અભિનેત્રી તાપસી પન્નુ પોતાની અદભુત સ્ટાઈલને કારણે ચર્ચામાં રહે છે. તે અવારનવાર સોશિયલ મીડિયા પર દેશના સમકાલીન મુદ્દાઓ પર પોતાના વિચારો વ્યક્ત કરે છે. પરંતુ આ દિવસોમાં તે પોતાની ફિલ્મ શાબાશ મિત્તુને લઈને ઘણી ચર્ચામાં છે. તેવામાં તેણે તેની આગામી ફિલ્મનો ટીઝર વીડિયો શેર કર્યો છે. આ વીડિયોમાં તાપસી પન્નુ ક્રિકેટરની જેમ મેદાનમાં ઉતરતી જોવા મળે છે. જો કે આ વીડિયોમાં તેનો ચહેરો દેખાતો નથી. જ્યારે તેણે ઈન્સ્ટાગ્રામ પર આ વિડિયો શેર કરીને ફિલ્મના ટ્રેલર રિલીઝ અંગે પણ ખુલાસો કર્યો છે.
આ ટીઝર વીડિયોને ઈન્સ્ટાગ્રામ પર શેર કરતા તાપસી પન્નુએ લખ્યું કે, લિજેન્ડરી મિતાલી રાજ જેણે જેન્ટ્સમેન ગેમને બદલી નાખી અને નવો ઈતિહાસ લખ્યો. શાબાશ મિત્તુનું ટ્રેલર 20 જૂને રિલીઝ થશે. તમને જણાવી દઈએ કે, શાબાશ મિત્તુ ભારતીય મહિલા ક્રિકેટ ટીમની પૂર્વ કેપ્ટન મિતાલી રાજની બાયોપિક છે.
મિતાલી રાજની 23 વર્ષની લાંબી ક્રિકેટ કારકિર્દીને આ ફિલ્મ દ્વારા સુંદર રીતે રજૂ કરવામાં આવશે. તાપસી પન્નુ ફિલ્મ શાબાશ મિત્તુમાં લીડ મિતાલી રાજની ભૂમિકામાં જોવા મળશે. પ્રિયા અવન દ્વારા લખાયેલ આ ફિલ્મનું નિર્માણ વાયકોમ 18 સ્ટુજીસના બેનર હેઠળ કરવામાં આવ્યું છે. આ ફિલ્મ 15 જુલાઈ, 2022ના રોજ સિનેમાઘરોમાં રિલીઝ થશે.
