૈસા પાછા માંગ્યા કારણ કે અમીષા અને તેના બિઝનેસ પાર્ટનરે તેને ખાતરી આપી હતી કે ફિલ્મ પૂરી થયા પછી તેઓ તેના પૈસા વ્યાજ સાથે પરત કરશે.

અમીષા પટેલનો ચેક બાઉન્સ થયો

ફરિયાદીએ વધુમાં જણાવ્યું હતું કે વારંવારના વિલંબ બાદ અમીષાએ તેને ઓક્ટોબર 2018માં 2.5 કરોડ અને 50 લાખ રૂપિયાના બે ચેક આપ્યા હતા, જે બાઉન્સ થયા હતા. તેની સામે સીઆરપીસીની કલમ 420 અને 120 હેઠળ કેસ નોંધવામાં આવ્યો છે.