દેશમાં UPI દ્વારા ટ્રાન્ઝેક્શનની સંખ્યામાં જબરદસ્ત વધારો થયો છે. નેશનલ પેમેન્ટ્સ કોર્પોરેશન ઓફ ઈન્ડિયા દ્વારા જારી કરવામાં આવેલા આંકડા અનુસાર, મે મહિનામાં UPI ટ્રાન્ઝેક્શન્સ રૂ. 10 લાખ કરોડને પાર કરી ગયા છે. જે અત્યાર સુધીનો રેકોર્ડ છે. જ્યારે એપ્રિલ મહિનામાં 5.58 બિલિયન UPI ટ્રાન્ઝેક્શન્સ થયા હતા અને ટ્રાન્ઝેક્શનની રકમ 9.83 લાખ કરોડ રૂપિયા હતી. અત્રે નોંધનીય છે કે ગયા વર્ષના સમાન સમયગાળાની સરખામણીમાં ટ્રાન્ઝેક્શનની સંખ્યામાં બમણો વધારો થયો છે.
NPCIએ તાજેતરના આંકડા રજૂ કર્યા
જો આપણે NPCIના ડેટા પર નજર કરીએ તો મે 2022માં યુનિફાઈડ પેમેન્ટ ઈન્ટરફેસ (UPI) દ્વારા કુલ 5.95 અબજ ટ્રાન્ઝેક્શન થયા હતા, જેની કુલ રકમ 10.41 લાખ કરોડ રૂપિયા હતી. અગાઉ એપ્રિલ મહિનામાં 5.58 અબજ UPI ટ્રાન્ઝેક્શન થયા હતા અને ટ્રાન્ઝેક્શનની રકમ 9.83 લાખ કરોડ રૂપિયા હતી. ત્યારે ગયા વર્ષના સમાન સમયગાળાની સરખામણીમાં વ્યવહારોની સંખ્યા બમણાથી વધુ થઈ ગઈ છે. મે 2021 માં, UPI વ્યવહારોની સંખ્યા 2.54 અબજ હતી. મહિના દર મહિનાના આધારે મે મહિનામાં ટ્રાન્ઝેક્શનની સંખ્યામાં 7 ટકાનો ઉછાળો આવ્યો છે, જ્યારે રકમમાં 6 ટકાનો વધારો થયો છે.
કોરોનાકાળમાં ડિજિટલ પેમેન્ટનું પ્રમાણ વધ્યું
કોરોના મહામારીના સંકટ દરમિયાન લોકો માટે ડિજીટાઈઝેશન અત્યંત ફાયદાકારક સાબિત થયું હતુ. આ જ કારણ છે કે છેલ્લા બે વર્ષમાં ડિજિટલ પેમેન્ટમાં ઝડપથી વધારો થયો છે. દરમિયાન લોકોએ UPI પેમેન્ટને વધુ પ્રાધાન્ય આપ્યું છે. રિપોર્ટ અનુસાર, આ સમયગાળા દરમિયાન પેટીએમ, ગૂગલ પે જેવી UPI એપ્સ દ્વારા ચૂકવણીમાં વધારો થયો છે, જ્યારે સુરક્ષાને કારણે રોકડ ચૂકવણીનું વલણ નબળું પડ્યું છે. સંપૂર્ણ નાણાકીય વર્ષ 2022 વિશે વાત કરીએ તો UPI તરફથી કુલ 84.17 લાખ કરોડ રૂપિયાના 46 અબજ વ્યવહારો થયા હતા.
