રાહુલનું સંસદ સભ્યપદ રદ કરવા સામે SCમાં અરજી , કાયદાની આ જોગવાઈને રદ કરવાની માંગ

બદનક્ષીના કેસમાં સુરતની કોર્ટે રાહુલ ગાંધીને દોષિત ઠેરવીને 2 વર્ષની સજા ફટકારી છે. જે બાદ કોંગ્રેસના નેતાનું સંસદ સભ્યપદ રદ કરવામાં આવ્યું છે. સભ્યપદ નાબૂદ કરવાની જોગવાઈ સામે સુપ્રીમ કોર્ટમાં અરજી દાખલ કરવામાં આવી છે. કેરળની રહેવાસી આભા મુરલીધરને રાહુલ ગાંધીના કેસને ટાંકીને સુપ્રીમ કોર્ટમાં અરજી કરી છે. અરજીમાં મહિલાએ લોક પ્રતિનિધિત્વ કાયદાની કલમ 8(3)ને ગેરબંધારણીય જાહેર કરવાની માંગ કરી છે.

જણાવી દઈએ કે કેરળની વાયનાડ સંસદીય બેઠકનું પ્રતિનિધિત્વ કરી રહેલા રાહુલ ગાંધીને લોકસભાના સભ્યપદ માટે અયોગ્ય ઠેરવવામાં આવ્યા હતા. લોકસભા સચિવાલય દ્વારા જારી કરવામાં આવેલા નોટિફિકેશનમાં કહેવામાં આવ્યું છે કે તેમનો અયોગ્યતાનો આદેશ 23 માર્ચથી લાગુ થશે. નોટિફિકેશનમાં જણાવાયું છે કે રાહુલ ગાંધીને બંધારણની કલમ 102(1) અને જનપ્રતિનિધિત્વ અધિનિયમ, 1951ની કલમ 8 હેઠળ ગેરલાયક ઠેરવવામાં આવ્યા છે.

આ પણ વાંચોઃ રાહુલ ગાંધી પાસે સંસદનું સભ્યપદ ગુમાવ્યા બાદ હવે કયો રસ્તો ?

લોકપ્રતિનિધિત્વ અધિનિયમ-1951 શું કહે છે?

જનપ્રતિનિધિત્વ અધિનિયમ, 1951 હેઠળ, બે વર્ષ કે તેથી વધુ કેદની સજા પામેલા વ્યક્તિને ‘દોષિત થવાની તારીખથી’ ગેરલાયક ઠેરવવામાં આવે છે. આ સાથે, તે વ્યક્તિ સજા પૂર્ણ થયા પછી છ વર્ષ સુધી જનપ્રતિનિધિ બનવા માટે અયોગ્ય રહેશે. તે સ્પષ્ટ છે કે જો સજા યથાવત રહેશે તો તે વ્યક્તિ 8 વર્ષ સુધી કોઈ ચૂંટણી લડી શકશે નહીં.

કયા કેસમાં થઈ હતી સજા, રાહુલે શું કહ્યું?

મહત્વનું છે કે સુરતની એક કોર્ટે 23 માર્ચે કોંગ્રેસ નેતા રાહુલ ગાંધીને તેમની ‘મોદી સરનેમ’ ટિપ્પણી બદલ 2019માં દાખલ કરવામાં આવેલા ફોજદારી માનહાનિના કેસમાં બે વર્ષની જેલની સજા ફટકારી હતી. જોકે, સુનાવણી દરમિયાન જ કોર્ટે રાહુલ ગાંધીને જામીન આપ્યા હતા અને સજાના અમલ પર 30 દિવસ માટે રોક લગાવી દીધી હતી, જેથી કોંગ્રેસના નેતાઓ ચુકાદાને પડકારી શકે. તમને જણાવી દઈએ કે કર્ણાટકમાં એક જનસભાને સંબોધિત કરતી વખતે રાહુલ ગાંધીએ કહ્યું હતું કે, બધા ચોરોની સરનેમ મોદી કેમ છે?