Vadodara : વડોદરામાં રામનવમીની શોભાયાત્રા દરમિયાન હિંસા બદલ 24ની અટકાયત
વડોદરા શહેરમાં સાંપ્રદાયિક રીતે સંવેદનશીલ વિસ્તારોમાં બે રામ નવમીના શોભાયાત્રા પર કથિત રીતે પથ્થરમારો કરવા બદલ પોલીસે 24 લોકોની અટકાયત કરી છે. આ ઘટનાઓ ગુરુવારે બની હતી જ્યારે રામ નવમીની ઉજવણી કરવામાં આવી હતી. વડોદરાના પોલીસ કમિશનર શમશેર સિંહે જણાવ્યું હતું કે શહેરમાં પરિસ્થિતિ નિયંત્રણમાં છે અને લોકો તેમની નિયમિત પ્રવૃત્તિઓ કરી રહ્યા છે. ગુરુવારે શહેરમાં રામ નવમીની શોભાયાત્રાઓ દરમિયાન બનેલી પથ્થરમારાની ઘટનાઓના સંબંધમાં અમે અત્યાર સુધીમાં 24 લોકોની અટકાયત કરી છે. એફઆઇઆરની નોંધણી પછી તરત જ તેમની ઔપચારિક ધરપકડ કરવામાં આવશે. પરિસ્થિતિ સંપૂર્ણપણે નિયંત્રણમાં છે અને ગઈકાલે જ સામાન્ય સ્થિતિ પુનઃસ્થાપિત કરવામાં આવી હતી, તેવું શમશેરસિંહે કહ્યું હતું.
આ પણ વાંચો : Ahmedabad : ‘મોદી હટાવો, દેશ બચાવો’ના પોસ્ટર લગાવવા બદલ 8ની ધરપકડ
શહેરના સાંપ્રદાયિક-સંવેદનશીલ વિસ્તારોમાંથી ફતેપુરા અને નજીકના કુંભારવાડામાંથી પસાર થતી રામ નવમીની બે અલગ-અલગ શોભાયાત્રાઓ પર પથ્થરમારો કરવામાં આવ્યો હતો. પોલીસ સૂત્રો મુજબ કુંભારવાડા ખાતે ટોળા દ્વારા કરવામાં આવેલા પથ્થરમારામાં બે લોકો ઘાયલ થયા હતા. મળતી માહિતી મુજબ કુંભારવાડા શોભાયાત્રામાં સ્થાનિક ભાજપ ધારાસભ્ય મનીષા વકીલ પણ હાજર હતા. કેટલાક વાયરલ વીડિયોમાં, લોકો પથ્થરબાજી દરમિયાન આશ્રય માટે દોડતા જોઈ શકાય છે, જ્યારે ભગવાન રામની પ્રતિમા લઈને આવેલા રથને પણ ભક્તો દ્વારા પથ્થરોથી બચાવવા માટે તેને સુરક્ષિત જગ્યાએ ખેંચી લેવામાં આવ્યો હતો. કેટલાક ઘાયલ લોકોએ જણાવ્યું હતું કે બદમાશોએ નજીકની ઇમારતોના ટેરેસ પરથી તેમના પર પથ્થરમારો કર્યો હતો.
આ ઘટનાના કલાકો પહેલા, ફતેપુરા વિસ્તારમાં વિશ્વ હિન્દુ પરિષદ અને બજરંગ દળ દ્વારા આયોજિત રામ નવમીની શોભાયાત્રા પર પથ્થરમારો કરવામાં આવ્યો હતો. હિંદુ સંગઠનોએ આરોપ લગાવ્યો હતો કે ભૂતકાળમાં પણ આ વિસ્તારોમાં હિંસાની આવી જ ઘટનાઓ બની હોવાનું જાણવા છતાં, આ માર્ગ પર દર વર્ષે નિકળવામાં આવતા શોભાયાત્રા પર હુમલો થયો ત્યારે પોલીસ ક્યાંય દેખાતી ન હતી. આ ઘટના બાદ, બજરંગ દળના વડોદરા એકમના વડા કેતન ત્રિવેદીએ દાવો કર્યો હતો કે દુષ્કર્મીઓએ આયોજિત કાવતરાના ભાગ રૂપે રામ નવમીની શોભાયાત્રા પર હુમલો કર્યો હતો અને ભૂતકાળમાં પણ ઘણી વખત આવી ઘટનાઓ બની હતી.
