અખિલેશ યાદવ ગાંધી પરિવાર સામે ઉમેદવાર ઊભા કરશે? સપા પ્રમુખના નિવેદનનો અર્થ સમજો

2024ની લોકસભા ચૂંટણી માટે સમાજવાદી પાર્ટીએ સંપૂર્ણ તૈયારી કરી લીધી છે. આ દરમિયાન સપા પ્રમુખ અખિલેશ યાદવે એવું નિવેદન આપ્યું છે જે યુપીના રાજકારણમાં ચર્ચાનો વિષય બની ગયું છે. એક સમયે કોંગ્રેસનો ગઢ કહેવાતા અમેઠી પહોંચેલા અખિલેશ યાદવે મોટી જાહેરાત કરી છે. પૂર્વ સીએમ અખિલેશ યાદવે આગામી લોકસભા ચૂંટણીમાં નેહરુ-ગાંધી પરિવારના ગઢ ગણાતા અમેઠીથી પાર્ટીના ઉમેદવારને મેદાનમાં ઉતારવાના સંકેત આપ્યા છે. જો કે આ પહેલા સપા અમેઠી લોકસભા સીટ પરથી પોતાનો ઉમેદવાર ઉતારવાનું ટાળતી રહી છે, પરંતુ આ વખતે અખિલેશના નિવેદનથી ચર્ચા તેજ થઈ ગઈ છે કે સપા અમેઠીથી પણ ઉમેદવાર ઉભા કરી શકે છે.

અખિલેશના ટ્વીટમાં સ્પષ્ટ સંકેત

અમેઠીના પ્રવાસે ગયેલા અખિલેશે ટ્વીટમાં લખ્યું કે,’અમેઠીમાં ગરીબ મહિલાઓની દુર્દશા જોઈને ખૂબ જ દુઃખ થયું. VIP હંમેશા અહીં જીત્યા અને હાર્યા છે,છતાં અહીં હાલત આવી છે,તો બાકીના રાજ્યનું શું કહેવું. આગામી સમયમાં અમેઠી મોટા લોકોને નહીં પરંતુ મોટા દિલવાળા લોકો ચૂંટશે.સપાએ અમેઠીની ગરીબી નાબૂદ કરવાની પ્રતિજ્ઞા લીધી છે.’ અખિલેશના ટ્વીટથી સ્પષ્ટ સંકેત મળી ગયો છે કે આ લોકસભા ચૂંટણીમાં સપા અમેઠીમાંથી પણ ઉમેદવાર ઉતારી શકે છે.

સ્મૃતિ ઈરાનીએ કોંગ્રેસનો કિલ્લો તોડ્યો

અમેઠી લોકસભા મતવિસ્તાર ઘણા વર્ષોથી નેહરુ-ગાંધી પરિવારનો ગઢ માનવામાં આવે છે. જો કે, 2019ની લોકસભા ચૂંટણીમાં ભાજપના નેતા અને કેન્દ્રીય મંત્રી સ્મૃતિ ઈરાનીએ આ બેઠક પર કોંગ્રેસના પૂર્વ અધ્યક્ષ રાહુલ ગાંધીને હરાવીને કોંગ્રેસના આ કિલ્લાને તોડી પાડ્યો હતો. જણાવી દઈએ કે અમેઠીથી કોંગ્રેસના પહેલા ઉમેદવાર વિદ્યાધર બાજપાઈ હતા, ત્યારબાદ સંજય ગાંધી અને રાજીવ ગાંધીએ પણ આ સીટ જીતી હતી. ત્યારબાદ વર્ષ 1999માં સોનિયા ગાંધીએ પણ લોકસભાની ચૂંટણી જીતી હતી અને ત્યારબાદ વર્ષ 2004થી 2014 સુધી રાહુલ ગાંધી પણ આ બેઠક પરથી સાંસદ રહી ચુક્યા છે.