સીબીઆઈએ બિહારના નાયબ મુખ્યમંત્રી અને આરજેડી નેતા તેજસ્વી યાદવને આજે એટલે કે 11 માર્ચે પૂછપરછ માટે બોલાવ્યા છે. એજન્સીએ તેમને નોકરી માટે જમીનના કેસમાં સમન્સ જારી કર્યું છે. એવું કહેવામાં આવ્યું છે કે અગાઉ સીબીઆઈએ 4 ફેબ્રુઆરીએ પણ સમન્સ મોકલ્યું હતું, પરંતુ તેઓ હાજર થયા ન હતા. આ પછી હવે તેને વધુ એક સમન્સ મોકલવામાં આવ્યું છે.
ગઈકાલે જ EDએ આ મામલે અનેક સ્થળોએ પાડ્યા હતા દરોડા
એક દિવસ પહેલા જ એન્ફોર્સમેન્ટ ડિરેક્ટોરેટ (ED)એ આ મામલામાં દિલ્હી અને બિહારમાં RJDના વડા લાલુ પ્રસાદ યાદવના પરિવારના સભ્યોના ઘરો પર દરોડા પાડ્યા હતા. જેમાં લાલુ યાદવની ત્રણ પુત્રીઓ અને આરજેડી નેતાઓના પરિસરનો સમાવેશ થાય છે. જણાવવામાં આવ્યું છે કે જમીનના બદલામાં નોકરીના મામલામાં EDએ આ કાર્યવાહી કરી છે. ED દ્વારા દરોડા પાડવામાં આવેલા લાલુના પરિવારના સભ્યોના પરિસરમાં લાલુની પુત્રી રાગિણી યાદવ, ચંદા યાદવ અને હેમા યાદવના નામ સામેલ છે. આ સિવાય જમીનના બદલામાં નોકરી અને IRCTC કેસમાં લાલુના નજીકના અબુ દુજાનાના પટના, ફુલવારી શરીફ, દિલ્હી-એનસીઆર, રાંચી અને મુંબઈ પરિસરમાં EDની એક ટીમ પહોંચી હતી.
લાલુ પ્રસાદ યાદવની પૂછપરછ થઈ ચૂકી છે
લાલુ પ્રસાદ યાદવની મંગળવારે સીબીઆઈની ટીમે નોકરી બદલ જમીન કેસમાં પૂછપરછ કરી હતી. સીબીઆઈની ટીમે લગભગ પાંચ કલાક સુધી લાલુ યાદવની પૂછપરછ કરી હતી. RJD સુપ્રીમોને ટીમ દ્વારા લંચ પહેલા બે કલાકથી વધુ સમય સુધી અને તેના પછી લગભગ ત્રણ કલાક સુધી પ્રશ્નો પૂછવામાં આવ્યા હતા. તે જ સમયે, આ જ કેસમાં સોમવારે લાલુની પત્ની રાબડી દેવીની પટના સ્થિત તેમના ઘરે પૂછપરછ કરવામાં આવી હતી.
