કેન્દ્ર સરકારે આજે 13 રાજ્યોના રાજ્યપાલોની બદલી કરી છે. મહારાષ્ટ્રના રાજ્યપાલ ભગત સિંહ કોશ્યારીનું રાજીનામું પણ સ્વીકારી લેવામાં આવ્યું છે. ઝારખંડના રાજ્યપાલ રમેશ બૈસને મહારાષ્ટ્રના રાજ્યપાલ બનાવવામાં આવ્યા છે. બીજું નામ સુપ્રીમ કોર્ટના ભૂતપૂર્વ જસ્ટિસ એસ અબ્દુલ નઝીરનું છે. તેમની આંધ્ર પ્રદેશના રાજ્યપાલ તરીકે નિમણૂક કરવામાં આવી છે. સુપ્રીમ કોર્ટમાં જસ્ટિસ અબ્દુલ નઝીરે રામ મંદિર, ટ્રિપલ તલાક જેવા મહત્વના કેસોની સુનાવણી કરી છે. પૂર્વ જસ્ટિસ નઝીર પણ રામ મંદિર મુદ્દાના ઉકેલ માટે રચાયેલી પાંચ જજોની બેન્ચમાં હતા.
સુપ્રીમ કોર્ટના ભૂતપૂર્વ જસ્ટિસ એસ અબ્દુલ નઝીર અયોધ્યા જમીન વિવાદ અને ટ્રિપલ તલાક પડકાર જેવા મહત્વપૂર્ણ અને સંવેદનશીલ કેસોની સુનાવણી કરતી બેંચનો ભાગ હતા. જસ્ટિસ નઝીર પાંચ જજોની બેન્ચમાંથી ત્રીજા જજ છે જેમને સરકાર દ્વારા નિવૃત્તિ પછીની નિમણૂક આપવામાં આવી છે. ભૂતપૂર્વ CJI રંજન ગોગોઈ, જેમણે બેંચનું નેતૃત્વ કર્યું હતું, તેમને રાજ્યસભાના સભ્ય તરીકે નામાંકિત કરવામાં આવ્યા હતા, ન્યાયમૂર્તિ અશોક ભૂષણને તેમની નિવૃત્તિના ચાર મહિના પછી, 2021 માં નેશનલ કંપની લો એપેલેટ ટ્રિબ્યુનલના અધ્યક્ષ તરીકે નિયુક્ત કરવામાં આવ્યા હતા.
