દિલ્હીમાં 20 માર્ચથી ફરી શરૂ થશે કિસાન આંદોલન : રાકેશ ટિકૈતે સભામાં કહ્યું, જમીન છીનવવાની છે તૈયારી

મુઝફ્ફરનગરના જીઆઈસી મેદાનમાં ભારતીય કિસાન યુનિયનની મહાપંચાયતનું આયોજન કરવામાં આવ્યું હતું. જેમાં મોટી સંખ્યામાં ખેડૂતોએ ભાગ લીધો હતો. આ દરમિયાન નરેશ ટિકૈતે કહ્યું કે રાજ્યમાં શેરડીનો ભાવ વધારીને 450 રૂપિયા પ્રતિ ક્વિન્ટલ કરવો જોઈએ. આ સાથે ટ્યુબવેલ પર મીટર ન લગાવવા દેવા અને જુના ટ્રેકટરો ન રોકવાની પણ જાહેરાત કરવામાં આવી હતી.

નાગપુર પોલિસી ચાલી રહી છે

મહાપંચાયતમાં ભારતીય કિસાન યુનિયનના રાષ્ટ્રીય પ્રવક્તા રાકેશ ટિકૈતે કેન્દ્ર અને રાજ્ય સરકારોને આડે હાથ લીધા હતા. તેમણે યુપીમાં શેરડીનો ભાવ 450 રૂપિયા પ્રતિ ક્વિન્ટલ કરવાની માંગ કરી હતી. ભા.કિ.યુ.ના પ્રવક્તા રાકેશ ટિકૈતે જણાવ્યું હતું કે, કોઈપણ કિંમતે ટ્યુબવેલ પર વીજળીના મીટર લગાવવા દેવામાં આવશે નહીં અને જૂના ટ્રેક્ટરોને રોકવા દેવામાં આવશે નહીં. તેમણે કહ્યું કે નાગપુર પોલિસી ચાલી રહી છે.

વીજળી મોટી કંપનીઓને વેચવામાં આવી

રાકેશ ટિકૈતે કહ્યું કે પીએસીને નહીં, મિલિટ્રીને બોલાવો, પરંતુ મીટર લગાવવામાં આવશે નહીં. સરકારે તેના મીટરનું રક્ષણ કરવું જોઈએ, ચોરી વધી રહી છે. વીજળી મોટી કંપનીઓને વેચવામાં આવી રહી છે. ગરીબોનું શોષણ થઈ રહ્યું છે. આ કંપનીઓની સરકાર છે. ટિકૈતે જાહેરાત કરી કે 26 જાન્યુઆરી, 2024ના રોજ દેશભરમાં ટ્રેક્ટર પરેડ થશે. ખેડૂત સંગઠન કોઈ એક પક્ષની વિરુદ્ધ નથી. જ્યાં સરકાર ખેડૂતો વિરુદ્ધ નિર્ણય લેશે, અમે ત્યાં જઈશું.

ખેડૂતોની જમીન છીનવી લેવાની તૈયારી

રાકેશ ટિકૈતે ખેડૂતોને ચેતવણી આપી હતી કે જમીન છીનવી લેવાની તૈયારી છે, જમીન ખોટી રીતે સંપાદિત કરવામાં આવી છે. અમારા આંદોલનનો આગામી સ્ટોપ ફરીથી દિલ્હી હશે. 20 માર્ચથી દિલ્હીમાં સંયુક્ત કિસાન મોરચાના નેતૃત્વમાં આંદોલન થશે. તેણે 20 વર્ષ સુધી લડત માટે તૈયાર રહેવાનું કહ્યું. વધુમાં તેમણે કહ્યું કે ખેડૂતોને ખોટા કેસની ધમકી આપવામાં આવી રહી છે. ટિકૈતે કહ્યું કે ટ્રેક્ટર એ ખેડૂતનું ફાઈટર પ્લેન છે. તેમણે એમ પણ જણાવ્યું હતું કે જે ખેડૂતો જાતે જ મીટર લગાવવા માંગતા હોય તેઓ તેને લગાવી શકે છે.